💐💐निवडणुक धमाल💐💐

           २०२४ ची लोकसभा निवडणुक सुरु झाली असुन आपल्या भारतात टप्प्या टप्प्याने मतदान होत आहे. निवडणुक यंत्रणा अहोरात्र आपल्या अधिकारी, कर्मचाऱ्यांसह अहोरात्र राबत आहे. प्रत्येक पात्र मतदाराने मतदान करुन आपले सामाजिक कर्तव्य पार पाडावे, अशी अपेक्षा शासकीय यंत्रणा, राजकिय पक्ष आणि संघटना यांचेकडून व्यक्त होत आहे.

          देशातील आर्थिक, सामाजिक, धार्मिक आणि राजकीय घडामोडींचा संमिश्र परिणाम मतदानावर नक्कीच होतो. आपला देश विविधतेतून एकता साधणारा जगातील एकमेव देश आहे. साक्षर, निरक्षर विद्वान, विदुषी आणि संशोधक, या साऱ्यांच्या परिश्रमातून आपला देश विकसित होत आहे.

          जगभरातील सध्याची अशांतता पाहिली तर आपल्या देशात खूप चांगली स्थिती आहे. ती आणखी चांगली करुन देशाची लोकशाही भक्कम करणे हे प्रत्येक प्रामाणिक नागरिकाचे कर्तव्य आहे. निवडणुकीत हे कर्तव्य पार पाडण्याची संधी मतदारांना मिळाली आहे. मतदार राजाशी या निमीत्ताने हितगुज करताना चार शब्द सांगावेसे वाटतात……….

(टीप :-- पुढील लेख मी पांच वर्षांपूर्वी ब्लॉग मध्ये दिला होता. त्यातील भाष्य व आशय आजच्या परिस्थितीलाही लागू पडतात. म्हणुन हा लेख येथे पुनर्प्रकाशित केला आहे).

💐मतदार राजा जागा हो.....💐

           पाच वर्षातून एकदा होणाऱ्या निवडणुकीत सगळयाच पक्षांचे 'लक्ष्य' आहे सत्तेची खुर्ची मिळविणे. त्यासाठी प्रत्येक पक्षाचा उमेदवार ' मतदार राजा 'ला आंजारतोय-गोंजारतोय. एकदा सत्तेची खुर्ची मिळाली, की तो राजाकडे पाठ फिरविणार हे आता सगळ्यांना माहित झालेय.

           कोणत्या कामासाठी यांचेकडे जावे तर यांची प्रथम अपॉइंटमेंट घ्यावी लागते. ती मिळाल्यावर त्यांच्या वेळेत जावे तर, ' साहेब अजून आलेले नाहीत ' हे ऐकावे लागते. त्यांची वाट पाहात तिष्ठत राहावे लागते. साहेब आले की आधी आपल्या खास लोकांना भेटणार, मग आपली वेळ गेली खड्यात ! पाच वर्षे अशीच यांचे मागेमागे लागून कामं करून घ्यावी लागतात मतदार राजाला !

            आज पाच वर्षांनी होणाऱ्या निवडणुकीत मतदार राजाचे मौल्यवान मत घ्यायला हाच 'शिकारी' उमेदवाराच्या रूपात राजाच्या दारात याचकासारखा येतोय. तेव्हा, हे मतदार राजा, तू त्याची शिकार न होता तुझे डोळे व कान नीट उघडे ठेव, मग त्याला सामोरे जा.

            नेहेमी छान-छान परीट घडीचे कोट/सफारी किंवा कुडता पायजमा घालणारी ही नेते-उमेदवार मंडळी आता तुमच्या दारी साधे पांढरे पोशाख घालून, वाकत, अदबीने येतील. तुम्हाला हात मिळवतील. तुमच्या घरातील जीर्ण-जर्जर झालेल्या वयोवृद्ध मंडळींच्या पायाला हात लावतील. पाया पडतील. त्यावेळी हे मतदार राजा, तू स्वतःला धन्य झालो असे म्हणशील ! एवढया मोठ्या माणसानं माझ्या दारी यावे ? माझ्या म्हाताऱ्या माणसांचे पाय धरावे ? मला हात मिळवावेत !

