🌹🌹मनातलं जनांत🌹🌹

             दैनंदिन वाटचालीत, विशेष करून कठीण अवस्थेत योग्य मार्ग दाखवून मला आधार देणारी कोणतीही व्यक्ती मी गुरुस्थानी मानतो. ही व्यक्ती कुठल्याही वयाची असो, साक्षर असो की निरक्षर, पुरुष असो वा स्त्री, ती व्यक्ती मला सदैव वंदनीय असते. ‘गुरु’ विषयी सर्वत्र विविधांगी वाचायला व ऐकायला मिळते, वेळोवेळी अनुभूतीही येते.

               हा विषय तसा मोठा आहे. पण ‘गुरु’ विषयी मनांत आलेले सद्विचार आज मला इथे सांगावेसे वाटतात…………...

🌹गुरू विचार🌹

                  ‘गुरू’ कोणाला म्हणावे ?, याची व्याख्या भल्या भल्या तज्ज्ञ महंतांनी केलेली आहे. माझ्या दृष्टीतील गुरूची व्याख्या मात्र काहीशी व्यापक आहे. दीक्षा घेऊन मी ज्या गुरूचे शिष्यत्व पत्करलेय, त्याही पलीकडे असलेल्या व्यक्ती मला गुरूस्थानी आहेत. मला छिन्नी हातोड्याने ठोकून-फोडून घडविणारे माझे माता-पिता, शालेय जीवनातील माझे शिक्षक, कॉलेजात मला विशाल जगाचे सर्वांगाने ज्ञान पाजणारे माझे प्रोफेसर्स, बालपणापासून आजतागायत खाचा खळग्यातून चालताना माझी सोबत करणारे व वेळप्रसंगी माझ्या कानशिलात लगावून दम देणारे माझे मित्रगण, हेही माझे गुरुजन आहेत.

                   याशिवाय, वेळेचे योग्य नियोजन करून कार्यालयीन काम वेळेत पूर्ण करून घेणारे माझे सहकारी व वरिष्ठ अधिकाऱ्यांकडून मला खूप शिकायला मिळालेय. शेजारधर्माचे आचरण करून भल्या बुऱ्या प्रसंगात माझ्या खंबीरपणे पाठीशी राहणारे शेजारी माझे गुरूच आहेत.

                   आणि शेवटी माझ्या शत्रूंचे आणि विरोधकांचे काय ? या जगात आपल्याला कोणी शत्रू नाही, विरोधक नाही, आपले कोणाशी मतभेदच नाहीत, असे ठामपणे आपण सांगू शकत नाही. हा शत्रु-विरोधक चोवीस तास आपल्याला सावध करणारा आपला गुरूच असतो. म्हणून मी स्वतःला भाग्यवान समजतो. मला या साऱ्या जाणकारांचे मार्गदर्शन लाभलेय, ते मला नेहेमी योग्य दिशा दाखवत आले आहेत.

                    अशा या माझ्या आदरणीय गुरुजनांना मी त्रिवार वंदन करतो.

                                                     :::::::::::::::::::