💐💐स्वर्गस्थ💐💐

           मराठी साहित्य क्षेत्रातील कविश्रेष्ठ ग. दि. माडगूळकर यांचा स्मृतिदिन  १४  डिसेंबरला आहे.

(निधन दिनांक-१४ डिसेंबर १९७७).

                गदिमांचे याक्षणी पुण्यस्मरण करताना मला त्यांच्याविषयी काही सांगायचेय………..

💐गदिमांजली💐

                रोज रेडिओच्या माध्यमातून गदिमांनी लिहिलेली गीतं मला ऐकायला मिळतात पुणे आकाशवाणी केंद्रावर सकाळी साडेआठ ते नऊ या वेळात सादर होणाऱ्या ‘गदिमांजली’ मध्ये. विविध विषयांवरील सुमधुर गीतं नामवंत गायक-गायिकांचे सुस्वर ऐकताना माझी सकाळ प्रसन्न होते. भक्ती गीतं, प्रेमगीतं, भाव गीतं, लावणी, स्फुर्ती गीतं, विरह गीतं, बाल गीतं आमचे कुटुंब ऐकत असते. सादरकर्ते उत्साहाने गीतांची पार्श्वभूमी, त्यावेळेची परिस्थिती व  गदिमांचे लेखन, याबद्दल कितीतरी नवीन माहिती श्रोत्यांना ऐकवतात.

                भीमसेन जोशीनी गदिमांचे गाणं म्हणताना घातलेली अट, राम गबालेंना एका लग्नप्रसंगी आलेला ताण, सुधीर फडकें, सीताकांत लाड यांच्याबरोबर उडालेले लटके खटके, याबद्दल आम्हाला भरपूर काही ऐकायला मिळते.

                या थोर कविश्रेष्ठास ओझरते पाहण्याचा व भेटण्याचा योग मला फार पूर्वी आलाय. त्यावेळी मला मोठया लोकांच्या सह्या गोळा करण्याचा छंद होता. नीटसे आठवत नाही,पण मुंबईतील गिरगावात दरवर्षी स्वाक्षरी सप्ताह एक प्रसिध्द प्रकाशन संस्था भरवायची. त्यावेळी आवर्जून मी तेथे हजेरी लावायचो व मान्यवर लेखक,कवी-कवियत्री, कलावंतांची स्वाक्षरी घ्यायचो. तेव्हा घेतलेल्या दुर्मिळ स्वाक्षऱ्या अद्याप मी जपून ठेवल्यात. मात्र त्यात काहीजणांच्या स्वाक्षरी आता सापडत नाहीत. गदिमांनी दिलेली स्वाक्षरीही हरवलीय. पण त्यांचा भला मोठा देह, हसरी व स्नेहाळलेली नजर मला अध्याप दिसतेय !

                जरी आज माझ्या संग्रही त्यांची स्वाक्षरी नसली, तरी मी जपून ठेवलेली सुमधुर गाणी,  गीतरामायणातील अवीट गोडीची, सुधीर फडकेंनी गायलेली गीतं, हे सारे मी नेहेमी ऐकतो व सुखावतो. किती विषय गदिमांनी गीत लेखन करताना हाताळलेत ?

                रामदास कामतांनी गायलेले,’ प्रथम तुज पाहता’, वैशाख वणवा चित्रपटातील, ‘अरे नाखवा’ हे गाणे, घरकुल मधील 'पप्पा सांगा कुणाचे, त्याचप्रमाणे भीमसेन जोशी यांनी गायलेला,’इंद्रायणी काठी देवाची आळंदी’ हा अभंग,   ‘एकटी’तील,’ निमिष एक थांब तू’ हे आर्त स्वरातील गीत, जिव्हाळा चित्रपटातील, ‘लळा जिव्हाळा शब्दची खोटे’, आणि सुधीर फडकेंनी म्हटलेले ‘कुठे शोधीशी रामेश्वर अन कुठे शोधीशी काशी’, हे गाणं, लता दिदींच्या आवाजातील ’एका तळ्यात होती बदके’,….ही आवडत्या गीतांची यादी वाढतच राहील.

                हजारातून एखादा असा हा कवीश्वर आपल्या महाराष्ट्राला लाभलाय. या कवीश्वराची स्मृती माझ्यासारखे असंख्य गीतप्रेमी कायम मनी जपून ठेवतील.

                       💐गदिमांना विनम्र अभिवादन💐

                                                         :::::::::::::::