🌹🌹 मनभावन गीत, गाणे अन् कविता 🌹🌹

 

           मराठी काव्य विश्वात अग्रणी स्थान असलेल्या कविवर्य कुसुमग्रजांनी प्रेम भावना, निसर्ग, मानवी मन, क्रांती, देश आणि समाज, अशा विविध विषयांवरील कितीतरी कविता लिहिल्या. त्यांचे काव्यसाम्राज्य मोठे आहे व वाचकही अगणित आहेत.

           वंचित आणि कुरुपतेला समाजात कितपत मान मिळतो, याचे करुण वास्तव कुसुमग्रजांनी एका प्रदीर्घ कवितेमध्ये केले आहे. एका प्रसिद्ध दिवाळी अंकात मला ही कविता वाचावयास मिळाली. कोणीही संवेदनशील वाचक ही कविता वाचून अंतर्मुख होईल……….

🌹इंदूबिंदूंचे म्हणणे🌹

आम्ही कुरूप कुरूप | जसा कुंडीतील केर

कोकिळांच्या मैफिलीत | घुसे घुबडाचा स्वर ||

पूनवेच्या उत्सवात | आम्ही आवसेच्या राती

मालवती सावलीने | नंदादीपातील वाती ||

आम्ही कुरूप कुरूप | जसे भुताटकी घर

वटवाघळांचे थवे | लोंबतात छतावर ||

अहो साबण सुंदरी | निर्झरात नाहतात

दिसे डोळ्यात बिछाना | देही दाटे चांदरात ||

अहो साबण सुंदरी | गोरे गाल मांड्या गोल

जसे वस्त्र उणे उणे | तसे दुणावते मोल ||

दूरदर्शनाचा पट | मासिकांचे वरपान

विवाहाच्या सौद्यातही | लाभे कातडीला मान ||

अशी चहुकडे झाली | मात सौंदर्याची आज

आम्हा कुरूपांना वाटे | जितेपणाचीही लाज ||

लेख ललाटात आम्हा | हसे आणि तिरस्कार

काही तेज कलमांना | येई कोयत्याची धार ||

विनोदाच्या देशी तर | आम्हा मिळे राणीपण

माथ्यावर घाणाणती | नित्य बाष्कळाचे घण ||

कवी चित्रकार शिल्पी | सारे बाजाराचे दास

टाळ्यासाठी आवळती | काळया गळ्यावर फास ||

येता सभेला सुंदरी | धावपळ उठाउठ

आम्ही येता दारापाशी | दिशे वळलेली पाठ ||

असे बहिष्कृत जिणे | समाजाच्या पायतळी

सौंदर्याच्या कालिकेला | आम्हा कुरुपांचे बळी ||

अहो कोणी केले सिद्ध | सौंदर्याचे व्याकरण

दिले कामी पुरुषांनी | महिलांना मादीपण ||

कामासक्त दृष्टी फिरे | कातडीच्या बाजारात

सोनबर्खी मिठाईची | त्यांना हवी शेजरात ||

आम्हासाठी महेश्वर | तरी असतात कोणी

स्वस्त दुकानात त्यांना | मिळे मांसलाची गोणी ||

अशा थोर संस्कृतीचे | आम्ही आहो पायतण

प्रतीक्षतो आम्ही साऱ्या | तिच्या विनाशाचा क्षण ||

दलितांना पतितांना | कोठे तरी असे ठाव

कुरुपांच्या जमातीला | नाही देश नाही गाव ||

      ------ कविवर्य कुसुमाग्रज.

              🌿🌿🌿🌿🌿🌿