🌹🌹चित्रपट गप्पा🌹🌹

 

                प्रभात चित्र मंडळाने गेल्या महिन्यात ‘ चित्रभारती लघुपट महोत्सवाचे आयोजन केले होते. या स्पर्धात्मक महोत्सवात प्रदर्शित झालेल्या काही फिल्म्स मला बघायला मिळाल्या. त्यापैकी पाच दखल घेण्याजोग्या लघुपटांविषयी हा शब्द संवाद.............

⭐कुस(Womb) : दिग्दर्शन-ज्ञानेश्वर जाधवार.

               महिला ही जन्मदात्री असते. मात्र मूल जन्माला येण्यापूर्वी आणि जन्मानंतर तिच्यापुढे किती समस्या वाढून ठेवलेल्या असतात, याचे संवेदनशील चित्रण ‘कुस’ मध्ये बघायला मिळते. रोजच्या मजुरीवर जगणारे ऊस तोडणी कामगाराचे एक गरीब व दुःखी कुटुंब आहे. बाळंतपण सोसत नसतानाही कष्ट उपसणारी हतबल झालेली बाई आणि वास्तव आयुष्याला सामोरे जाताना सदैव चिडचिड करणारा तिचा नवरा हे आपल्या मुलांना सांभाळून कसेबसे संसार रेटत असतात.

              अशा कठीण अवस्थेत व्याजावर पैसे देऊन नाडणारा मुकादमही आहे. गरजेपोटी त्याच्या ऋणात यांना रहावे लागतेय. पत्नीच्या जीवावर बेतू नये म्हणून आवश्यक डॉक्टरी उपचार करावे लागतात. दरम्यान पोटचा तरुण पोरगा आकस्मिक अपघातात दगावतो, तेव्हा हे कुटुंब हादरून जाते. पण करणार काय ? पोटापाण्याठी जगायला तर हवंय ना ?, असे सवाल उपस्थित करणारा ‘कुस’ हा लघुपट आहे.

              ‘कुस’ मध्ये नायिकेची भूमिका अनुया काळसेकर हिने उत्तम केली असून तिला उकृष्ट अभिनयाचा पुरस्कारही मिळाला. या लघुपटाला सर्वोत्तम लघुपट आणि दिग्दर्शनाचा देखील पुरस्कार मिळाला आहे.

 ⭐रोजेस आर.........(Rose are.....) : दिग्दर्शन-दिग्विजय अंधोरीकर.

             यामध्ये वेश्या व्यवसाय करणारी प्रौढ महिला नायिका आहे. तिच्यावर वरवर प्रेम करणाऱ्या तरुणावर ती भाळलीय. तिच्याशी लग्न करण्याचे त्याने ठरवलेय ! त्यांची शारीरिक जवळीकही आहे. त्या

             तरुणाला वेळोवेळी नायिका पैशाची मदत करते. तिच्या मानलेल्या छोट्या बहिणीला देखील तो तरुण आकर्षित करतो. तीही या तरुणाच्या मोहात पडते ! नायिकेला हे समजल्यावर वेदना होतात. दोघींत मोठे वाद होतात.

             एका भेटीत तरुणाने तिला लाल गुलाबाचे फुल दिलेय. ते सुंदर असले तरी काटेरी आहे. त्या काट्यांसारखे तिचे आयुष्य भयाण होईल, हे वास्तव परोपरीने समजाऊन सांगितल्यावर धाकटी बहिण पस्तावते व आपली चूक कबूल करते. तेव्हा नायिकेला एकदम हलके वाटते. दोघी आनंदी होतात.

             दोघींनी चांगली भूमिका केली आहे. या लघुपटाच्या उत्कृष्ट लेखनासाठी दिग्विजय अंधोरीकर यांना पुरस्कार मिळाला आहे .

 ⭐हलगी : दिग्दर्शन-रोहित जाधव.

              हलगीची वाद्य परंपरा पिढ्यानपिढ्या जपणारा बाप आणि हलगी आयुष्यात कधीही न वाजविण्याची प्रतिज्ञा करणारा तरुण मुलगा. या दोघांचे सतत वाद घडतात. वयोवृद्ध बाप आजारी आहे. या भागात लग्न, बारसे, मिरवणूक, बऱ्या आणि सर्व बऱ्या-वाईट प्रसंगी आवश्यक वाद्य म्हणून हलगी वाजवली जाते. त्यासाठी वेळी अवेळी, कधीही या कुटुंबास बोलावले जाते. गावकरी कधी कधी तर जबरदस्ती करून नेतात. मात्र दारी आलेल्या कोणालाही नकार द्यायची हिंमत कुटुंबाकडे नाही.

