💐💐अद्भुत💐💐

             अवती भवती फिरताना, वावरताना सर्वसाधारणपणे आपल्याला नेहेमीचा परिसर दिसतो, नेहेमीचे दृश्य दिसते. नेहेमीच्या व्यक्ती दिसतात, त्या भेटतातही. मात्र आपण अधिक फिरलो, वावरलो तर नवनवीन परिसर,  व्यक्ती  ज्ञात होतात.

              कधी कधी मात्र  भोवतालच्या अद्भुत घटना आपल्या कानी पडतात………….….

💐साखरेचा गोडवा💐

         ही अद्भूत कहाणी  डॉ. प. वि. वर्तक या  चिकित्सक व व्यासंगी व्यक्तीकडून जाहीर कार्यक्रमामध्ये मला ऐकायला मिळाली.

             बारामतीकडील गायकवाड नावाचा तरूण एकदा पुण्यातील तरुण भारत या वृत्तपत्राच्या संपादकीय कार्यालयात जाऊन म्हणाला, ‘साहेब, मला एक दावा प्रसिध्द करायचाय. मी जेथे जेथे जातो, ज्याला ज्याला हात लावतो ती वस्तू गोड होते !’

            तेथील  संपादकीय अधिकारी, कर्मचारी आश्चर्यचकीत झाले. सारे ऐकून घेतल्यावर तिथल्या वरिष्ठांनी  तरुणास सांगीतले की, ‘तसे असेलही. पण आम्ही हे छापणार नाही.’  त्यासाठी काही निष्कर्ष काढावे लागतील, खात्री पटवावी लागेल. तुम्ही आधी एक करा. तुम्ही डॉ. प. वि. वर्तकांकडे जा. त्यांना सारे सांगा. त्यांनी तुमची परिक्षा केली व खात्री दिली, तर आम्ही तुमचा दावा मान्य करुन ही बातमी छापून आणू.’

            तो तरुण डॉ. वर्तकांकडे आला. त्याचे सगळे म्हणणे ऐकून घेतल्यावर वर्तकांनी त्या तरुणाला नीट तपासले. मग एका भांड्यात त्यांनी  साधं पाणी घेतलं. त्याला त्यामध्ये बोटं बुडवायला सांगितली. नंतर ते पाणी डॉ. वर्तकांनी स्वतः चाखले. ते गोड लागले !

            त्याचा हात जास्त काळ  सॅक्रीनमध्ये राहीला असेल म्हणुन वर्तकांनी आणखी एक तपासणी केली. तेथल्या तेथे काही शास्त्रीय कसोट्या केल्या. पण त्यात त्यांना काही आढळले नाही. ‘या तरुणाने आपल्याला हिपनोटाईज तर केले नसेल ? कारण अशी व्यक्ती समोरच्या माणसासारखे बोलते आणि वागते.  ही शंका फेडायला त्यांनी ते पाणी बाहेरच्या रूममध्ये आणले. एका सेविकेला(जिला यातले काहीच माहीत नव्हते) विचारले की, ‘ हे पाणी कसे आहे ते सांग. सेविकेने ते चाखले. ती म्हणाली, हे गोड पाणी आहे.’

           तरीही त्या तरुणाची पुन्हा तपासणी करायचे वर्तकांनी ठरवले. नवीन भांड्यात दूसरे पाणी घेतले.  त्याला त्यात हात बुडवायला सांगितले. नंतर तो नमुना पुण्यातील मान्यवर लॅब इंडियन केमिकल इंडस्ट्री यांचेकडे पाठविला.  त्याचा तपासणी अहवाल आला. त्यानुसार त्या पाण्यात  सॅक्रीन  नव्ह्ते. इतर कसलाही अंश नव्हता. पण पाणी गोड लागत होते !

               मग वर्तकांनी त्याचा दावा मान्य केला. त्या तरुणाची बातमी नंतर छापली गेली.

               ती बातमी वाचून अंधश्रध्दा निर्मूलन संस्थेचे कार्यकर्ते खवळले. त्यांनी गायकवाडवर पोलीस केस दाखल  केली. बिचारा गायकवाड पकडला गेला.  त्याला मारहाणही  झाली. पोलीस स्टेशनमध्ये रीतसर  चौकशी सुरु झाली. ड्युटीवरील साहेबाने त्या तरुणाला दरडावून विचारले, ‘तुला मरायचंय का ही भोंदूगिरी करून ? काय प्रकार आहे हा ?’

               तरुण म्हणाला, ‘साहेब, काय करू मी ? मी हात लावताच वस्तू गोड होते….’ तेव्हा साहेब गमतीने त्याला म्हणाला, ‘बाहेर एक सायकल ठेवलीय. ती गोड होईल का ?’

              तो तरुण बाहेर ठेवलेल्या सायकलपाशी गेला. त्याने सायकलला हात लावला. मग हवालदाराने ती तपासली  व साहेबाला येऊन सांगितले,’साहेब, ती सायकल खरंच गोड लागतेय !’

              या तरुणाला नंतर डॉ. अनिल अवचटांनी बोलावून घेतले. त्यांनी त्याची परीक्षा बघायला म्हणुन आग्रहाने  ॲसिडच्या भांड्यात हात धुवायला सांगितले. तरुणाने तसे केले. त्या बिचाऱ्याचे हात पांढरे फटक पडले  !

              शेवटी हे ‘गोडवा’ प्रकरण थंड झाले.

               डॉ.वर्तकांनी ऐकवलेली ही हकीकत माझ्यासह अनेकांना तेव्हा अद्भूत वाटलीच, आजही ती अद्भूत वाटतेय………..

            

                                                      ::::::::::::::::::::::::::