🌹🌹लक्ष्यवेधी🌹🌹

 

            मुंबईतील प्रभादेवी परिसरात वसलेले श्रीसिद्धिविनायक मंदिर हे जुने आणि प्रसिद्ध देवस्थान भाविकांनी वर्षभर गजबजलेले असते. मोठ्या ट्रस्टमार्फत देवस्थानचे व्यवस्थापन तत्परतेने सदैव कार्यरत असते. या देवस्थानच्या विश्वस्तांमध्ये एक आहेत गोपाळ रघुनाथ दळवी. वृत्तीने समाजसेवी असलेले हे व्यक्तिमत्व दादा दळवी या नावाने परिचित आहे.

            या लक्षवेधी माणसाचा परिचय मला श्रीसिद्धिविनायकाच्या कृपेमुळे झाला. कोकणातील तळगावच्या ग्रामस्थांनी आपल्या गावच्या या सुपुत्राचा जाहीर गौरव समारंभ आयोजित केला होता. दादा दळवींच्या समाजकार्याची मला तेथे माहिती मिळाली. इतरांना प्रेरणा देणारे दळवी कसे सेवाभावी आहेत, त्याची ही झलक त्यांच्या परिचयासह…..………

🌹तळगावचा परोपकारी गोपाळ🌹

                 कोकणातील सिंधुदुर्ग जिल्ह्यात तळगाव वसले आहे. पाण्याचे मोठे तळे या गावात होते म्हणून गावाला तळगाव नाव पडले. ओरोस हे जिल्ह्याचे मुख्यालय तळगावापासून फारसे लांब नाही. लोकसभा खासदार विनायक राऊत यांचे घर याच गावात आहे. हिरवाईने नटलेल्या या गावाजवळून कर्ली नदी वाहते. भात आणि नाचणीची शेती इथे प्रामुख्याने केली जाते. मुलांच्या शिक्षणासाठी जिल्हा परिषदेची आणि ग्रामस्थांच्या शैक्षणिक संस्थेची गावात शाळा आहे.

                 तळगावातील सर्व ग्रामस्थ सलोख्याने रहातात. गावात प्राचीन मंदिरं सुद्धा आहेत. त्यातले प्रमुख मंदिर म्हणजे श्रीरामेश्वर. वर्षभर विविध सण आणि उत्सव तळगावात मोठ्या उत्साहात साजरे होत असतात.

                 तळगावात जन्मलेल्या दादा दळवींचे प्राथमिक शिक्षण मुंबईतील महापालिकेच्या शाळेत आणि माध्यमिक शिक्षण भायखळा येथील ह्यूम हायस्कूलमध्ये झाले. त्यानंतर माटुंग्याच्या रूपारेल कॉलेजमध्ये उच्च शिक्षण घेऊन दळवी यांनी बी. ए. व एल.एल.बी.ची पदवी घेतली. राज्यशासनात लिपिक पदावर काम केले. कालांतराने त्यांना अवर सचिव पदाची बढती मिळाली. काही वर्षांपूर्वी त्यांनी स्वेच्छा निवृत्ती घेतली. नंतर एका राजकीय पक्षाच्या राज्य मुख्यालयात रुजू झाले. त्या ठिकाणी ते चांगल्या पदावर आज कार्यरत आहेत.

                 मूळची सेवाभावी वृत्ती दादांना स्वस्थ बसू देत नव्हती. अवती भवती असलेल्या सामाजिक समस्या सोडविताना त्यांनी गावच्या विकासाची रखडलेली कामे नजरेआड केली नाहीत.

                 तळगावामध्ये बऱ्याच वाड्या-वस्त्या मागासलेल्या होत्या. गावात पक्की वाट नव्हती. मोठे रस्ते नव्हते. जे अस्तित्वात होते त्यांचे पूर्ण डांबरीकरण झालेले नव्हते. वाड्यावस्त्यांवरील वाटेत आवश्यक असणारी दिव्यांची पुरेशी व्यवस्था नव्हती. या सर्व पायाभूत सुविधांसाठी सरकारी यंत्रणांकडून निधी मिळविणे सोपे काम नव्हते. मात्र अथक प्रयत्न करून दादांनी लोकप्रतिनिधींकडे पाठपुरावा केला व गावासाठी निधी मिळविला. त्या निधीतून आवश्यक असलेली गावची विकासकामे करून घेतली. जवळपास साडेतीन कोटीहून अधिक रकमेची विकास कामे त्यांनी तळगावासाठी करून घेतलेली आहेत.

                समाजकार्यातील दादांचा सेवाभाव व प्रामाणिकपणा पाहून मुंबईतील श्रीसिद्धिविनायक मंदिर न्यासाने त्यांची विश्वस्त मंडळात नियुक्ती केली. या देवस्थानचा प्रशासनिक पसारा मोठा आहे. मंदिर व्यवस्थापन, सुरक्षा सेवा, गरजू रुग्णांना आर्थिक मदत, सामाजिक आणि सांस्कृतिक प्रबोधनाचे कार्य न्यास वर्षभर करीत असते.

                विश्वस्त मंडळात दादा आल्यानंतर त्यांना या सेवेत काही त्रुटी आढळून आल्या. बरेच कर्मचारी कंत्राटी तत्वावर निष्ठेने काम करीत होते. न्यास आणि शासकीय नियमांचा समतोल राखून या कर्मचाऱ्यांना नियमित सेवेत घेण्यासाठी दादांनी पाठपुरावा केला. आज ते कंत्राटी कर्मचारी नियमित सेवेत आहेत.

                दादा यांची वयोवृद्ध मातोश्री काही महिन्यांपूर्वी वारली. दादांचे ऋणी असलेले असंख्य कर्मचारी या माऊलीच्या सेवेसाठी अहोरात्र धावपळ करत होते.

                गरजू रुग्ण व त्यांचे नातलग विश्वासाने दादांकडे येतात. न्यासाच्या वतीने शक्य होईल तेवढी आर्थिक मदत करण्याचा दादांचा प्रयत्न असतो. कोणी त्यांचे नाव ऐकुन वैयक्तिक कामे घेऊन येतो, तर काहीजण आपल्या मुलाला शाळा-कॉलेजमध्ये प्रवेश मिळावा म्हणून त्यांना भेटतात. काहींच्या मुलांना नोकरी मिळावी म्हणून दादा आपल्या ओळखी वापरून त्यांचे आयुष्य मार्गी लावतात. दादांच्या घरी मदतीच्या अपेक्षेने दिवसा अथवा रात्री आलेला कोणीही गरजवंत परत जाताना समाधानी असतो.

                मला योगायोगाने अशा लक्षवेधी माणसाला गौरव समारंभाच्या निमित्ताने भेटायला आणि बोलायला मिळाले, म्हणून त्यांचेविषयी अल्पपरिचय करून दिला आहे.

                या सेवाभावी लक्षवेधी व्यक्तिमत्वास श्री सिद्धिविनायकाने उदंड व निरोगी आयुष्य द्यावे हीच प्रार्थना……….

                         🌿🌿🌿🌿🌿🌿🌿🌿🌿