🌹🌹चित्रपट गप्पा🌹🌹

 

           यावेळी दोन चित्रपटांची ओळख तुम्हाला करून देणार आहे. एक आहे देशी आणि दुसरा आहे विदेशी चित्रपट !

           ‘जुने ते सोने’ ही संकल्पना घेऊन शासनाच्या सांस्कृतिक विभाग अंतर्गत चित्रपट महामंडळाच्या वतीने काही महिन्यांपूर्वी एक मराठी सिनेमा मुंबईत खास समारंभात दाखवण्यात आला होता. तो बघण्याची संधी मला मिळाली.

           स्व. अनंत माने त्याचे निर्माते व दिग्दर्शक होते. सिनेमाचे नाव होते ‘अवघाची संसार’. १९६० साली प्रसिद्ध झालेला ‘अवघाची संसार’ त्या काळी गाजला होता. या विनोदी सिनेमाची कथा अफलातून होती. गाणीही श्रवणीय होती. एव्हरग्रीन कलावंतदेखील यात होते.

           शेवटपर्यंत प्रेक्षकांचे रंजन करणारा हा देशी सिनेमा तुम्हाला नक्की आवडेल.

           या शिवाय, १९८३ साली प्रदर्शित झालेला एक हंगेरियन सिनेमा मी प्रभात चित्र मंडळाच्या कार्यक्रमात पाहिला होता. ‘हाऊस वॉर्मिंग’ असे याचे नाव असून दिग्दर्शन झॉल्टन फॅब्री यांचे होते. प्रेक्षकांना अस्वस्थ करणाऱ्या घटनेचे चित्रण करणारा हा गाजलेला विदेशी सिनेमा आहे.

🌹अवघाची संसार🌹

संगीत : वसंत पवार, गीते : वसंत अवसरे, गायक गायिका : आशा भोसले, सुधीर फडके, वसंतराव देशपांडे,

प्रमुख भूमिका – राजा गोसावी, जयश्री गडकर, शरद तळवलकर, दामूअण्णा मालवणकर, रमेश देव, विवेक, लीला चिटणीस व पद्मा चव्हाण.

            या सिनेमाची कथा थोडक्यात अशी आहे : -

            कथा नायक सदानंद हा फोटोग्राफर व स्टुडिओचा मालक आहे. त्याचा सहायक आणि जोडीदार आहे जग्या. नायिका आहे एका बँकेत काम करणारी तरुणी सुमन. तिच्या सर्व तरुण बहिणी विशेष उल्लेखनीय आहेत. एक आहे शास्त्रीय गायिका, दुसरी स्पोर्टवूमन, तिसरी उच्चशिक्षित विदुषी, चौथी नृत्यांगना !

            हे पूर्ण कुटुंब शिकलेले आणि सुसंस्कृत आहे. आपल्या उपवर मुलींची लग्न जमवून कंटाळलेला बाप स्वतःच्या पायाचे झिजलेले जोडे सांभाळून ठेवतो ! पण आपले प्रयत्न काही सोडत नाही. फोटो काढण्याच्या निमित्ताने नायक सदानंद याचे नायिकेकडे जाणे येणे वाढते. ती आधी दाद देत नाही. पण नायक भयंकर चिवट ! कुठले तरी काम काढत जग्याच्या मदतीने तो तिच्या बँकेत फेऱ्या मारतो आणि एकदाचा नायिकेला पटवतो. त्यांच्या प्रकरणास घरच्यांची संमती सुद्धा मिळते !

            मात्र एक मोठी समस्या निर्माण होते. ‘आपल्या चार मुलींची लग्ने आधी जमायला हवीत. तरच तुमचे लग्न होईल’, असे बाप स्पष्ट बजावतो. मग भावी सासऱ्याला वचन देऊन नायक सदानंद खटपट लटपट करून नवनवे इच्छुक तरुण त्यांच्या घरी आणतो. परंतु वेगवेगळ्या कारणांनी प्रत्येक स्थळ नापसंत ठरते.

            अखेर नायकाचे दोन मित्र योगायोगाने त्या घरातल्या दोन तरुण मुलींच्या संपर्कात येतात. मग दोघींचे जुळते ! नायकाचा जोडीदार जग्या त्या बहिणींमधली एक मुलगी पटवतो ! राहिलेल्या एकीसाठी हे इच्छुक तरुण शोधाशोध करतात व प्रयत्नांती यशस्वी होतात ! शेवटी पाचही मुलींचे लग्न जमते.

