💐💐समाज संवेदना💐💐

             चित्रपटसृष्टीतल्या तारे तारकांबद्दल समाजमनात खूप कुतूहल असते. त्यांचे चित्रपट, त्यांचे अभिनय या इतकेच त्यांच्या वैयक्तिक जगण्या वागण्यात आपण स्वारस्य दाखवतो. मीडियावर याची चर्चा करून टिआरपी वाढविला जातो.

              चांगली सेलिब्रिटी व्यक्ती आदर्श माणसाची भुमिका  करणारी वर्तनाने चांगलीच असते ? की खलनायक म्हणून अभिनय करणारा खऱ्या आयुष्यात दुष्टच असतो ? याविषयी बहुतेक रसिकजन गोंधळलेले असतात.

              माझेही तसेच आहे. शोले या गाजलेल्या हिंदी चित्रपटाची पटकथा व संवाद लिहिणारे सलीम- जावेद, सुपरस्टार सलमान खान, नाना पाटेकर, बिग बी अमिताभ बच्चन, कंगना राणावत, अशा भरपूर सेलिब्रिटी आपल्याकडे आहेत. त्यांच्याविषयी खूपदा खट्ट्यामिठ्या बातम्या नेहेमी वाचावयास मिळतात.

              बऱ्याचदा मी देखील गोंधळून जातो. मात्र नीट विचार केल्यावर वाटते, तीही आपल्या सारखी माणसे आहेत. त्यांची ‘कला’ सोडली तर ते कसेही वागायला स्वतंत्र असतात. त्यांच्या दोषाकडे बोट दाखवून आपण निर्मळतेचा आव कसा काय आणू शकतो ? त्यापेक्षा आपण त्यांच्या चांगल्या गुणांची  वाहवा करायला हवीय.

             हे सांगताना सलीम खान यांच्या व्यक्तिमत्त्वाचा एक संवेदनशील पैलू वाचायला मिळाला.………..

 

💐भला माणूस💐

          म.टा. मध्ये १९९१ साली प्रसिध्द झालेला एक विशेष लेख आहे. तो ज्योती दाते यांनी लिहिला होता. ‘एखाद्याचं नशीब’ असे त्या लेखाला नाव. सलीम खान यांनी सांभाळलेल्या एका मुलीची कहाणी त्यात आहे. सलीम खान यांच्या बंगल्यासमोर त्यांना एका  करुण- दिनवाण्या चेहेऱ्याच्या बाईकडे छोटे पोर दिसले. ती बाई दीनवाणी होती पण भिक मागत नव्हती.

              सलीम खान रोज आपल्या बंगल्यातून तिला न्याहाळीत असत. एकदा  त्यांनी आपल्या नोकराकरवी त्या बाईला बोलावले. हातात एका पेपरच्या कागदामध्ये गुंडाळलेले मरणप्राय पंथाला लागलेले पाच महिन्यांचे पोरगं घेऊन ती सलीम खानच्या पुढ्यात उभी राहिली.

              तिची विचारपूस केल्यावर समजले की तिच्या  प्रियकराने तिला फसविलेय ! पोर पदरात टाकून तो गेला. आता पोटासाठी ती काम शोधते आहे. मात्र या पोरीमुळे तिला कुठे काम नाही मिळत.

             सलीम खान तिला पटकन म्हणाले, या मुलीला मला देऊन टाक आणि तू तुझ्या गावी जाऊन रहा. मी सांभाळतो  या मुलीला. ती बाई आनंदली. तिने सारे मान्य केले. सलीम खान यांनी तिला खाऊपिऊ घातले. काही कपडे दिले. तिच्या गावचे तिकीट काढून दिले.  ती निघुनही गेली.

             आज ती गरीब मुलगी सलीम खान यांच्या घरात साऱ्यांची लाडकी झाली आहे. ती  सागरापासुन मिळाली म्हणून यांनी तिचे नाव ठेवलेय ‘अर्पिता’.

              सलिम खान यांना दोन बायका आहेत. एक सलमा(मराठी) अन् दुसरी हेलन(ॲक्टर- डान्सर). पहिलीला तीन मुली व एक मुलगा आहे. तो मुलगा आता सलमान खान म्हणून हिरो झालाय. हेलनला मूलबाळ नाही.

               सलीम खान जात धर्म मानीत नाहीत. माणुसकी मानतात. या मुलीमुळे त्याला चांगले दिवस आलेत, असे त्यांचे म्हणणे आहे. कुटुंबातील साऱ्यांची लाडकी असलेली अर्पिता आता मोठी  होत आहे. सलीम यांनी आपल्या मिळकतीतला हिस्सा तिच्यासाठी राखून ठेवायला सुरुवात केलीय. भविष्यात तिला ते सारे सांगणार आहेत. पण तीच्यावरची कुटुंबाची माया मात्र आटणार नाही.

              हे सारे वाचल्यानंतर सलिम खान यांच्याविषयी आदर वाटू लागला. हा संवेदनशील माणूस भला आहे. एका मुलीचे भविष्य घडवून सलिम खान यांनी पुण्य कर्म केले आहे.

 

                                                       ------------