💐आरोग्यम धनसंपदा💐

💐आरोग्यम धनसंपदा💐

             सर्वांना  सस्नेह नमस्कार,

             आपल्या भारत देशातच नव्हे, तर जगभर पसरलेल्या एका भयंकर विषाणूने लाखों मानवांचे प्राण घेतले आहेत. या भयाण महामारीची झळ जगातील प्रत्येकास प्रत्यक्ष किंवा अप्रत्यक्षपणे बसली व बसत आहे. कित्येकांचे संसार उध्वस्त झाले आहेत. गोरगरिबांची पार वाताहात होत आहे.    

            प्रत्येक देशाची, राज्यांची सरकारे हरतऱ्हेने प्रयत्न करून या संकटावर मात करण्याचे अथक प्रयत्न करीत आहेत. मात्र अशा परिस्थितीत, सर्वसामान्यांचे शारीरिक व मानसिक आजार वाढणार आहेत.

            अशा वेळी आपली काय भूमिका असावयास हवी ?, त्याविषयी  प्रार्थनास्वरूपात  मी आपणाशी संवाद साधत आहे-

            आपण सारे सुसंस्कृत आहात. परंतु  सध्याच्या या गंभीर संकटात आपल्या समोर सतत वाईट घटना दिसत आहेत. परिणामतः  आपली मानसिक शक्ती  नकारात्मक विचार करून  दिवसेंदिवस कमकुवत होण्याची शक्यता आहे.

            सुसंस्कृत मान्यवरांनो, आपण आपल्या घरी सुरक्षित आहात. मात्र  आपल्या सुंदर अशा कुटुंब कबिल्यात लहान-अजाण मुले किंवा वयोवृद्ध असतील, तर त्यांचे लक्ष आपल्या वागण्या, बोलण्याकडे केंद्रित झालेले असेल, हे लक्षात असू द्या.

            त्यांच्यासह आपली मानसिक शक्ती वाढविण्यासाठी खालील आगळी-वेगळी  पंचसूत्री  तुम्ही अंमलात आणलीत तर ? तर आपण अधिक सुरक्षित व निर्धास्त व्हाल, असे मला वाटते —

💐आरोग्याची पंचसूत्री……..

*घरातील टिव्ही सकाळी शक्यतो बंद ठेवा.

           कारण, टिव्ही चालू केला, की आपले पाहिले लक्ष बातम्यांकडे जाते. गंभीर घटना आपण समोर बघितल्या,

 की त्यात आणखी गुंतून राहातो. त्यामुळे आपले  मनोरंजनाचे किंवा इतर चांगले कार्यक्रम बाजूस पडतात.

*रेडिओचा वापर सुरू करा.

         रेडिओवरचे संगीत,सुमधुर अशी जुनी-नवी गाणी आपल्याला प्रसन्न ठेवतात. म्हणून रेडिओचा वापर सुरु करा.

           रेडिओ नसेल, तर मोबाईलमध्ये नेट माध्यमातून, किंवा टेपरेकॉर्डर-होम थिएटर म्युजिक सिस्टीम असल्यास, त्यात संग्रहित केलेली चांगली गाणी आणि इतर श्रवणीय ज्ञानार्जन करणारे साहित्य जरूर ऐका (संगीत, प्रवचन, कीर्तन, व्याख्याने, हरिपाठ, भजने, अभंग ,इत्यादी).

          लक्षात घ्या, टिव्ही आपल्याला काही काम नीट करू देत नाही, कारण आपली  नजर सतत टीव्ही समोर ठेवावी लागते ! रेडिओ किंवा इतर कोणतेही ऑडिओ माध्यम आपल्या कानांना ‘जागते’ ठेवते. आपण आपली दैनंदिन कामे करताना ‘चांगले काही’ ऐकण्याचा लाभही आपण घेऊ शकतो.

*आपल्या घरात लहान मुले असतील, तर त्यांना ‘खेळते’ ठेवा.

         मुलांच्या आवडीच्या खेळात त्यांचे मन रमते. त्यात सहभागी व्हा. मुले अधिक आनंदीत होतील.

*घरात वयोवृद्ध असतील तर, त्यांना एकटे पाडू नका.

              वृद्दांच्या प्रकृतीची, आरोग्याची काळजी घेण्याइतकेच त्यांचे मानसिक आरोग्य जपणे, त्याचप्रमाणे  त्यांचे कंटाळलेपण घालविणे महत्त्वाचे आहे.

*वाचन-लेखन-चिंतन-मनन, यांची आवड असेल तर त्याचा प्रारंभ करा.

             खरंतर, प्रत्येक व्यक्तीमध्ये एक कलावंत लपलेला असतो. आपले मन आणि शरीराचे आरोग्य संतुलित ठेवून आपल्याला सतत चांगली प्रेरणा देणारे  कलात्मक छंद  जोपासण्याचा हा  ‘सर्वोत्तम काळ’ आहे. त्याचा अवश्य लाभ घ्या.

            बघा पटलं तर.

            आपणासह सर्वांच्या आरोग्यदायी जीवनाचा सुदिन लवकर यावा, ही सर्वधर्मांच्या देवदेवतांकडे  माझी

||प्रार्थना|| आहे.

                                                         ::::::::::::::::::::::::::::::