💐💐चित्रपट गप्पा💐💐

          प्रभात चित्र मंडळाच्या फिल्म शो मध्ये मला अगणित देशी विदेशी चित्रपट बघायला मिळाले. त्यातील काही चित्रपट मला चांगले वाटले, पण काही विशेष वाटले नाहीत.

              अर्थात, हे मत मी सर्वसामान्य प्रेक्षक म्हणून व्यक्त केलेय. ते चुकीचेही असेल. ‘शिप ऑफ थिसीअस’ हा असाच एक चित्रपट होता, जो समीक्षकांनी गौरवलेला, पण मला विशेष न वाटलेला…….………. 

💐शिप ऑफ थिसीअस💐(Ship of Theseus)-       

               आनंद गांधी हा तरुण मालिका लेखक या चित्रपटाचा दिग्दर्शक आहे. घर घर की कहानी, क्योंकी सास भी कभी बहु थी, इत्यादी जुन्या गाजलेल्या टिव्ही मालिकांचे त्याने लिखाण केलेय.

               आनंद गांधीच्या ‘शिप ऑफ थिसीअस’ मध्ये तीन वेगवेगळ्या कथा एका मागोमाग एक समोर येतात.

               आलिया कमाल ही एका डोळ्याने अंध असणारी तरुणी चांगली फोटोग्राफर आहे. ती फोटो काढत सर्वत्र फिरत असते. सभोवतालचे वास्तव चित्रण करण्यात तीला रस आहे. तीच्या डोळ्यावर उपचार सुरू होतात. आता आपल्याला सारे जग नव्याने डोळे भरून बघायला मिळणार, या आनंदात आलिया आहे. तीच्यावरील उपचार पूर्ण होतात. मात्र  त्यानंतर पूर्ण नजरेसमोर दिसणारे जग पाहाताना तीला फारसा आनंद होत नाही !  

               दुसऱ्या कथेत एक उच्च शिक्षीत तरुण साधक आहे. त्याचे नाव आहे मैत्रेय. तो जैन समाजातील आहे. जैन  समाज प्राणी पक्षांच्या बाबतीत विशेष संवेदनशील आहे. उच्च शिक्षीत तरुण साधकाची देखील तीच भावना आहे. आधुनिक उपचार पद्धतीने उपचार करण्यासाठी वैदयकीय संशोधक व तज्ञ मंडळी प्राणी पक्षांचा वापरत करीत त्यांच्या शरीराला ज्या यातना देऊन त्यांचे हाल करतात, त्याची मैत्रेयला प्रचंड चीड आहे.

             या प्रकरणी कोर्टात दाखल असलेल्या एका खटल्यामध्ये सूनावणी सुरू असते. तेथे मैत्रेय आपली बाजू प्रभावीपणे मांडायचा प्रयत्न करतो. परंतु याच दरम्यान मैत्रेयला असलेला लिव्हरचा विकार बळावतो. तेव्हा  नाईलाजाने आधुनिक उपचारांचा त्याला आधार घ्यावा लागतो !

            या चित्रपटातील तीसरी कथा एका किडनी चोरीची हकिकत आपल्याला दाखवते. नवीन हा एक स्टॉक ब्रोकर आहे. त्याला किडनीचा विकार झालाय. त्यामुळे एका अज्ञात दात्याची किडनी ऑपरेशन करून त्याला बसविली जाते. नवीनला नंतर समजते की, ही बसविलेली किडनी एका गरिबाकडून त्याला मिळालीय. ते सुद्दा त्या गरीब दात्याला फसवून !

           नवीनला याची चीड येते. मग तो त्या अज्ञात दात्याला शोधायला बाहेर पडतो. खूप भटकतो. शोध घेताना तो परदेशात जातो ! तेथे एका ठिकाणी नवीनला असेच एक प्रकरण आढळते. एका परदेशी व्यक्तीला गरिब दात्याची किडनी बसविण्यात आलीय ! नवीन अस्वस्थ होतो. पुढे त्या दात्याला त्याची मूळ किडनी परत मिळवून देण्याचा  अयशस्वी प्रयत्न तो करतो. पण ते शक्य नसते. तो वेडगळपणा असतो. याची जाणीव झाल्यावर नवीन दुःखी होतो. गरीब दाता मात्र  पैसे मिळणार असल्याच्या आनंदात आहे ! त्याला स्वतःची किडनी गेल्याचे दुःख नाही !

             हा धक्का नवीनला आणखी दुःखी करतो.

             या चित्रपटातील तीनही कथांच्या शेवटी एका प्रसंगात सगळी प्रमुख पात्रे एकत्र येतात.

            ‘शिप ऑफ थिसीअस’ मधील विषय प्रेक्षकाला अंतर्मुख करून सामाजिक प्रश्न उपस्थित करतात. मात्र या चित्रपटाची पटकथेची बांधणी थोडी विस्कळीत व पसरट वाटते. त्यात संगीत-पार्श्वसंगीत जवळपास नाहीच. जे आहे त्यात तर्कसंगती नाही. यातील सर्व कलाकार मात्र गुणी आहेत.

         या चित्रपटाला टोरंटो फिल्म फेस्टिव्हल मध्ये पुरस्कार मिळालेला आहे. आपला राष्ट्रीय पूरस्कारही या चित्रपटास प्राप्त झालाय.   

 

                                                    ::::::::::::::::::::::::