💐भटकंती मनसोक्त💐

💐भटकंती मनसोक्त💐

                  आषाढ वारी सुरू झालीय.  यंदा आषाढी एकादशी आहे बारा जुलैला. या वारीत राज्यभरातून-राज्याबाहेरुनच नव्हे, तर दूरदेशातील विविध जातीधर्माचे लहानथोर, सश्रद्द आणि निरक्षर, तसेच उच्चशिक्षित वारकरी सहभागी होऊन निघालेत पंढरपूरच्या दिशेने. श्री विठु माऊलीच्या चरणी माथे टेकल्यावर हा अवघा संप्रदाय धन्य होईल,  अन चंद्रभागेच्या तीरी सर्वत्र आनंदकल्लोळ सुरू होईल.

                   मीही एक वारकरी आहे. पण पंढरीच्या वारी इतकेच माझे लक्ष तेरा व चौदा जुलैला होणाऱ्या गिरीमित्रांच्या संमेलन वारीकडे लागलेय. दरवर्षी नित्यनेमाने दीड दिवसांच्या या वारीमध्ये सहभागी होताना मला श्रीक्षेत्र पंढरीत असल्यागत वाटणार आहे.  मुंबईतील पूर्व उपनगरामध्ये मुलुंडला  साजऱ्या होणाऱ्या ‘गिरीमित्र संमेलनात’ कित्येक नवेजुने गिरीमित्र-मैत्रिणी उत्साहाने भेटतील आणि  अवती भवती सुसंवाद होईल. 

                     हे आनंदक्षण मी गेली सतरा वर्षे प्रत्यक्ष अनुभवतो आहे. जगप्रसिद्ध असे साहसी गिर्यारोहक स्वतः वेळ काढून येथे उपस्थित राहातात. त्यांनी केलेले विक्रम ऐकायला-पाहायला मिळणे, हे मी सद्भाग्य समजतो.  या साऱ्या गिरीमित्र-मैत्रिणींच्या आषाढ वारीने  माझे ‘संमेलन’ संपन्न होणार आहे.

                    तुम्ही निसर्गवेडे आहात ना ? आणि साहसप्रेमी देखील असाल ना ? मग या अठराव्या गिरीमित्र संमेलनात अवश्य सहभागी होऊन आषाढ वारीचे आनंदक्षण अनुभवा की.

                   यंदाच्या ‘गिरीमित्र संमेलनाची संकल्पना आहे – गिर्यारोहण क्षेत्रातील आध्य व्यक्ती (Pioneers in mountaineering’).  या निमित्ताने मी यावर्षीच्या संमेलनातील विशेष पाहुण्यांची थोडक्यात ओळख करून देत आहे……………

 💐जॉन पोर्टर (ग्रेट ब्रिटन/इंग्लंड)—

                  सन १८५७ साली स्थापन झालेली आध्य गिर्यारोहण संस्था , ‘ अल्पाईन क्लब ‘. या संस्थेच्या अध्यक्षपदी कार्यरत असलेले जॉन पोर्टर यांनी आल्प्स व हिमालयीन, काराकोरम पर्वतराजीमध्ये अवघड अशा हिमशिखर मोहिमांत सहभाग घेवून त्या यशस्वी केलेल्या आहेत.  अल्पाईन पद्धतीचे गिर्यारोहण हे त्यांचे वैशिष्ट्य आहे.

                आपल्या   गिर्यारोहण मोहिमांतील अनुभवांवर जॉन पोर्टर यांनी भरपूर लेखनही केले आहे. त्यांच्या ‘ वन डे अॅज अ टायगर ‘ या प्रसिद्द पुस्तकास बांफ माऊंटन फेस्टिवलचा विशेष पुरस्कार मिळालेला आहे.  जॉन पोर्टर यांचा जीवलग गिर्यारोहक दोस्त अॅलेक्स मॅकिनटायर याच्या साहसी मोहिमांच्या आठवणी या पुस्तकामध्ये त्यांनी शब्दबद्द केल्या आहेत. १९८२ मध्ये अन्नपूर्णा हिमशिखर मोहिमेत अॅलेक्सचा अपघाती अंत झाला. आपल्या या दोस्ताची साहसी व खिलाडू वृत्ती विशद करताना जॉन यांनी मोहिमेतील कसोटीच्या क्षणांविषयी गिर्यारोहकाची अवस्था कशी असते,  याचे वास्तव वर्णन केले आहे.

        अशा या लक्षवेधी व्यक्तीमत्वाच्या सानिध्यात दोन दिवस गिरीमित्र संमेलन साजरे होत आहे.

                                                              :::::::::::::::::::::::::::::::