💐💐लक्षवेधी💐💐

                 ‘मुंबई मराठी साहित्य संघ’ या सामाजिक- सांस्कृतिक क्षेत्रात अग्रेसर असलेल्या जुन्या जाणत्या संस्थेने नुकताच त्यांच्या वर्धापन दिन समारंभात एका यशस्वी उद्योजकाचा मानपत्र देऊन विशेष सन्मान केला.     

                  या सोहोळ्यास हजर राहण्याची संधी मला मिळाली. वडिलांचा व्यवसाय जागतिक स्तरावर यशस्वी करणारे धनंजय दातार  हे लक्षवेधी व्यक्तिमत्त्व त्यावेळी पाहायला मिळाले.

                  त्यांचे कर्तृत्व उद्योगप्रेमी तरुणांना प्रेरणादायी ठरावे…………. 

             

💐मसाला किंग💐

                  संयमी वृत्ती,  नम्र स्वभाव, व आधुनिक तंत्रज्ञानाची आवड असणारे धनंजय दातार हे जगभरात ‘मसाला किंग’   म्हणून सुपरिचित आहेत. त्यांचा व्यवसाय दुबई व इतर आखाती प्रदेशांत पसरलेला आहे. या उमद्या उद्योजकाला विविध देशांनी पुरस्कार देऊन गौरविले आहे.

                  भरदार शरीरयष्टी, सुटबुटातला पेहेराव अन् हसतमुख चेहऱ्याचे धनंजय दातार हे स्वभावाने निगर्वी आहेत. गौरव समारंभात त्यांनी कुठलाही आडपडदा न ठेवता आपल्या व्यवसायाच्या प्रारंभीची वाटचाल, त्यात वेळोवेळी आलेले अडथळे  व त्यातून त्यांनी काढलेले मार्ग यांविषयी जाहीर भाष्य केले.

                  धनंजय दातार यांच्या वडिलांनी काबाडकष्ट करून दुबईत किराणा सामानाचा व्यवसाय सुरू केला होता. या व्यवसायात आपण केलेले कष्ट मुलानेही करावेत, ही माफक अपेक्षा वडिलांनी ठेवली होती. धनंजय यांनी खूप मेहेनत घेऊन वडिलांच्या व्यवसायात सर्व प्रकारच्या कामांचा अनुभव घेऊन सर्वार्थाने त्यांची अपेक्षा  पूर्ण केली.

                  बदलत्या काळात आपल्या व्यवसायाचे स्वरूप मात्र  बदलायला हवे, हे वडिलांना वारंवार पटवून देण्याचे प्रयत्न धनंजय यांनी केले. आहे त्या व्यवसायात वडिल पूर्ण समाधानी होते. हा व्यवसाय आणखी वाढवू नये, अशा मताचे होते. पण धनंजय यांनी चिकाटी न सोडता वडिलांचे मन राजी करुन व्यवसायाची धुरा स्वतःच्या हाती घेतली. नंतर विचारपूर्वक व्यवसाय विस्तार सुरु केला. या कौटुंबिक व्यवसायात त्यांची पत्नी व दोन सुविध्य मुले, यांची साथ त्यांना लाभली.

                   या व्यवसायात देशी-विदेशी थकबाकीधारकांकडून येणे असलेली बहुतांश रक्कम त्यांना न दुखविता मोठया हिकमतीने धनंजय यांनी वसूल केली व व्यवसाय आर्थिकदृष्ट्या स्थिर केला.

                   प्रत्येक व्यवसायात ‘ब्रँड’ हा महत्त्वाचा घटक असतो. त्या दृष्टीने धनंजय दातार यांनी दोन फूड ब्रँड्स निर्माण केले. भारताचा राष्ट्रीय पक्षी मोर म्हणून ‘पीकॉक’ आणि ‘अल अदिद’(याचा अर्थ चांगला माणूस) हे   त्यांचे ब्रँड्स आखाती देशांत आता ग्राहकप्रिय झाले आहेत.

