💐💐अद्भुत💐💐

                गेल्याच महिन्यात पुण्याजवळ एका महत्वाच्या कामानिमित्ताने भुकूम परिसरातील खाटपेवाडीत मुक्कामी गेलो होतो. हिरव्यागार निसर्ग सानिध्यात वसलेले  ‘ स्वरूपसेवा ’ या सामाजिक संस्थेचे  ‘ मधुरांगण ‘ मला  जवळून बघायला मिळाले. कुठल्याही आस्तिक अथवा नास्तिक माणसाला  ऊर्जा देऊन  प्रफुल्लित करणारी ही ‘ सुवास्तू ‘ माझ्या मनाला भावली.

                 विक्रमी हिमशिखरे पादाक्रांत केलेल्या पुण्यातील गिर्यारोहक व निसर्गप्रेमी  स्नेह्यांनी एकत्र येऊन निर्माण केलेली ‘ स्वरूपसेवा संस्था ‘  मधुरांगणात कार्यरत आहे. समाजातल्या वंचित बांधवांना त्यांच्या आयुष्यातील काही काळ तरी येथे येऊन निर्मळ आनंद मिळावा  म्हणून कुठलीही आर्थिक अपेक्षा न ठेवता  या वास्तूमध्ये निवासी शिबिरे, संमेलन असे संस्थात्मक उपक्रम संस्था प्रामाणिकपणे राबवित आहे.

                 आज या ठिकाणी मी ‘मधुरांगण’ मध्ये जन्मलेल्या पवित्र अशा रुद्राक्ष वृक्षाचे त्रिमुखी फळ व त्याची मला मिळालेली अद्भुत माहिती तुम्हाला देत आहे……..…..

💐रुद्राक्ष आणि क्यूआर कोड💐 

           रुद्राक्षाला स्पर्श केल्यावर अथवा अंगावर परिधान केल्यावर एक हजार गोमातांमध्ये असलेले पावित्र्य आपल्याला लाभते, असे उपनिषदांमध्ये नमूद केले आहे. अशा पवित्र रुद्राक्षाच्या दुर्मिळ वृक्षाची लागवड ‘मधुरांगण’ च्या विस्तीर्ण बागेत सन २००७  मध्ये करण्यात आली. चांगली देखभाल व जोपासना केल्यानंतर तेरा वर्षांनी म्हणजे २०२१ च्या जानेवारी महिन्यात या रुद्राक्ष वृक्षाला फलधारणा होऊ लागली.

              रुद्राक्षाचं फळ दिसायला जांभळासारखं आणि चवीला साधारणतः बोरासारखं असतं. पण रुद्राक्ष हे एकमात्र फळ असावं जे विषाक्त नसताना सुद्धा अजिबात खाल्लं जात नाही ! या मागे कदाचित त्याचं धार्मिक महत्व कारणीभूत असावं.

              शिवपूराणात रुद्राक्षाला शिवपार्वतीच्या प्रेमाचं प्रतिक मानलं गेलं आहे. सुश्रुत, चरकसंहीता या प्राचीन चिकित्सा ग्रंथांत रुद्राक्षातील वैद्यकीय गुणधर्मांवर विस्तारानं लिहिलं गेलं आहे. रुद्राक्षात लोह, जस्त, निकेल, मँगनीज, ऍल्युमिनियम, फॉस्फरस, कॅल्शियम, कोबाल्ट, पोटॅशियम, सोडियम, सिलिका, गंधक, अशा धातू-अधातूंचं मिश्रण आढळतं.

              गंमतीचा भाग म्हणजे ‘क्यूआर कोड’ चा फॉर्म्युला शोधताना रुद्राक्षांवरील नक्षीदार रचनेवर संशोधन केलं गेलं. या संशोधनात असं आढळलं, की मानवी फिंगरप्रिंट प्रमाणेच रुद्राक्षांवरील नक्षीदार रचना ही सुद्दा  दुसऱ्या रुद्राक्षाप्रमाणे कधीच नसते. या प्रत्येक रचनेत प्रचंड फरक आढळतो.

              स्वरूपसेवा संस्थेच्या बागेतील झाडाचे रुद्राक्ष तीन मुखी असून, त्रिमुखी रुद्राक्ष शिव-पार्वती-गणेशाचं प्रतिक आहे.                                           

                                                 ::::::::::::::::::::::::::::::::::::::