🌹🌹मनभावन गीत, गाणे अन् कविता🌹🌹

 

             दैनिक ‘महाराष्ट्र टाइम्स’ मध्ये एक कविता माझ्या वाचनात आली. ‘देवळात देव कुठे आहे ?’ असे शीर्षक असलेल्या या कवितेचे लेखन विजयराज बोधणकर यांनी केले आहे. माझ्या माहितीप्रमाणे ते प्रसिद्ध चित्रकारही आहेत.

             देवावर श्रद्धा असणारा मी हे काव्य वाचताना गोंधळून गेलो. मात्र ते पुन्हा वाचताना माझे मन अंतर्मुख होऊन स्वतःलाच प्रश्न विचारू लागले की, ‘नेमका कुठे असतो देव ?’ देवळात की देवळाबाहेर ?

🌹देवळात देव कुठे आहे ?🌹

अरे, तू एका दाण्यातून अनंत होऊन येतोस,

माझ्या रिकाम्या थाळीत भाकर होऊन प्रगटतोस,

म्हणून तर मी जगतोय….

अन् तरीही इथली हेकेखोर माणसं म्हणतात,

देव देवळातच आहे !

अरे, तू वाळल्या लाकडातून अग्नी होऊन

प्रगटतोस,

म्हणून माझी चूल पेटते,

म्हणून तर माझ्या पोटातला अग्नी शमतोय….

अन् तरीही इथली हेकेखोर माणसं म्हणतात,

देव देवळातच आहे !

तू कळीतून उमलून फुलातून प्रगटतोस,

तू अंधार होऊन येतोस, अन् तुझ्या कुशीत

दिवसभराचा बैल थकवा सैल होऊन जातो.

दुसऱ्या दिवशी पुन्हा किरणांच्या वाणांनी

अंधार फाडत मला उठवायला येतोस…….

अन् तरीही इथली हेकेखोर माणसं म्हणतात,

देव देवळातच आहे !

माझ्या नाकातून वाहणारा श्वास,

माझ्या डोळ्यातून दिसणारं जग,

माझ्या अंगातून वाहणारं रक्त,

माझ्या मेंदूच्या कप्पाकप्प्यात ओसंडणारी स्मृती,

अन् तुझ्या हातांनी घडणारी कृती यात तूच

असतोच.

हे बिजातून उमलणाऱ्या कोंबाइतकंच सत्य,

तू मंदिरात कुठे असतोस !

तुला मंदिरात कुठे असतोस हे फक्त भटजीच जाणतो…..

कारण तू भटजीचा एम्प्लॉई असतोस !

पण गवतावरून वाहणाऱ्या पवन देवा,

अनंत फांद्याफांद्यांतून बहरणाऱ्या हरित देवा….

तुला मंदिराचा खरोखरच हव्यास आहे का रे ?

मंदिरातल्या देवा, तू भटजीचा असशील कुणी

पण आमचा तसा तू कुणीही नाहीस………

कारण तू माझ्या घरातच अन्न बनून रोज येतोस

अन् आम्हाला जगवतोस….

म्हणूनच मीही म्हणतो, देवळात देव कुठे आहे ?

देवळात देव कुठे आहे ?

- विजयराज बोधणकर.

(पूर्व प्रसिद्धी १० नोव्हेंबर २०१२ - दैनिक महाराष्ट्र टाइम्स).

         🌿🌿🌿🌿🌿