💐💐भटकंती मनसोक्त💐💐

                 तुम्ही एका दिवसाचा ट्रेक करण्याचे ठरवत असाल, तर सकाळी जेवढ्या लवकर प्रस्थान सुरु कराल तेवढे चांगले आहे. कारण, किल्ला–डोंगराचा परिसर आपल्याला निवांतपणे पाहता येतो व ट्रेक केल्याचे समाधान मिळते. तुम्ही निघायला उशीर केलात, तर मात्र सगळे गणित कोलमडून जाते, निवांतपणे भटकंती करता येत नाही, शिवाय, ट्रेक एंजॉयही होत नाही.

                हा अनुभव मी कोकणातील खेड जवळच्या मंडणगड ट्रेकच्या वेळी ९४ साली घेतलाय.

💐मंडणगड सोलो ट्रेक💐   

                चिपळूण मुक्कामी असताना एके दिवशी अचानक ठरवले, की आपण मंडणगड पाहून येऊया. पण त्या दिवशी घरून उशीरा निघालो. धावपळ करून  खेड गाठायला दुपारचे बारा वाजले. पावणे बाराची बस चुकली. नंतर अडीचपर्यंत बस नव्हती. पर्याय म्हणुन त्या मार्गावरील पालगडपर्यंत जाणारी एक बस पकडली. सव्वा एकला सुटणारी ही बस दोनच्या सुमारास निघाली. त्या बसने पावणे तीनला पालगडला उतरलो.

               पालगड छोटे पण टुमदार गाव आहे. साने गुरुजींचे हे जन्मगाव. येथे किल्लाही आहे. सारा ट्रेक एका दिवसात करुन संध्याकाळी चिपळूणला परतायचे असल्याने  पालगड किल्ला पाहण्याचा विचार डोक्यातून काढला आणि फक्त मंडणगड ट्रेक करायचे ठरवले. पालगडच्या बस स्टँडवर चौकशी केल्यावर समजले की मंडणगडकडे जाणारी बस पावणे तीनला येथे येते. दहा मिनिटे अवकाश होता. म्हणुन तेथल्या कॅन्टीनमध्ये चहा घेतला. बस पण आली.   

              मंडणगड एकदाचे गाठले. मंडणगड किल्ला स्टँडवरून जवळ दिसतो. प्रत्यक्षात वरपर्यंत पोचायला तास-दीड तास जातो. तेथे अधिक वेळ न घालवता किल्ल्याचा मार्ग धरला. अधिक चौकशी वाटेतील एका दुकानदाराकडे केली. आधी त्याने आश्चर्याने प्रश्न केला, ‘एकटेच जाताय ? वेळ होईल ना तुम्हाला. गड नीट पाहता पण येणार नाही. या गडावर जायच्या वाटापण खूप आहेत.’

             सारे ऐकल्यावर त्याला परतीची बस किती वाजता आहे ते विचारले. बस संध्याकाळी साडे पाचला असल्याचे दुकानदाराने सांगितले. मग लगेच पुढे निघालो. प्रथम उताराची सडक  लागते ती पकडली. काही वेळाने बौद्ध वाडी लागली. तेथे विचारीत विचारीत किल्ल्याची  चढण चढू लागलो. पुढे वस्ती नव्हती. ही वाट चांगली मळलेली होती. त्यामुळे चढण्याची गती वाढवली व चारला गडाच्या माथ्यावर पोहोचलो.

             मंडणागडावर माकडे भरपुर फिरत होती. उगीच ताप नको म्हणुन हातात एक काठी घेऊन पुढे निघालो. गडावर दक्षिण टोकाला श्रीगणेशाचे जुने देऊळ आहे. त्याचा जीर्णोध्दार केल्याचे जाणवले.  नुकताच माघी उत्सव तेथे झाला. त्याच्या खाणाखुणा म्हणजे जिकडे तिकडे कागदांचे बोळे व केरकचरा पसरलेला दिसला !

                या देवळाजवळ पाण्याचे मोठे तळे आहे. त्या पलीकडे छोटे तळे आहे. गडावर एक कबरदेखील आहे. काही उध्वस्त वास्तूंचे चौथरेही आहेत. गडाच्या दक्षिण टोकावरून खाली दूरवर दिसणारी गावे, नदी आणि हिरव्यागार डोंगररांगा पाहताना छान वाटते. मंडणगडावर बोराची झाडे भरपुर आहेत. त्यामूळे बोरे खाण्याचा आनंदही घेतला.

                हा ट्रेक करताना सारखी घड्याळाकडे नजर असायची. तरीही गडाचे दुसरे टोक पाहायला निघालो. चढणीची वाट मिळाली. पुढे जात राहिल्यावर गर्द झाडी दिसू लागली. मग थांबायचे ठरवले. सरळ परतीची वाट धरली व खाली उतरू लागलो. बरोबर सव्वा पाचला मंडणगडचे बस स्टँड गाठले. मिळालेल्या बसने परतीचा प्रवास सुरू  करुन हा ‘सोलो फास्ट ट्रेक’ पूर्ण केला.

                मंडणगडमुळे पूर्वी केलेल्या सोलो ट्रेक्सची आठवण झाली. पेणजवळचा साक्षी दुर्ग, रसायनी येथील  माणिकगड, चिपळूणचा गोवळकोट, अंजनवेलचा गोपाळगड हे किल्ले एकट्याने करताना जो आनंद मिळाला तसाच आनंद  मंडणगड ट्रेकने मिळावा ही अपेक्षा होती.  मात्र ते घडले नाही  आणि कायमची रुखरुख राहिली.

                अर्थात याला आपण केलेला उशीरच कारणीभूत आहे !

 

                                                     ::::::::::::::::::::::::::