💐💐मनभावन गीत, गाणे अन् कविता💐💐

             मराठी काव्य जेव्हा श्रवणीय गीतामध्ये रुपांतरीत होते, तेव्हा ते मनाला अधिक भिडते व मनी रूंजत राहते. मराठी साहित्य व संगीत विश्वात प्रारंभीपासून  तीन प्रतिभावान कवी सुपरिचित आहेत. ते म्हणजे  कविवर्य  भा. रा. तांबे , ग. दि. माडगूळकर, आणि पी. सावळाराम. हे कवी-गीतकार आज हयात नसले तरी त्यांची गीते मात्र आजही लोकप्रिय आहेत.

             या तीन दिग्गजांचे पुण्यस्मरण करताना मला  भावणारे त्यांचे गीत-काव्य येथे सादर करीत आहे…………..…

 

💐जन पळभर म्हणतील हाय हाय……💐

गायिका – लता मंगेशकर

 

जन पळभर म्हणतील, ‘हाय हाय’ !

मी जातां राहील कार्य काय ?

सूर्य तळपतील, चंद्र झळकतील;

तारे अपुला क्रम आचरतील,

असेच वारे पुढे वाहतील,

होईल कांहिं का अंतराय ?

मेघ वर्षतील, शेतें पिकतील,

गर्वानें या नद्या वाहतील,

कुणा काळजी कीं न उमटतील

पुन्हा तटावर हेच पाय ?

सखेसोयरे डोळे पुसतील,

पुन्हा आपल्या कामी लागतील,

उठतील, बसतील, हसुनि खिदळतील,

मी जांतां त्यांचें काय जाय ?

राम – कृष्णही आले; गेले !

त्याविण जग का ओसचि पडलें ?

कुणी सदोदित सूतक धरिलें ?

मग काय अटकलें मजशिवाय ?

अशा जगास्तव काय कुढावें ?

मोहिं कुणाच्या कां गुंतावें ?

हरिदूता कां विन्मुख व्हावें ?

कां जिरवुं नये शांतींत काय ?

 

--भा. रा. तांबे

(निधन दिनांक – ७ डिसेंबर १९४१).

 

                                                                      ::::::::::::::::::

 

💐लाखो इथले गुरू...! 💐

 

बिन भिंतीची उघडी शाळा 

लाखो इथले गुरू...

झाडे, वेली, पशु, पाखरे 

यांशी गोष्टी करू !

बघू बंगला या मुंग्यांचा, 

सूर ऐकुया या भुंग्यांचा

फुलाफुलांचे रंग दाखवील 

फिरते फुलपाखरू...

बिन भिंतीची उघडी शाळा 

लाखो इथले गुरू !

 

सुग्रण बांधी उलटा वाडा, 

पाण्यावरती चाले घोडा

मासोळीसम बिन पायांचे 

बेडकिचे लेकरू...

बिन भिंतीची उघडी शाळा 

लाखो इथले गुरू !

 

कसा जोंधळा रानी रुजतो, 

उंदीरमामा कोठे निजतो

खबदाडातील खजिना त्याचा 

फस्त खाऊनी करू

बिन भिंतीची उघडी शाळा

लाखो इथले गुरू !

 

भल्या सकाळी उन्हात न्हाऊ, 

कड्या दुपारी पर्‍ह्यात पोहू

मिळेल तेथून घेऊन विद्या 

अखंड साठा करु

बिन भिंतीची उघडी शाळा 

लाखो इथले गुरू !

 

- ग. दि. माडगूळकर.

(निधन दिनांक – १४ डिसेंबर १९७७).

 

                                                              ::::::::::::::::::

 

💐मानसीचा चित्रकार तो…..💐

गायक– हृदयनाथ मंगेशकर, संगीत – वसंत प्रभू, चित्रपट- कन्यादान.

 

मानसीचा चित्रकार तो,

तुझे निरंतर चित्र काढतो…………..

 

भेट पहिली अपुली घडता

निळी मोहिनी नयनी हसता

उडे पापणी किंचित ढळता

गोड कपोली रंग उषेचे भरतो………..

 

मम स्पर्शाने तुझी मुग्धता

होत बोलकी तुला नकळता

माझ्याविण ही तुझी चारुता

मावळतीचे सूर्यफुल ते करतो……….

 

तुझ्यापरी तव प्रीती सरिता

संगम देखुन मागे फिरता

हसरी संध्या रजनी होता

नक्षत्रांचा निळा चांदवा झरतो…….

 

--पी. सावळाराम

(निधन दिनांक – २१ डिसेंबर १९९७).

 

       

                                                             ::::::::::::::::::