🌹🌹चित्रपट गप्पा🌹🌹

 

                    दोन विशेष विदेशी चित्रपटांविषयी मला येथे लिहायचे आहे. ‘सेराफिना’ आणि ‘क्राय, द बिलव्हड् कंट्री’ हे दोन्ही जुने गाजलेले चित्रपट आहेत. दक्षिण आफ्रिकेचे राष्ट्रीय नेते नेल्सन मंडेला यांच्या नेतृत्वाखाली सर्वसामान्यांनी वर्णभेदाशी सामना करीत गोऱ्यांच्या राजवटीविरुद्ध उठाव करून स्वातंत्र्य मिळविले. माणसामाणसांत काळागोरा भेद मांडणारे गोरे लोक व त्यापायी अन्याय सहन करणारे आफ्रिकन नागरिक, यांचे आनंदी व दुःखी जीवन या दोन्ही चित्रपटांमध्ये चित्रीत केलेले आहे……….

🌹सेराफिना🌹

                     ‘सेराफिना’ ही फिल्म म्हणजे आफ्रिकन स्वातंत्र्याची आस लागलेल्या स्थानिक देशवासीयांचा करूण आक्रोश आहे. नेल्सन मंडेलाना देवतुल्य मानणारी जनता गोऱ्यांच्या जुलूमाला कंटाळली आणि त्यांनी बंड केले. कितीतरी जणांचे यात बळी गेले. हा स्वातंत्र्य लढा १९८६ पर्यंत चालू होता.

                      जोषपूर्ण डान्स करीत चित्रपट नायिका सेराफिना प्रेक्षकांच्या समोर येते. ती आणि तिच्या बरोबर असणाऱ्या साऱ्यांचीच कहाणी करुणमय आहे. डान्सर नायिका सेराफिना जेवुला व लढवय्ये टीचर मोझंबुक हे चित्रपटाच्या केंद्रस्थानी आहेत. स्वातंत्र्यासाठी जीव देण्याची जिद्द बाळगणारी सामान्य जनता यात वारंवार दिसते. शाळेतल्या पोरांची बंडखोर वृत्तीही ‘सेराफिना’मध्ये बघायला मिळते.

                     चित्रपटाचा शेवटही डान्सवर चित्रीत केलाय. ‘सेराफिना’चे सर्वच कलावंत अस्सल वाटतात. प्रेक्षकाला अंतर्मुख करणारा ‘सेराफिना’ जरूर पहावा असा चित्रपट आहे.

🌹क्राय, द बिलव्हड् कंट्री🌹

                     ‘क्राय, द बिलव्हड् कंट्री’ या नावाची कादंबरी कॉलेजच्या फर्स्ट की सेकंड इयरला मला अभ्यासाचा विषय म्हणून होती. या प्रसिद्ध कादंबरीचे लेखक आहेत ॲलन पॉटन.

                      वंशभेद सहन करणारी दक्षिण आफ्रिकेतील जनता कित्येक वर्षे स्वातंत्र्यासाठी लढत राहिली. नेल्सन मंडेला हा तेथील जनतेचा प्रचंड ताकदीचा नेता होता. त्यांच्या लढ्याला यश मिळाले व दक्षिण आफ्रिका स्वतंत्र झाली. मात्र यात कित्येकांचे बळी गेले. या लढ्याच्या घटना दीर्घकथेच्या माध्यमातून सांगणारी ‘क्राय, द बिलव्हड् कंट्री’ ही लक्षवेधी कादंबरी आहे व त्यावरच आधारलेला ‘क्राय, द बिलव्हड् कंट्री’ हा चित्रपट आहे.

                      आफ्रिकेत गोरे सत्ताधारी तर काळे सर्वसामान्य नागरिक. सर्वत्र त्यांना दुय्यम वागणूक मिळते. गरीबी खूप. अशा परिस्थितीत ते जगत असतात. यांच्या मनात रोष असतो गोऱ्यांवर. त्यातून संघर्ष घडत राहतात. मात्र समतोल राखण्याचे काम दोन्हीकडची माणसं करतात. सलोख्याने राहण्याचा प्रयत्न करतात.

                       दोन बाप यात नायकाच्या जागी आहेत. एक गोरा आहे तर एक काळा. गोरा मोठा श्रीमंत आहे. याचा तरुण मुलगा काळ्यांसाठी एक क्लब काढतो. तो चालवतो. पण त्याचा खून होतो. तो खून करणाराचा बाप आहे काळा ! तो चर्चचा पाद्री आहे. त्याचे नाव रेव्ह. स्टीफन कुमालो.

                       खून करणारा मुलगा गुन्हा कबूल करतो. पण त्याचे म्हणणे असते की, ‘रिव्हॉल्वर माझ्याजवळ कसे आले माहीत नाही, पण मला या गोऱ्यांची भीती वाटत होती. त्या भीतीमुळे मी गोळ्या झाडून ‘त्याला’ मारले. माझा हेतू मारण्याचा नव्हता’.

                       या खुनामुळे कोर्ट केस उभी राहते. केसच्या निकालात खुनी मुलाचे साथीदार सुटतात. पण खुनी मुलाला फाशीची शिक्षा होते. दोघांचे बाप मात्र खूप मॅच्युअर्ड आहेत. सगळी परिस्थिती समजून घेतात.

                       या चित्रपटाच्या प्रारंभी पाद्री बाप आपल्या बहिणीला, मुलाला आणि भावाला शोधायला निघतो. जोहान्सबर्ग या मोठ्या शहरात पोहोचतो. जोहान्सबर्गला एक लुटारू तरुण सोडला तर इतर लोक त्याला मदत करतात. धीर देतात.

                       खूप शोध घेतल्यानंतर त्याला भाऊ भेटतो. हा भाऊ काळ्यांचा अन्याय सहन न करणारा एक नेता बनलाय. बहीण वेश्या बनलेली असते. ती लहान मुलाला घेऊन नवऱ्याच्या शोधात खूप आधी या शहरात येते पण परिस्थितीची बळी ठरते. या भावाबहिणींचे एकमेकांवर प्रेम आहे. दोन भावांचेही एकमेकांवर प्रेम आहे. त्यांची भेट झाल्यावर संवाद घडतात.

                       भाऊ इथेच कायम राहणार म्हणतोय आणि बहिणीला यातून बाहेर पडणे अपराधीपणाचे वाटते. ती हतबल झालीय. भाऊ तिला व तिच्या मुलाला परत नेतो. पण ती नंतर तिच्या वस्तीत परतते.

                       आता मुलाला शोध सुरू झालाय. त्याचा ठावठिकाणा काढणे खूप कठीण काम आहे. पण शोध सुरू होतो. एक तरुण या कामी खूप धडपड करतो. त्याला मदत करतो. शेवटी मुलगा भेटतो ! पण ‘ते’ खून प्रकरण घडते आणि सगळेच विस्कटून जाते.

                       चित्रपटातील फाशीचा प्रसंग फिल करतो. या घटनेनंतर दोघे बाप एकत्र येऊन एकमेकाला धीर देतात, ते सुद्धा फिल होते.

                       ‘क्राय, द बिलव्हड् कंट्री’ हा सर्वच बाजूंनी मला उत्कृष्ट चित्रपट वाटला.

तळटीप : -

                        या दोन्ही चित्रपटांचे दिग्दर्शक, कलावंत आणि इतर तपशील आज माझ्या संग्रहात व स्मरणात नाहीत म्हणून येथे दिलेले नाहीत, याबद्दल क्षमस्व.

                            🍀🍀🍀🍀🍀🍀🍀🍀