💐💐स्वर्गस्थ💐💐

 

 

 

 स्व.अनिल अवचट                                स्व.लता मंगेशकर      

 

💐💐श्रद्धांजली💐💐

💐अनिल अवचट💐

          मराठी ललित वाड्मय क्षेत्रात अनिल अवचट यांचे नाव अग्रण स्थानी आहे. हे माझ्या आवडत्या लेखक परिवारात आहेत. त्यांनी मानवी मनाचे गुणदोष टिपताना बारकाईने माणसे प्रत्यक्ष अनुभवलीत. माणसाचे अस्सल चित्र ते आपल्या नजरेसमोर त्यांनी उभे केलेय.

              लहान मुलांमध्ये वावरतानाही त्यांना मनस्वी आनंद व्हायचा. कागदी वस्तूतील कलाकुसर त्यांना ज्ञात होती. ते छान बासरीही वाजवायचे ! अनिल अवचट समाजकार्यात सक्रिय राहून लेखन करायचे. पुण्याचे व्यसन मुक्ती व पुनर्वसन केंद्र-मुक्तांगण त्यांनी व त्यांच्या परिवाराने केलेल्या सत्कार्याचा मोठा पुरावा आहे. अवचटांनी खूप पुस्तके लिहिलीत. त्यातील ‘ माणसं, वाघ्या मुरळी, संभ्रम, कार्यरत, कार्यमग्न, छंदांविषयी,’ ही पुस्तके, आणि विविध दिवाळी अंकांमधील ललित लेख मला वाचायला मिळाले.

              अवचटांचे पुस्तक एकदा हाती  घेतले, की ते पूर्ण वाचल्याशिवाय खाली ठेवूच नये, अशी त्यांची ओघवती भाषाशैली होती. दैनंदिन घडामोडीत सर्वसामान्य आणि असामान्य व्यक्ती अगदी साध्या सोप्या शब्दांत ते आपल्या समोर घेऊन यायचे !

             असे हे छंदिष्ट व अनेक पुरस्कार प्राप्त मराठी साहित्यिक अनिल अवचट जानेवारीतील शेवटच्या आठवड्यात २७ तारखेस स्वर्गस्थ झाले.

             त्यांना माझी भावपूर्ण श्रद्धांजली.

        

                                                                ::::::::::::::::::::::::::

💐लता मंगेशकर💐

         लता दिदी आमची आवडती गायिका, रोज रेडिओवर लता, सुधीर फडके, रफी, अशा गोड गळ्यांच्या गायकांची गाणी ऐकत आमचा दिवस सुरू होतो. ही गाणी आमची एनर्जी वाढवीतात, आम्हाला प्रसन्न ठेवतात.

      गेल्या महिन्यात रविवारी म्हणजे ६ तारखेला सकाळी नऊनंतर रेडिओवर सुरू झालेल्या बातम्या ऐकताना लता दिदी गेल्याची दुःखद वार्ता समजली, ही आमच्या स्वर परिवारातली ज्येष्ठ व्यक्ती गेलीय.

            मात्र लता दिदींचे सुस्वर आम्ही सदैव त्यांच्या  गाण्यातून ऐकत  राहाणार आहोत. हे सुस्वर आमच्या मनातून कधीच दूर जाणार नाहीत.

           या स्वरमाऊलीला माझी विनम्र श्रद्धांजली.

 

                                                                   :::::::::::::::::::::::::::