                    कुठल्याही व्यवसायामध्ये प्रॉफिट हे महत्त्वाचे असते. पण नुसता पैसा असून भागत नाही, तर अक्कल हुशारीने त्याचा वापर करावा लागतो. तसेच, रोज सर्व प्रकारच्या माणसांशी व्यवहाराच्या निमीत्ताने संबंध येतो. क्वचित प्रसंगी वादाची परिस्थितीही निर्माण होते. अशा वेळी रागावर आपले नियंत्रण असावयास हवे,  जिभेवर साखरसुध्दा असायला हवी, असे त्यांचे प्रामाणिक मत आहे.

                      धनंजय दातार यांना विदेशात प्रशिक्षणाच्या निमित्ताने एका मांस विक्रेत्याच्या शॉपमध्ये काम करावे लागले. ते श्रद्धावान असल्याने गोमांस हाताळताना त्यांची विलक्षण पंचाईत व्हायची. पूज्यनीय अशा गायीच्या मांसाला हात तरी कसा लावायचा ?

                      मात्र दुकानाच्या मालकाने शांत भाषेत त्यांना समजावले व प्रश्न सोडवला. मालक म्हणाला, ‘अरे, आपण एकदा व्यवसाय सूरू केला ही असले विचारही डोक्यात आणू नयेत. मी जैन आहे. पूर्ण शाकाहारी आहे. पण हा व्यवसाय करतोच ना मी ?’

                     एकदा दातारांना भारतातून एका तरुणाचा फोन आला. बहुतेक तो गिरगावकर असावा. ‘ माझा नवीन धंदा व्यवस्थित चालत नाही, मी काय करू ?’ असा त्याने प्रश्न केला. त्या तरुणास यांनी उत्तर दिले, ‘लक्षात ठेव, प्रत्येक व्यवसायात सुरुवातीला किमान तीन वर्षे फायद्याची अपेक्षा न ठेवता खूप राबायला लागते. तू हा व्यवसाय सोडू नकोस.’ तो तरुण त्याप्रमाणे वागला. आज त्याची तीन दुकाने झाली आहेत !

                    मार्केटमध्ये दोन प्रकार असतात, सेलर्स मार्केट आणि बायर्स मार्केट. आपला देश हा सेलर्स मार्केट म्हणुन ओळखला जातो. त्याचप्रमाणे व्यवसायात फ्रंट मार्जिन व बॅक मार्जीन देखील असते. त्याची थोड्क्यात माहिती दातार यांनी सांगितली.

                    दुसऱ्याच्या धंद्याचा नफा तोटा जाणुन घ्यायला अनेक प्रतिस्पर्धी  उत्सुक असतात. अशा लोकांना, ‘रोजकी दाल-रोटी इसमे निकलती है बस्स, बाकी कूच्छ नही.…… ’ एवढेच उत्तर आपण त्यांना द्यावे’, असे दातार म्हणतात.

                     इतर भाषिकांचा आणि त्यांच्या धर्माचा आपण आदर करावा. व्यवसाय करणाराने मनात जिद्द नको, तर चीड बाळगावी, तर त्यात यश मिळते, असेही त्यांचे स्पष्ट मत आहे.

                     स्थानिक  भाषा आपल्याला येत नसली की कशा गमती घडतात, याचे चांगले उदाहरण दातार यांनी दिले. एकदा अरबी बोलणारे गिऱ्हाईक त्यांच्या दुकानात आले. त्याला पीठ हवे होते. पण एकमेकांची भाषा दोघांना येईना ! शेवटी हावभाव करीत पीठ किती अन् कुठले हवेय, हे गिऱ्हाईकाने सांगितले आणि पीठ खरेदी केले !  आज चाळीस वर्षे धनंजय दातार यांचे वास्तव्य आहे दुबईत आहे, मात्र अजून अरबी भाषा त्यांना नीटपणे शिकता आलेली नाही !

                       असे असले तरी त्यांचे यश कमी लेखता येणार नाही. फोर्ब्स या  जगप्रसिध्द मासिकाच्या यशस्वी उद्योजकांच्या जागतिक यादीत समावेश झालेल्या या उद्योजकाचे कार्यकर्तृत्व आम्हा  भारतीयांना अभिमानास्पद असेच आहे.

                       अशा लक्षवेधी व्यक्तिमत्त्वास माझा सलाम आहे………...

 

                                               ::::::::::::::::::::::::::