🌹🌹समाजसंवेदना🌹🌹

 

                  या व्यवहारी जगात आपण फक्त स्वतःसाठी न जगता इतरांसाठीही जगावे, त्यांच्या सुख-दुःखात सहभागी होऊन सेवाव्रती व्हावे, असा विचार करणारी या जगात खूप कमी माणसं आहेत. पण जी मोजकी माणसं आहेत त्यांच्या सेवाकार्याचे मोल खूप मोठे आहे. याची प्रचिती मला एका समाजसेवी संस्थेस भेट दिल्यानंतर आली.

                  माझ्या परिचित शेजारी गृहस्थांचा धाकटा भाऊ आजारपणात हल्लीच निधन पावला. जो आपल्या वयोवृद व विकलांग भावाला सांभाळायचा, तोच गेल्यामुळे या गृहस्थांना मालघर येथील ‘आरती निराधार सेवा फाऊंडेशन’ संस्थेच्या वसतिगृहात ठेवायचा निर्णय काही नातेवाईकांनी घेतला. मग त्यांना तेथे नेण्यात आले. मला ही माहिती मिळाली तेव्हा तिकडे जाऊन त्यांची सांत्वनपर भेट घेण्याचे मी ठरवले. त्या निमित्ताने मला या मान्यवर संस्थेचे कार्य जवळून पाहायला मिळाले.

                  याच संस्थेच्या कार्याचा अल्प परिचय इथे करून देत आहे…………

🌹मालघरचे वसतिगृह🌹

                  कोकण प्रांतात रत्नागिरी जिल्ह्यामध्ये वसलेले चिपळूण हे तालुक्याचे शहर सुपरिचित आहे. येथून गुहागरकडे जाणाऱ्या मार्गावर गणेशखिंडीच्या पुढे मालघर गाव लागते. याच निसर्गरम्य गावात कुंभारवाडीमध्ये ‘आरती निराधार सेवा फाऊंडेशन’ या सेवाभावी संस्थेने निराधार व गरजू व्यक्तींसाठी वसतीगृह उभारले आहे.

                  २०१८ साली ‘आरती निराधार सेवा फाऊंडेशन’ या संस्थेची स्थापना सौ. अनिता व त्यांचे सुविध्य पती आत्माराम नारकर या समाजसेवी कुटुंबाने केली. वयोवृद्ध, दिव्यांग, निराधार तसेच पीडित गरजू महिलांना मायेचा आधार मिळावा या प्रामाणिक भावनेतून या संस्थेने कार्य  सुरू केले आहे.

                   नारकर कुटुंबीयांना दोन अपत्ये आहेत. त्यांची एक मुलगी आरती बौद्धिक अक्षम गटातील विकलांग आहे. तिला सांभाळताना या दाम्पत्याला ज्या अडचणींना सामोरे जावे लागले, त्यातूनच प्रेरणा घेऊन ‘आरती निराधार सेवा फाऊंडेशन’ उभे राहिले आहे.

                   विशेष गौरवाची गोष्ट म्हणजे आरती ही मॅरेथॉनपटू आहे ! तिने भारताचे प्रतिनिधीत्व सुद्धा केले आहे. ४२ वर्षे वय असलेल्या आरतीचा स्वभाव प्रचंड उत्साही असून घरात ती सतत कार्यरत असते.

                    संस्थेचे सेवक-सेविका देखील तेवढ्याच उत्साहाने वसतिगृहात सेवा देत आहेत. जवळपास ४७ गरजू व्यक्ती या वसतीगृहाचा लाभ घेत आहेत. वयोवृद्ध, दिव्यांग, निराधार व पीडित महिला, इत्यादींचा त्यात समावेश आहे. जात पात धर्म आणि पंथ असा कुठलाही भेदभाव न करता ही सेवा अविरत सुरू आहे. या ठिकाणी विविध उपक्रमांच्या आयोजनासह वर्षभर सण आणि उत्सव उत्साहात साजरे होत असतात.

                    या वसतिगृहातील व्यक्तींचे शारीरिक व मानसिक आरोग्य सांभाळणे आणि त्यांना सदैव सकारात्मक वातावरणात ठेवणे या सहजसोप्या गोष्टी नव्हेत. पण नारकर कुटुंब, संस्थेचे सक्षम कार्यकारी मंडळ व मान्यवर सल्लागार मंडळींच्या अधिपत्याखाली हे सेवाकार्य जोमाने सुरू आहे.

                   ‘आरती निराधार सेवा फाऊंडेशन’च्या सामाजिक योगदानाची दखल आता महाराष्ट्रातील जाणत्या संघटनांनी घेतली असल्याने फाऊंडेशनला विविध पुरस्कारांनी गौरविले जात आहे. यापुढे वसतिगृहातील सहभागींच्या हस्तकौशल्याचा वापर करून त्यांना स्वयंव्यवसाय माध्यमातून स्वावलंबी करण्याचा विडाही संस्थेने उचलला आहे.

                    निराधार, विकलांग आणि आबालवृद्धांना आधार देण्याचे पुण्यकर्म करणाऱ्या ‘आरती निराधार सेवा फाऊंडेशन’च्या संपूर्ण परिवाराला शुभेच्छा देताना संस्थेला या कार्यात अधिकाधिक बळ मिळावे हीच याक्षणी परमेश्वरचरणी प्रार्थना आहे………..

                           🍀🍀🍀🍀🍀🍀🍀🍀