🌹🌹संस्थात्मक🌹🌹

                      विविधांगी वाचनातून वाचकाचे मन संवेदनशील बनत जाते. तो जिज्ञासू होतो, विचार करू लागतो. त्याची प्रगल्भता वाढू लागते. अशा प्रगल्भ व्यक्तिमत्त्वामधूनच समाजमन सुसंस्कृत होत असते.

                      हाच ध्यास घेऊन आपले मराठी वाड्मय जास्तीत जास्त मराठी वाचकांपर्यंत अद्ययावत डिजिटल तंत्रज्ञानाच्या माध्यमातून पोहोचविण्याचे कार्य ‘ई साहित्य प्रतिष्ठान’ संस्था गेली सोळा वर्षे करत आहे.  नवीन पण गुणी लेखकांना प्रोत्साहित करून त्यांची पुस्तके विनामूल्य प्रकाशित करण्याचे कार्य तळमळीने करणाऱ्या या जाणत्या प्रकाशन संस्थेची अल्पशी ओळख इथे करून देत आहे……….….

 

🌹ई साहित्य प्रतिष्ठान🌹

                   जबाबदार मुद्रण माध्यमे विविध वृत्तपत्रे, नियतकालिके,  संदर्भ ग्रंथ आणि पुस्तकांद्वारे आपले साहित्य प्रसाराचे कार्य पूर्वीपासून पार पाडत आहेत.  या क्षेत्राने तंत्रज्ञानात आज एवढी भरारी घेतलीय की आपल्याला मोबाईल, टॅब्लेट, लॅपटॉपवर विविध प्रकारची अद्ययावत वृत्तं, माहिती  आणि  साहित्य दररोज वाचायला, ऐकायला आणि पहायला मिळत आहेत.

             याच क्षेत्रात, कोणतीही व्यवहारिक अपेक्षा न ठेवता एक सेवाभावी प्रकाशन संस्था कार्य करत आहे. तिचे नाव आहे ‘ई साहित्य प्रतिष्ठान’. मराठी वाचकांच्या प्रेमाखातर ई साहित्य प्रतिष्ठान डिजिटल माध्यमातून विविध विषयांवरील ‘ई पुस्तके’ पूर्णतः मोफत प्रकाशित करते.

                  ‘ई साहित्य प्रतिष्ठान’ ही मराठी प्रकाशन विश्वातली आघाडीची प्रकाशन संस्था असून या संस्थेचे आद्य प्रणेते आहेत सुनीळ सामंत. ‘नवखे पण गुणी व सक्षम लेखक वाढावेत, त्यांचे साहित्य वाड्मय दूर देशी जावे, तेही विना मोबदला’  हा संकल्प करून आपल्या उत्साही साहित्यप्रेमी सहकाऱ्यांना सामंत यांनी २००४ मध्ये एकत्र आणले.  नंतर सगळी संपादकीय टीम अथकपणे कामाला लागली, परिणामस्वरूप २००८ मध्ये ई साहित्य प्रतिष्ठानची रीतसर स्थापना झाली.

                   मराठी  भाषिकांची संख्या जवळपास तेरा कोटी आहे. त्यांपैकी किमान तेरा लाख मराठी वाचकांपर्यंत तरी पोहोचाव, असा संस्थेचा मानस होता. आज सहा लाख वाचकांपर्यंत प्रतिष्ठान पोहोचले आहे !  वर्षाला दीडशेहून अधिक पुस्तके ई साहित्य प्रतिष्ठान प्रकाशित करत आहे. एक पुस्तक तयार झाले की लाखो लोकांपर्यंत ते क्षणात जात आहे !

