💐💐आठवणीतील कविता, गीत अन गाणी💐💐

           कविवर्य स्व. नारायण सुर्वे यांनी आपल्या मराठमोळ्या कवितेमधून सर्वसामान्य जनांच्या दुःख-सुखाचा आलेख स्पष्ट रुपात सर्वांसमोर आणला.

                स्वतःच्या आयुष्यात खूप काही भोगलेल्या या कविश्रेष्ठाला जवळून पाहण्याची संधी मला वेळोवेळी मिळाली. मुंबईतील चिंचपोकळी परिसरात राहणारा हा साधासुधा कवी-माणूस पत्रकारासारखी झोळी काखेला मारून रेल्वे लोकलची कधी वाट बघत असायचा, तर कधी स्टेशनवर उतरून हाकेच्या अंतरावर असणाऱ्या आपल्या घराकडे जाताना, शांत-गंभीरपणे वाटचाल करीत असलेला दिसायचा.

                शालेय पुस्तके व काव्य संग्रहातील त्यांच्या काही कविता संवेदनशील वाचकास अंतर्मुख करणाऱ्या कविता आहेत.   

                त्यांची ही कविता वाचून तुम्हीही अंतर्मुख व्हाल……….….

💐अमुची दुनिया💐

 

लुत अंगावर सडलेली

तुमची दुनियाच निराळी

         अमुची दुनियाच निराळी

 

आफ्रिकन अथवा इस्लाम

हिंदेशिया बर्मा सयाम

बंड करती जे जे अनाम

त्यांना हिमालयाचा सलाम

आम्ही पेरीत नसतो युद्ध

आम्ही निर्मित असतो बुद्ध

आम्ही गाळीत असतो घाम

कमवितो तयावर दाम

          युगधारेत चिंब न्हालेली

          आमुची दुनियाच निराळी

 

कधी शहराच्या रस्त्यावर

झेंड्यांचे झुलवित सागर

आम्ही काढतो भव्य जुलूस

सौख्याचे सजविण्या उरूस

बगलेत धुरांडे दाबून

राजमुद्रा त्यावर ठोकून

रणपंडित लढतो आम्ही

बलवानच ठरतो आम्ही

         अशी गाजते रोज धुमाळी

         अमुची दुनियाच निराळी

 

आम्हा अस्मान ठेंगणे सारे

अमुचे मित्र हे तारे वारे

घण घेऊन सूर्य ये कामा

ढग प्रणाम करती आम्हा

साच्यांतून शेत मळ्यांतून

या देशाच्या दरीखोऱ्यांतून

गंगेच्या नील लहरींतून

धरतीच्या तरु-पर्णातून

 

          आम्ही उभेच सांजसकाळी

          अमुची दुनियाच निराळी.

 

                       कविवर्य-नारायण  सुर्वे.

 

                                                ::::::::::::::::::::::::::::::