             मुलाला शहरात नोकरी करून जास्त पैसे कमवायचे आहेत. बापाचा त्याला ठाम विरोध आहे, ‘ ही आपली पूर्वापार परंपरा आहे. ती तूच पुढे न्यायची आहेस ’, हे बापाचे सांगणे आहे. या परिस्थितीत तरुण मुलाची कुचंबणा होते.

             मुलगा ‘यापुढे हलगी नाही वाजवणार’ असे बापाला निर्वाणीचे सांगून बाहेर पडतो. मग बाप हलगी हाती घेतो. आलेली ऑर्डर करायला हवी म्हणून तयारी करतो. मात्र सगळ्या ताणामुळे त्याचा मृत्यू होतो. त्या दुःखद प्रसंगी हलगी लागतेच ! हे समजल्यावर मुलगा परततो. बापाच्या अंत्ययात्रेत हलगी वाजवत आपली वेदना व्यक्त करतो.

            ‘हलगी’ मध्ये बापाची भूमिका एका प्रसिद्ध कलावंताने केलीय. ‘हलगी’ ला उत्कृष्ट लघुपटाचा तिसरा पुरस्कार आणि उत्कृष्ट अभिनयाचा पुरस्कार सुयश झुंजुरके या तरुण अभिनेत्यास मिळाला आहे.

⭐ब्लॅक फॉरेस्ट : दिग्दर्शन मयुर धामापूरकर.

             यात एका गटई कामगाराची करुण कहाणी चित्रीत झाली आहे. प्रारंभी एका चाळीतील अगदी छोट्या खोलीत चाललेला प्रसंग आपण पाहतो. बाथरूममध्ये नायक आपल्या शाळेत जाणाऱ्या मुलाला अंघोळ घालत असतो. मुलाचे सारे अंग अगदी घासून घासून, साबण लावून स्वच्छ करतोय !

             मग तो मुलाला शाळेत सोडतो. चांगल्या उच्चभ्रूंच्या शाळेत शिकणारा आपला मुलगा नेहेमी टीपटॉप राहायला हवा, अशी नायकाची इच्छा असते. रस्त्यावरच्या गटारात उतरून घाण काढताना, गटार-नाले सफाई काम करताना आपली एनर्जी टिकून रहावी, म्हणून दारूचे सेवन करणे ही सुद्धा गटई कामगारांची गरज असते, हे दाखवणारा एक प्रसंग यात आहे.

             मात्र एकदा इतर मुलांसह चाळीत क्रिकेट खेळणाऱ्या आपल्या मुलाला दलदलीने भरलेल्या नाल्यात पडलेला बॉल घेण्याचा प्रयत्न करताना पाहून बाप विलक्षण संतापतो ! आपले भान सोडतो व सगळ्यांच्या देखत मुलाला मारझोड करतो. हा करुण प्रसंग बरेच काही सांगून जातो. प्रेक्षक हतबुद्ध होतात.

            या लघुपटात काम करणारे कलावंतही चांगले होते.

⭐इन यूअर आईज अगेन : दिग्दर्शन-मयुरेश खोले व विपुल काळे.

             या लघुपटात संवाद जवळपास नाहीतच. एका दुर्दैवी घटनेनंतर विलक्षण मानसिक धक्का बसलेले पती पत्नी त्यातून बाहेर पडत नाहीत. पत्नीवर ती एकटी असताना शारीरिक अत्याचार झालाय. त्यामुळे एकमेकांकडे बघण्याचे सामर्थ्यही त्यांच्यात नाही, इतका जबरदस्त धक्का दोघांना बसलाय.

            हॉस्पिटलमध्ये दाखल असलेली घायाळ पत्नी आणि आत-बाहेर करत विमनस्क चेहऱ्याने वावरणारा तिचा पती. हा निःशब्द प्रसंग बराच वेळ बघून प्रेक्षकांचा ताण मात्र वाढत राहतो. अखेरीस दोघे समंजसपणे एकमेकांच्या डोळ्यांत बघतात तेव्हा त्यांचा एकाकीपणा निघून जातो. ते जवळ येतात. ते बघून प्रेक्षक देखील सुस्कारा सोडतात !

            यात दोघांच्याही भूमिका जबरदस्त झाल्या आहेत. टीव्ही मालिकेत काम करणाऱ्या शिवाली परब या गुणी अभिनेत्रीची भूमिका लक्षणीय आहे.

                                 🌿🌿🌿🌿🌿🌿🌿