💐💐मनभावन गीत गाणे अन् कविता💐💐

           निसर्गध्यास घेतलेले, निर्मळ प्रेमचित्र आपल्या कवितांमधून चित्रित करणारे, आणि शेतीत रमणारे राजकवी ना. धों. महानोर यांचे ऑगस्ट महिन्यात दुःखद निधन झाले.

          महानोरांच्या कित्येक कवितांची सुमधुर गाणी रसिकप्रिय झाली आहेत.  त्यांच्या कविता कोणाही संवेदनशील मनास भावतील अशा आहेत.

          मात्र या कवीने वास्तव राजकारणावर देखील भाष्य केले आहे. ते नेमक्या शब्दांत सांगणारी ही कविता तुम्हालाही अंतर्मुख करेल………….

💐हे  पाप मिरवित नांदणे💐

 

सर्व धर्मांच्या जिथे गा प्रार्थना सामावल्या

त्या राष्ट्रगीताच्याच ओळी कंठ भरुनी दाटल्या.

रस्ते धुळीने माखले भडके उडाले मंदिरी

डोळ्यांत भिजले रक्त घेऊन वाहते गोदावरी.

उध्वस्त हे संसार गा पुसला टिळा भाळावरी

दाणे पिलांना शोधण्या जावे कुण्या कबिराघरी.

तुमची तुम्हा सिंहासने लखलाभ हो जन्मांतरी

हे पाप मिरवित नांदणे ना मान्य त्या देवाघरी.

 

            --- ना. धों. महानोर

 

                :::::::::::::::::::::