💐💐मनभावन गीत, गाणी अन कविता💐💐

         स्वर्गीय सुरेश भट गझल-शायरीच्या अंगाने काव्य लेखन करणारे प्रख्यात मराठी साहित्यिक. त्यांच्या काव्यामधून व्यक्त होणारे सुख आणि दुःख संवेदनशील काव्य प्रेमी मनाला अंतर्मुख करते.

            आपल्या शब्दसामर्थ्याच्या बळावर सुरेश भटांनी लिहिलेल्या कित्येक मराठी गझलांनी काव्यरसिकाला गुंतवून ठेवले आहे. त्यांचे काव्य सुमधूर गीतांच्या रुपात विविध चित्रपटांतून प्रसिद्धही झाले आहे.

            आयुष्यातील सुख-दुःखातले जगणे मजेने सांगणाऱ्या या थोर कवीचे हे काव्य तुम्हालाही भावेल…………... 

💐आता मजेने बोलतो💐

आता मजेने बोलतो भेटेल त्या दुःखासवे !

सांभाळूनी घेती मला माझी इमानी आसवे !

 

प्रत्येक वेळा मी मला माझी खुशाली सांगतो

प्रत्येक वेळी आणतो ओठावरी हासू नवे !

 

सैराट तेव्हा हिंडला माझाच टाहो पोरका

आता इथे जे सोसतो ते आसऱ्यासाठी हवे !

 

माझा जगायाचा गुन्हा माझ्याच संगे संपला

जो संपलो मी एकदा त्याला न आता शोधवे !

 

माझ्या चितेला चूड मी लावून झालो मोकळा

आता कशाला मी करू ज्या त्या बघ्यांची आर्जवे !

 

आता अनुज्ञेवाचूनी  गातात ही गीते मला

माझा स्वतःचा सुरही आता न ओठी पालवे !

 

केव्हा तरी दात्यापरी आयुष्य हाका मारिते

मीही असा भिक्षेकरी ज्याला न काही मागवे !

 

                    ----सुरेश भट

                                                               :::::::::::::::::