💐💐मनातलं जनांत💐💐

          मुंबईतील पश्चिम उपनगरात गोरेगावमध्ये बऱ्याच समाजसेवी संस्था कार्यरत आहेत. या परिसरात कितीतरी सन्मान्य व्यक्तीदेखील राहतात.

               राजहंस प्रतिष्ठान ही जुनी जाणती सेवाभावी संस्था गोरेगाव पूर्वेला जयप्रकाश नगरमध्ये कार्य करीत आहे. गरीब, गरजू रुग्णांना सहाय्य करण्यात ती अग्रणी आहे. संस्थेचे प्रमुख सुहास कबरे हे दिवसरात्र त्यासाठी कार्यकर्त्यांसह झटत असतात. ही संस्था दरवर्षी विशेष कार्यक्रमांचे आयोजनही करते. विविध क्षेत्रातील सेवाभावी व्यक्ती-संस्थेचा सन्मान सोहोळा, सांगीतिक मैफल, काव्य संमेलन, व्याख्यानमाला, मनोरंजन तसेच प्रबोधनात्मक कार्यक्रम संस्था उत्साहात साजरे करते.

              या संस्थेने प्रसिद्ध कवी अशोक नायगावकर आणि अरुण म्हात्रे यांच्या मिश्किल  काव्यमैफिलीचा सुंदर कार्यक्रम हल्लीच आयोजित केला होता. त्या विषयावर तुमच्याशी थोडेसे हितगुज………

💐काव्य मिश्किली💐

           मराठी कविता आणि विडंबनात्मक काव्य लेखन करणारे हास्य कवी अशोक नायगावकर व अरुण म्हात्रे ही जोडी सर्वदूर महाराष्ट्रात प्रसिद्ध आहे. त्यांच्या काव्य मैफिलीचे कार्यक्रम परदेशातही होतात. झुपकेदार मिशा असलेल्या अशोक नायगावकरांचे काव्यदर्शन टीव्हीवर अनेकदा झालेले आहे. मात्र यावेळी त्यांना प्रत्यक्ष पाहण्याचा योग आला.

                ही ‘मिश्किली’ दोघे आलटून पालटून सादर करतात. दोघेही खट्याळ स्वभावाचे कवी आहेत. एकमेकांची फिरकी घेताना ते प्रेक्षकांचीसुद्दा फिरकी घेतात ! राजकारणी, सत्ताधारी नेत्यांना ते सोडत नाहीत. त्यांना मर्मभेदी भाषेत जोरदार चिमटे काढतात !  आपल्या काव्यामधून व संवादातून मार्मिक सत्य समोर आणतात. त्यांचा हा कार्यक्रम शेवटपर्यंत हसरा-बोचरा राहातो व मजा आणतो !

                अरुण म्हात्रेंचे पाठांतर जबरदस्त आहे. बोरकर, पाडगावकर, ग्रेस, सुरेश भट, बापट, करंदीकर, शेळके, महानोर, अशा दिग्गज कविश्वरांच्या कविता त्यांना तोंडपाठ आहेत. शीघ्र काव्य करणारे अशोक नायगावकरही सभागृहाला सतत हसत ठेवतात.

                त्या दिवशी अरुण म्हात्रे यांनी मैफिलीचा प्रारंभ केला. मान्यवर कवींच्या आठवणी व किस्से ऐकवताना त्यांनी पाडगांवकरांची ‘प्रेम म्हणजे प्रेम असतं, तुमचं आमचं सेम असतं, वेंगुर्ल्याचा पाऊस, केळुस्करांची, ’झिणझिणाट’,  आणि ‘या जन्मावर, या जगण्यावर शतदा प्रेम करावे...अशा कितीतरी भावकवितांच्या ओळी ऐकवुन श्रोत्यांना तृप्त केले.       

 

                 सभागृहात हसरी मैफल रंगात आली असताना या जोडीने सध्याची राजकीय स्थिती, संसाराची पंचविशी, मिठी नदीची केविलवाणी अवस्था, पुण्यातील ट्रॅफिक, कोकणी माणूस, इरसाल मुंबईकर, अशा विविध विषयांना स्पर्श करीत अवघ्या महाराष्ट्राचे वास्तवचित्र सर्वांपुढे मांडून त्यांना गंभीर केले.

                 या कार्यक्रमाचा समारोप आणखी सुंदर झाला. टीव्हीवर गाजलेल्या  ‘उंच माझा झोका’  या मराठी मालिकेचे शिर्षकगीत स्वतः अरुण म्हात्रेंनी लिहिलेय. ते त्यांनी गायला सुरुवात केली, तेव्हा सारे प्रेक्षक भारावून गेले होते.

                अशी ही काव्यमय मिस्किली माझ्या कायम स्मरणात राहील…………

     

                                                       :::::::::::::::::::::::