💐💐मनभावन गीत, गाणे अन् कविता 💐💐

               स्वातंत्र्य पुर्व काळात समाज आणि देशासाठी आयुष्य झोकून देणाऱ्या कितीतरी थोर विभूती आपल्या देशात होत्या. पूज्य साने गुरुजीही त्यात अग्रणी होते.

                      संवेदनशील मन असलेले साने गुरुजी साहित्यिक होते. त्यांनी कविता, देशभक्तीपर गीते, कथा- कादंबऱ्यांचे विपुल लिखाण केले आहे. अश्रूंचे थेंब माणसाच्या आयुष्यात किती महत्त्वाचे असतात, याचे भावपूर्ण वर्णन त्यांनी ‘ अश्रू ‘ या कवितेत केलेले आहे.

                      ११ जून हा साने गुरुजींचा स्मृतीदिन (मृत्यु साल १९५०) आहे. त्यांना श्रद्धांजली अर्पण करीत ही कविता येथे सादर करीत आहे………..

💐अश्रू💐

नको माझे अश्रू कधी नेऊ देवा

हाचि थोर ठेवा माझा एक

बाकी सारे नेई धन-सुख-मान

परी हे लोचन राखी ओले

माझे रूप मज अश्रू दावितात

हेचि तातमात प्राणदाते

अश्रू माझे थोर ज्ञानदाते गुरू

अश्रू कल्पतरू माझे खरे

अश्रूच्या बिंदूत माझा सुखसिंधु

नको तो गोविंदु कधी नेऊ

इवलासा अश्रू पर्वत बुडवी

जीवाला चढवी मोक्षपदीं

इवलासा अश्रू परी वज्रा चुरी

पाषाणाचे करी नवनीत

इवलासा अश्रू नको मानू तुच्छ

संसारी महोच्च स्थान त्याचे

इवलासा तारा दिसतो दुरून

परी तो मोजून कोण येई ?

बाळकृष्णाचे ते इवलेसे तोंड

यशोदा ब्रह्मांड देखे त्यात

इवलीशी मूर्ति बटु वामनाची

परी त्रैलोक्याची केली मिती

इवलेसे पान रुक्मिणी ठेवीत

लीलेने तुळीत विश्वंभरा

इवलासा अश्रू तसा माझा आहे

सारे त्यात राहे भाग्य माझे

अश्रू माझी आशा अश्रू माझे बळ

अश्रू हा निर्मळ जवळ असो !

           ---- साने गुरुजी.

      ::::::::::::::::::