💐💐लक्षवेधी💐💐

            राजेश शिरकर या हरहुन्नरी कोकणी तरुणाने निर्मिलेल्या विविध उपयोगी वस्तूंचा परिचय व त्याच्या उद्योगी वाटचालीचा थोडक्यात परिचय इथे करून देत आहे………..…

💐वेल्डर अवलिया : राजेश💐

            कोकणातील तालुक्याचे ठिकाण चिपळूण येथील रेल्वस्थानकापासून पश्चिम दिशेकडील प्रवेशद्वाराने आपण बाहेर पडल्यावर वाशिष्ठी नदीच्या पुलापलिकडे काही अंतर चालून जातो. वाटेत डावीकडे एका घराच्या आवारात लोखंडी ग्रिल्स , जाळ्या, दरवाजे, काही उपयोगी वस्तू तयार करून ठेवलेल्या दिसतात, हेच राजेश शिरकरचे घर आणि वर्कशॉप !

                 राजेशने वेल्डिंगचे प्रशिक्षण घेतलेय. त्याला कामाचा चांगला अनुभव आहे. सुरुवातीला त्याने नोकरीही केलीय. आताप मात्र राजेशचे स्वतःचे वर्कशॉप आहे. डोक्यात भन्नाट कल्पना असलेला हा तरुण कामात  प्रामाणिक आहे. तो गर्विष्ठ बिलकुल नाही, उलट मदतशील स्वभावाचा आहे.

                स्वतःच्या वर्कशॉपमध्ये राजेश सहसा नसतोच ! कारण कामासाठी दिवसभर लोकांकडे प्रत्यक्ष जागेवर जाऊन कामाची पाहणी करणे, मोजमाप करणे, तसेच आवश्यक तेथे काम करणे, या सर्व धावपळीमध्ये  त्याचा वेळ जातो. त्यामुळे आपल्या कामाकरीता राजेशला आधी फोन करावा लागतो. तरच हा भेटतो !

                या उत्साही तरुणाने नारळ सोलण्याचे यंत्र, काजू बिया फोडण्याचे यंत्र, कमोडची आगळी व भक्कम खुर्ची, रोपटी ठेवण्याचे स्टँड, विहिरीवर राहाटाच्या सोयीसह संरक्षण जाळी, अशा वस्तूंची सुंदर निर्मिती केलीय.

                याशिवाय, आंबा व इतर फळे उंच झाडावरून अलगद घेण्यासाठी राजेशने  झेले बनविले आहेत. 

                चिपळूणमधील प्राचीन आणि प्रसिद्ध श्रीगांधारेश्र्वर मंदिर परिसरात स्वर्गीय महात्मा गांधी यांचे स्मारक आहे. तेथील प्रवेशद्वारी अप्रतिम चरखा दिसतो. सर्वांचे लक्ष वेधून घेणारी ही चरख्याची प्रतिकृती राजेशने तयार केलीय.  जवळच्या बगीच्यात राजेशने तयार केलेले सुबक स्टँडही पहायला मिळते.

                चिपळूणसारख्या मोठ्या शहरात भरपूर वेल्डर्स, फॅब्रिकेटर्स आणि त्यांचे वर्कशॉप्स कार्यरत आहेत. असे असूनही लोकं राजेशकडे कामासाठी येतात. त्याच्या कारागिरीला दाद देतात.

                 आपल्या वर्कशॉपमध्ये राजेशने नवीन तरुणांना आपले कौशल्य दाखवून प्रशिक्षित करावे जेणेकरून चिपळूण परिसरात  आणखी लक्षवेधी राजेश तयार होतील, ते स्वतःच्या पायावर उभे राहून यशस्वी व्यवसाय  देखील करू शकतील. या लक्षवेधी कलाकर्मीकडून  भविष्यात उत्तमोत्तम उपयोगी कलाकृती तयार व्हाव्यात आणि त्याची उद्योगी वाटचाल उत्तुंग व्हावी हीच सदिच्छा आहे………..

                                                            :::::::::::::::::::::::::::