                    साठपेक्षा जास्त देशांत ही पुस्तके पोहोचतात ! वर्षाला पन्नास लाख पुस्तके डाउनलोडही होतात, काही पुस्तके तर लाखांहून अधिक वाचकांपर्यंत पोहोचली आहेत ! हा काही वेगळा साहित्य प्रकार नाही, तर हे एक डिजिटल माध्यम आहे,

                    वाचक सर्वव्यापी असतात.  हे ध्यानी घेऊन ‘ई साहित्य प्रतिष्ठान’ विविध विषयांवरील पुस्तके प्रसिद्ध करण्यावर भर देते. आरोग्य, शिवचरित्र, नाटके, विनोदी वाड्मय, रहस्य, कथा, कादंबऱ्या, ललित साहित्य, प्रवास- पर्यटन, इतिहास, विद्यान, बालसाहित्य, गड किल्ल्यांची माहिती, योग, आरोग्य, कामसूत्र, मूळ संस्कृत ऋग्वेद, रामायण, महाभारत, ज्ञानेश्वरी, वेद-उपनिषद, पुराण,….. ही त्यातली काही उदाहरणे आहेत. अनुवादित साहित्य, ऑडिओ बुक्स देखील संस्थेकडे उपलब्ध आहेत.  

                   या ई पुस्तकांचे वितरण जगभरात ईमेल, वॉट्स अप आणि किंडल द्वारे विनामूल्य करण्यात येते. पूर्वी अन्य प्रकाशकांकडून प्रकाशित केलेल्या पुस्तकाचे पुन: प्रकाशनही लेखी ना हरकत पत्र घेऊन रीतसर प्रसिद्ध केले जाते.

                   विशेष म्हणजे लेखक आणि वाचक दोघांनाही ही प्रकाशन संस्था विनामूल्य सेवा देते. त्यामुळे आपल्या पुस्तकाला मानधन मिळावे, अशी अपेक्षा लेखक मंडळी ठेवत नाहीत, अन् वाचक देखील नवनवीन पुस्तकांची उत्कंठतेने वाट बघत असतात.

                   इंटरनेटवर इंग्रजीचे आज वर्चस्व आहे, अशा परिस्थितीत आपल्या मराठीचा प्रसार करणे हे आव्हानात्मक काम ठरते. मात्र  जास्तीत जास्त मराठी इंटरनेट वापरकर्त्यांपर्यंत पोहोचणे, नवोदितांना लिहिण्यास प्रोत्साहन देणे, त्यांना ई पुस्तक बनवायला मदत करणे आणि मराठी साहित्य प्रसाराची एक चांगली संघटना बांधणे, ही उद्दिष्टे नजरेसमोर ठेवून सातत्याने गेली सोळा वर्षे कार्य करणारे संस्थेचे कार्यकर्ते निष्ठेने व स्वयंसेवकांच्या भूमिकेतून काम करत आहेत.  म्हणून तर ई साहित्य प्रतिष्ठानचा लेखक-वाचक परिवार दिवसेंदिवस झपाट्याने वाढत आहे.

                  मराठी साहित्याचा दरवळ जगभरात पोहोचवून लाखो वाचकांना सुजाण करण्याचा प्रयत्न करणारे ‘ई साहित्य प्रतिष्ठान’ आपल्या मराठी साहित्य विश्वाकडून मात्र दुर्लक्षिले जात आहे,  याची खंत वाटते. कारण, एकीकडे दरवर्षी मोठ्या थाटामाटाने साजरे होणारे व आता शंभरीच्या उंबरठयावर उभे असलेले अखिल भारतीय मराठी साहित्य संमेलन, तर   दुसरीकडे त्याच तोलामोलाचे जागतिक(विश्व) मराठी साहित्य संमेलन, या दोन दिग्गज संघटनांच्या धुरिणांना ई साहित्य प्रतिष्ठानच्या लाखमोलाच्या कार्याची काहीच माहिती नसावी, हे अनाकलनीय आहे.

                 या धुरिणांनी आता जागे व्हावे  व  ई साहित्य प्रतिष्ठानच्या बहुमोल सेवाकार्याची दखल घेऊन त्यांच्या कार्याचा उचित गौरव करावा, अशी माफक अपेक्षा आहे.

 

                        🌿🌿🌿🌿🌿🌿🌿