🌹🌹मनातलं जनांत🌹🌹

 

              मुंबईतील मान्यवर मराठी साहित्यिकांनी एकत्र येऊन स्थापलेल्या मुंबई मराठी साहित्य संघ या जुन्याजाणत्या संस्थेने लवकरच मुंबापुरीमध्ये ब्लॉग लेखकांचे एक संमेलन आयोजित करण्याचे घोषित केले आहे. या निमीत्ताने साहित्य संघाने दोन विषयांवर ब्लॉग लेखन स्पर्धा घेतली होती. त्यामध्ये सहभाग घेऊन मी खालील विषयावर माझी मते थोडक्यात व्यक्त केली आहेत…………

🌹मराठी भाषेला अभिजात दर्जा मिळाला, पुढे काय ? 🌹

         मराठी भाषेला अभिजात भाषेचा दर्जा मिळावा म्हणुन अथक पाठपुरावा करणाऱ्या महाराष्ट्रातील जाणत्या मंडळींचे परिश्रम सार्थकी लागले आहेत, मराठी जनमानसाचा उत्साहही त्यामुळे वाढला आहे.

         मात्र याची दुसरी बाजू काहीशी वेगळी आहे, असे मला वाटते. संदर्भासाठी मी एक वृत्तपत्र कात्रण येथे देत आहे. ‘मराठी शाळा बंद पडणे हे वेदनादायी...’ हे वृत्त नुकतेच (शनिवार दिनांक २३ डिसेंबरच्या) ‘दैनिक लोकसत्ता’ मध्ये प्रसिध्द झाले आहे. मराठी भाषाप्रेमी वाचकांनी ते वाचले असेल.

         जेष्ठ विचारवंत व संशोधक श्रीयुत रघुनाथ माशेलकर यांनी पुणे येथील पुस्तक महोत्सवाच्या समारोप कार्यक्रमात व्यक्त केलेले हे विचार वास्तव व बोलके आहेत. कारण, सरकारी स्तरावर होणारे कार्य(अपवाद वगळता) केवळ शोभेचे असते. आपल्या मराठी भाषेचे संवर्धन व्हावे, तिचा विकास व्हावा म्हणून कितीतरी मंडळे, महामंडळे, विद्यापीठे आणि सरकारी विभाग प्रसाराचे कार्य करीत आहेत. त्यावर करोडो रुपये खर्च होत आहेत. मात्र ‘मराठी भाषा’ आहे तिथेच स्थानापन्न आहे !

         आपले सत्ताधारी ‘मराठी’ला कितीसे जवळ करतात ? स्वतःच्या मुलांना ते परक्या भाषेत शिकवतात. पार सातासमुद्रापार पाठवून त्यांना विद्वान करतात. इतरांकडून मात्र मराठीच शिकण्याची, बोलण्याची त्यांची अपेक्षा असते !

         राज्यात सर्वत्र मराठी भाषेचा वापर आवर्जून व्हावयास हवा. सरकारने त्यासाठी कायदे व नियमही केले आहेत. दुकाने-आस्थापना–कार्यालये-संस्था-संघटना यांचे नामफलक ठळकपणे मराठी भाषेत लावावेत म्हणून मुंबई महापालिकेला किती आटापिटा करावा लागतोय ? बरं इंग्रजीसह मराठीत पाटी लागली तरी तीला कोपऱ्यात चतकोर जागा मिळतेय. ‘एशियाटिक सोसायटी ऑफ मुंबई’ सारखी जुनी जाणती संस्थादेखील मराठीत नामफलक लावायला आजही दुर्लक्ष करतेय. अशी कितीतरी उदाहरणे देता येतील.

         आपले कुसुमाग्रज बिचारे वर्षानुवर्षे कवितारुपात टाहो फोडून मंत्रालयाच्या प्रांगणात मराठी भाषेचा जागर करीत आहेत. फक्त २७ फेब्रुवारीला जन्मदिनी त्यांची उठबस होते, त्या दिवशी जिकडे तिकडे कुसुमाग्रजांचा आणि ‘मराठी भाषा गौरव दिनाचा ‘प्रसिध्दी’ जल्लोष साजरा होतो, नंतर सारे धीम्या गतीने !

         माझी मातृभाषा मराठी म्हणून माझी मायबोली मराठी आहे. मला तिचा सदैव अभिमान आहे. पण ही भावना सर्व मराठमोळ्या जनमनांत रुजायला हवीय. नुसते बोलणे नाही, तर मराठीचे वाचन वाढायला हवेय, केवळ मराठी भाषा तज्ञ आणि दर्दींपुरतेच हे प्रेम असून उपयोगी नाही. समस्त मराठी जनांच्या हृदयात हे प्रेम पोहोचायला हवेय, त्यानंतरच मराठी भाषा ‘अभिजात’ होईल.

                          🍀🍀🍀🍀🍀🍀🍀