             अशा वेळी हे मतदार राहा, तू भावनाप्रधान होऊ नकोस. हीच वेळ आहे, तुला तुझे लोकशाहीतले हक्काचे हत्यार उपसण्याची. हे हत्यार आहे मतदानाचे. तू मतदान कर. आपले मत निर्धास्तपणे योग्य उमेदवारालाच दे. त्यासाठी बुद्धीचा वापर कर. सगळे उमेदवार जरी तुझ्या दारी-घरी आले आणि भरपूर स्तुती करून त्यांनी तुझ्यावर आश्वासनांची खैरात केली, तरी बावरू नकोस.

              तुझे मत ‘एक’ असले तरी ते ' बहुमोल ' मत आहे हे लक्षात घे. ते देण्यापूर्वी खालील प्रश्न स्वतःलाच विचार. त्यांची उत्तरे स्वतःच जाणून घे. नीट पडताळणी कर आणि मग मतदानाला सामोरं जा--

१) ' त्या ' उमेदवाराने एखादे तरी सामाजिक कार्य केलेय का ? तुझ्या भागातले, गावाचे -परिसराचे कोणते प्रश्न त्याला माहित आहेत ? आणि त्यांनी ते सोडवलेत ? त्यासाठी प्रामाणिकपणे प्रयत्न केलेत ? एक तरी उदाहरण आठव.

२) उमेदवार किती शिकलाय ? तो सुसंस्कृत आहे का ?

३) उमेदवार घराणेशाहीचा वारसदार, म्हणजेच त्याचे/तीचे आजोबा-आजी, सासू-सासरे, पती-पत्नी, काका-काकू, आई-वडील, अशा परंपरेनुसार पक्षाच्या मेहेरबानीने तिकीट मिळविलेला तर नाही ना ?

४) एका पक्षातून दुसऱ्या पक्षात, दुसऱ्यातून तीसऱ्या पक्षात, पुन्हा कोलांट्या उड्या मारीत पहिल्या किंवा दुसऱ्या पक्षात आलेल्या दलबदलू आणि विश्वासघातकी उमेदवाराला तर तू मतदान करणार नाहीस ना ? तसे असेल तर तू स्वतःच स्वतःला फसविणार आहेस हे लक्षात ठेव..

५) जो उमेदवार गुंड आहे, किंवा गुंडच त्याच्या अवती भवती असतात. दंगे-धोपे करण्यांत जो पुढे असतो, नाहीतर गुप्तपणे दंग्याचा सूत्रधार असतो. भ्रष्टाचारी पद्धतीने कामे करतो, पोलिसांत त्याच्याविरुद्ध केसेस आहेत, अशा उमेदवाराला तर तू आपले मत देत नाहीस ना ?

६) हा उमेदवार निवडून आल्यावर त्याने तुला आणि त्याच्या पक्षाला फसविले, वचने पाळली नाहीत, सगळ्या मतदारसंघाचा विश्वासघात केला तर, ' मी असे केले तर मिळालेल्या पदाचा आणि पक्षाचा पूर्णपणे त्याग करीन आणि पुन्हा कधीही कुठल्याही निवडणुकीला उभा राहाणार नाही. ' असे लेखी वचन तो तुला देईल ?

             तर हे मतदार राजा, पाहा बुवा, सारे काही तुझ्यावर अवलंबून आहे. तू खरे तर राजा नव्हे, ‘महाराजा’ आहेस. पण फक्त एक दिवसाचा महाराजा ! आणि' तो ' निवडुन येणारा उमेदवार आहे पाच वर्षांचा सत्ताधीश ! पाच वर्षें तो तुझ्यावर राज्य करणार आहे.

            आज फक्त ' मतदानाच्या ' एका दिवसासाठी राज्य तुझे आहे. लोकशाही तुझी आहे. मताचा अधिकारदेखील तुझाच आहे. तेव्हा ' योग्य ' उमेदवाराला निवडुन आणायचे की पाडायचे हे तूच ठरव आणि योग्य निर्णय घे………

                                                                     ::::::::::::::::::::::::::