            आता आणखी एक समस्या उभी राहते. तो पाचवा तरुण(जावई) स्वतःच्या बहिणीचे लग्न झाल्याशिवाय मी लग्नच करणार नाही म्हणतो !

            सरते शेवटी त्याच्या बहिणीचे प्रेम प्रकरण असल्याचे समजते. मग सगळ्याच समस्या सुटतात आणि सर्वांच्या हास्य विनोदात त्या बहिणींचे शुभमंगल दणक्यात साजरे होते !

            या सिनेमामधील छोटी मोठी भूमिका करणारे सारेच कलावंत गुणी होते. त्यातही दामुअण्णा मालवणकर, राजा गोसावी, जयश्री गडकर, शरद तळवलकर, हे विशेष लक्षात राहिले. अफलातून कथा, शेवटपर्यंत उत्कंठता वाढविणारा, क्षणोक्षणी विनोदी प्रसंग आणि संवाद पेरणारा, गोड मधुर सुरावटीची गाणी गाणारी नायिका, आणि एव्हरग्रीन कलावंतांचा संच ! अशी पंचरंगी वैशिष्ट्ये ल्यालेला ‘अवघाची संसार’ तुम्ही जरूर बघा.

🌹हाऊस वॉर्मिंग(हंगेरी)🌹१९८३. दिग्दर्शन –झॉल्टन फॅब्री.

            एका शहरामध्ये सधन आणि राजकारणी गृहस्थ राहत आहे. त्याने आपल्या घराच्या वाढदिवसा निमित्ताने एक शानदार पार्टी आयोजित केली असून त्या प्रसंगी घडणारी दुर्दैवी घटना ‘हाऊस वॉर्मिंग’ मध्ये आपल्याला बघायला मिळते.

            पार्टीच्या ठिकाणी त्या सद्गृहस्थाचा मित्र परिवार व विविध मान्यवर उपस्थित राहतात. या ठिकाणी एक आमंत्रित गृहस्थ (फॅक्टरीचा मॅनेजर) आलेला आहे. पण हा गृहस्थ तणावाखाली वावरत असतो. त्याचे चित्त स्वतःच्या मुलीने केलेल्या प्रेमप्रकरणाकडे लागलेले असते. गंमत म्हणजे काही वेळाने त्याची मुलगी तिच्या प्रेमिकाला घेऊन त्या पार्टीत हजर होते !

            आता त्याची अस्वस्थता वाढते. वडीलांचा मान राखत ती आपल्या प्रेमिकाची ओळख वडिलांशी करून देण्याचा प्रयत्न करते. अस्वस्थ वडील त्यांच्याकडे दुर्लक्ष करतात. मुलगी पुन्हा समजावण्याचा प्रयत्न करते. तेव्हा बाप संतापतो ! पार्टीच्या मालकाने काही वेळापूर्वी सर्वांना दाखविलेली बंदुक तो मिळवतो. त्या बंदुकीने मुलीच्या मित्रावर सरळ गोळी झाडतो !

            या दुर्घटनेमुळे पार्टीचा बेरंग होतो. उपस्थित माणसं हबकून जातात ! गोळी लागलेला तरुण अत्यवस्थ असतो. सारे त्यावर विचार करतात आणि त्याला हॉस्पिटलमध्ये हलवितात. नंतर पोलिसांची चौकशी सुरू होते. प्रकरण मिटावे म्हणून त्यांना सांगितले जाते की त्रास देणाऱ्या एका कुत्र्याला गोळी घातली गेली. ती चुकून……..!  पोलीसांचे समाधान होते.

            मात्र या ठिकाणी एक आमंत्रित तरुणी आलेली असते. ती रिपोर्टर आहे. आपल्या हुशारीने ती सगळे सत्य बाहेर काढते. परंतु  राजकारण्यांच्या दडपणामुळे  त्या तरुणीवरच नोकरी सोडण्याची पाळी येते ! 

            दुर्दैवाने गोळी लागलेला तरुण मरतो. अपराधी बाप नंतर आपल्या गुन्ह्याची जाहीर कबुली करून तसे पत्र रिपोर्टर तरुणीकडे पाठवतो. शेवटी आपल्या मोटारीला अपघात घडवून स्वतःलाही  संपवतो !

           प्रेक्षकांना अखेरपर्यंत अस्वस्थ करणाऱ्या ‘हाऊस वॉर्मिंग’चे दिग्दर्शक झॉल्टन फॅब्री हे हंगेरीतील प्रसिद्ध कलाकर्मी होते. यातील सर्वच कलाकारांनी वास्तव भूमिका केल्या आहेत.

         

                              🌿🌿🌿🌿🌿🌿🌿