🌹🌹समाजसंवेदना🌹🌹

                संवेदनशील माणसं आणि समाजभान ठेवून सत्कार्य करणाऱ्या संस्था ज्या गावात, शहरात, राज्यात अन् देशात आहेत त्या गावाची, राज्याची आणि देशाची कधीच अधोगती होणार नाही. अवती भवती दिसणारी सध्याची नकारात्मक परिस्थिती पाहून देखील मी आशावादी आहे, कारण हीच माणसं आणि संस्था सभोवतालच्या अधोगतीला रोखत आहेत.

                रोज सकाळी वर्तमानपत्रात येणाऱ्या राजकारणाची लक्तरं वेशीवर टांगणाऱ्या बातम्या आता वाचाव्याशा वाटत नाहीत. सोशल मीडियावर सातत्याने येणाऱ्या नेत्या-पक्षाचे ' कार्यकर्तुत्व ' बघवत नाही. अशा काळात कोणा समाजसेवी व्यक्ती-संस्थेला पुरस्कार दिल्याचे वृत्त पहायला मिळाले की मला खुप आनंद होतो व अभिमान वाटतो. यासाठी मी इथे मुंबईतील राजहंस प्रतिष्ठान या संस्थेने केलेल्या गौरव सोहळ्याचे उदाहरण देत आहे………..

🌹देणे राजहंसाचे🌹

                मुंबईतल्या पश्चिम उपनगरात गोरेगांव येथे गेली आठ वर्षे कार्यरत असलेले राजहंस प्रतिष्ठान ही प्रामुख्याने रुग्णसेवा करणारी सेवाभावी संस्था आहे. आजारी गरजू माणसाला लागणारे छोटे मोठे साहित्य कोणत्याही मोबदल्याची अपेक्षा न ठेवता संस्था पुरवते. संकटकाळात असलेल्या रुग्णाच्या कुटुंबाला इतर आधाराची सुध्दा गरज भासते. राजहंस प्रतिष्ठान त्याकरीताही सेवातत्पर असते. या व्यतिरिक्त, समाजातील विविध गुणी व्यक्ती व संस्थांचा कार्यगौरव सोहळा राजहंस प्रतिष्ठान दरवर्षी साजरा करते.

                यंदा संस्थेने मुंबईत गोरेगांवमध्ये आयोजित केलेला गौरव सोहळा पाहण्याचे भाग्य मला लाभले. एकुण चार वेगवेगळया क्षेत्रातील व्यक्तींचा गौरव राजहंस प्रतिष्ठानने केला होता. हा गौरव मुंबई विद्यापीठाचे माजी कुलगुरू व प्रसिध्द अर्थतज्ञ भालचंद्र मुणगेकर यांचे हस्ते झाला.

                जगभरात आपल्या वायनरी(Grape wine) व्यवसायाची पताका उंचावणारे ‘उत्तमजी केवल पाटील’ मूळचे महाराष्ट्रातील श्रीरामपूरचे. घरात शिक्षकी वातावरण असल्याने त्यांची आई शिक्षित होऊन जिल्ह्यातली पहिली महिला शिक्षिका झाली होती. त्यांनी २५ एकराच्या परिघात साकारलेली द्राक्षाची बाग आज वाईन व्यवसायात अग्रेसर आहे. भारतासह फ्रान्समध्ये त्यांच्या वाईनचे उत्पादन होते.

                ‘वंदना गुप्ते’ या सुप्रसिध्द सिने-नाट्य अभिनेत्री आहेत. मधुर आवाजाच्या गायिका माणिक वर्मा यांच्या त्या सुकन्या. कोविडसारख्या काळात वंदना गुप्ते यांनी पंचावन्न लाईव्ह शोज सादर केले होते. जवळपास ७० नाटकात त्यांनी भूमिका साकार केल्या आहेत.

                ‘डॉ. दक्षयाणी मेनन’ ‘टच’ या समाजसेवी संस्थेच्या संस्थापक आहेत. रस्त्यावर राहणारी, निराधार मुले आणि ग्रामीण भागातील गरजु मुलांसाठी ‘टच’ संस्था कार्य करीत आहे. मुलांना शिक्षण देण्यासह त्यांच्या कला गुणांना उत्तेजन देण्याचे उत्तम काम ठाणे जिल्ह्यातील विहीगाव(कसारा) व गोराई येथे ‘टच’ करीत आहे.

                ‘डॉ. उदय निरगुडकर’ ही मराठी माध्यमातून शिकलेली व नंतर पुणे विद्यापीठातून एम.बी.ए. केलेली हसतमुख स्वभावाची व्यक्ती. डॉ. निरगुडकर संगीताचे अभ्यासक तसेच राजकीय विश्लेषक आहेत. विविध विषयावरील पुस्तकांचे लेखन व संपादन त्यांनी केले आहे. ‘स्वयम्’ संस्था सोशल मीडियाच्या माध्यमातून व्यासंगी व्यक्तिमत्त्वांची माहिती संकलित करून प्रसिध्द करते. या संस्थेच्या माध्यमातुन कितीतरी अभ्यासू व्यक्तींच्या दिलखुलास मुलाखती डॉ. उदय निरगुडकरांनी घेतलेल्या आहेत.

                ‘डॉ. गजानन रत्नपारखी’ हे निष्णात हृदयरोगतज्ञ असुन ते नानावटी रुग्णालय, होली स्पिरीट आणि क्रिटी केअर हॉस्पिटलमधून रुग्णांना सेवा देतात. सर्वोत्कृष्ट हृदयरोग तज्ञ म्हणुन त्यांचा विविध स्थरावर सन्मान झाला आहे. विलेपार्ले मेडिकल क्लबमध्ये सुद्दा डॉ. रत्नपारखी कार्यरत असुन पालघर तालुक्यातील विक्रमगडच्या आदिवासी भागात त्यांची वैद्यकीय सेवा आजही सूरू आहे.

                 अशा चार दिग्गज व्यक्तींच्या कर्तुत्वाची ओळख मला राजहंस प्रतिष्ठानमुळे होऊ शकली. संस्थेचे हे सेवाकार्य असेच निरंतर सूरू राहावे हीच सदिच्छा आहे……….

                            ::::::::::::::::::::::::::::::::::