🌹🌹सुंदर माझे घर🌹🌹

 

                   प्रामुख्याने नगर-शहरात राहणारी माणसं निवासासाठी सुरक्षित वास्तू असावी म्हणून घर घेतात. हे घर घेणे सहज सोपे नसते. कुणी कर्ज काढून घर घेते, तर कुणाला वाडवडीलांच्या वाटणीतले घर मिळते. यातील बहुसंख्य माणसं सहकारी गृहनिर्माण संस्थेच्या इमारतीत स्थानापन्न होतात.  हे घर आपलेच असले तरी ते सोसायटीच्या अधिपत्याखाली असते. अर्थात, आपल्या घराची खरी मालकी सोसायटीकडे असते. सोसायटीचे सभासद  सगळा कारभार सांभाळतात.  या जबाबदारीमध्ये ‘आपलेपणा’ मात्र असावयास हवा. 

                    या भावनेतूनच हा शब्द संवाद सोसायटीच्या जाणत्या सभासदांसाठी……………

🌹आपले घर आपली सोसायटी🌹

                  व्यक्ती तितक्या प्रकृती या न्यायाने सोसायटीचा  कारभार सुरू असतो. कुठे आदर्श सोसायटी निर्माण होते, तर कुठे गडबड  घोटाळा  करणाऱ्या  सभासदांमुळे  सोसायटीची  वाताहात  होते. 

                   म्हणून इतरांपासून बोध घेऊन आपण आपली सोसायटी खऱ्या अर्थाने आदर्श करायला हवी.  सहकारी गृहनिर्माण संस्थांसाठी सरकारने कायदे व नियम तयार केलेले आहेत. वेळोवेळी त्यात सुधारणाही होत असतात.  गृहनिर्माण संस्थांच्या कारभारात पारदर्शकता व शिस्त असावी म्हणून तयार केलेले आदर्श उपविधी सुध्दा योग्य आहेत. 

        कायद्यानुसार सभासदांनी बहुमताने अथवा एकमताने निवडून दिलेल्या कार्यकारिणीमार्फत सोसायटीचे दैनंदिन कामकाज होत असते. या कामकाजात कार्यकारिणीतील तसेच बाहेरील सभासदांचे सक्रिय सहकार्य अपेक्षित असते.

                 मात्र अगोदर म्हटल्याप्रमाणे व्यक्ती तितक्या प्रकृती सर्वत्र बघायला मिळतात.  कितीतरी सोसायट्या त्यांच्या भोंगळ कारभारामुळे प्रशासकाच्या ताब्यात जातात. त्यामूळे त्या सोसायट्यांचे अधिक नुकसान होते.  उदाहरण द्यायचे झाले तर कोविड काळामध्ये मुंबईतील जवळपास ४०० सोसायट्यांवर सरकारने प्रशासक नेमले गेले होते. 

                  हे सर्व पाहता आपली सोसायटी कशी आदर्श होईल याचा प्रत्येक सभासदाने प्रामाणिकपणे विचार करायला हवा  आणि त्याकरीता खालील गुणसूत्रे पाळायला हवीत:--

१- आपल्या सोसायटीत स्नेहभावनेने राहावे. 

२- सेवाभावी वृत्तीच्या आणि अभ्यासू सभासदांना प्राधान्याने कार्यकारिणीत निवडून द्यावे.

३- दैनंदिन कामकाजात मदतीच्या भावनेने सहभागी व्हावे, सक्रीय असावे. 

४- कार्यकारिणीच्या कामात दोष दिसले तर प्रथम नीट माहिती करून घ्यावी. तशी खात्री झाली तर ते दोष तात्काळ संबंधितांच्या निदर्शनास आणुन द्यावेत. 

५- आपल्या सोसायटी परिवारातील माणसे कार्यकारिणीत प्रामाणिकपणे काम करून देखील त्यांना कामात वारंवार अडथळे आणणारे व त्यांची नाहक बदनामी करणारे रहिवाशी सभासद व त्यांच्या  वतसमर्थकांविरुध्द योग्य व कायदेशीर कारवाईचे पाऊल उचलावे. 

    सोसायटी म्हणजे सहकार कायद्यांतर्गत स्थापन झालेली गृहनिर्माण संस्था असते,  हे सर्वमान्य असले तरी त्यातल्या ‘सहकार’ शब्दाला जागूनच आपण वागायला हवे. तरच आपल्या सोसायटीचे सुखी आणि आदर्श परिवारात रूपांतर होईल. 

                                   :::::::::::::::::::::::