🌹🌹 मनभावन गीत, गाणे अन् कविता🌹🌹

 

                 विघ्नविनाशक श्रीगणरायांचे आगमन सर्वदूर महाराष्ट्रातच नव्हे तर देश विदेशात झाले आहे. सर्वत्र उत्सवी माहोल आहे. आपल्या महाराष्ट्रात तर विशेष जल्लोषाचे वातावरण आहे.

                 या उत्सवाच्या निमित्ताने जुने अंक आणि वर्तमानपत्र चाळत असताना ‘महाराष्ट्र टाइम्स’मध्ये एक सुंदर लेख माझ्या वाचनात आला. प्रसिद्ध चित्रपट गीतकार व लेखक श्रीमान अरविंद जगताप यांनी त्यात एक वास्तवदर्शी काव्य शब्दबद्ध केलेय. त्यातला मतितार्थ तुम्हालाही पटेल.

परवा एडिसन नावाचा महान शास्त्रज्ञ

अचानक स्वप्नात आला.

मी म्हणालो घरात गणपती आहे. बूट काढून या.

तर जरा खजील झाला.

एडिसनच्या चेहेऱ्यावर चिंता दिसत होती.

बाप्पांनी त्याची खरडपट्टी काढली होती.

मी म्हणालो विद्याचा देव आहे एडिसनभाऊ.

त्याचं बोलणं मनाला लावून नका घेऊ.

तर एडिसन म्हणाला,

बाप्पांनी विचारलं, का लावलेस हे शोध ?

बघ मंडळात येऊन झालाय का कुणाला बोध ?

म्हणे बल्ब शोधला. कॅमेरा शोधला.

गरज होती का काही ?

एडिसन तुझ्यामुळं दहा दिवस

मला नीट झोप येत नाही.

एडिसन म्हणाला, तुम्ही भारतात का राहता ?

दहा दिवस अमेरिकेतही मजेत जातील.

बाप्पा म्हणाले, जातील रे.

पण भारतासारखे अमेरिकेत मोदक कुणाला येतील ?

पण मित्रांनो, मोदकसुद्दा लवकरच

‘मेड इन चायना‘ वाले असतील.

तेव्हा तुम्हा आम्हाला

बाप्पा कुठं दिसतील ?

२१ मोदकांपलिकडं देवाला

आवडावं असं आता काय आहे ?

पुढच्या वर्षी यायला आपलं मंडळ

निवडावं असं आता काय आहे ?

                 -- अरविंद जगताप.

::::::::::::::::::