💐💐अद्भुत💐💐

           ही अद्भुत घटना आहे १९९५ मधील २१ सप्टेंबरची. त्या दिवशी कित्येक भाविकांकडून श्रीगणेशाने दूध प्राशन करून घेतले !  ऑफिसमध्ये आल्यावर याची माहिती मिळाली, तेव्हा आम्ही सारे अचंबित झालो !

                त्या दिवशी सर्वत्र या विशेष घटनेची चर्चा होऊन शहरात हलकल्लोळ माजला होता ! या  घटनेबाबत स्वतः घेतलेल्या अनुभवानंतर माझी त्या वेळेची मनस्थिती कशी झाली होती, ते मला येथे सांगावेसे वाटतेय…………

💐गणपती दूध पितो !......

                दुपारी जेवल्यानंतर पंडित बरोबर फेरी मारायला ऑफिसमधून बाहेर पडलो. माझगावच्या ताडवाडीजवळ गणपतीचे छोटे देऊळ आहे, तेथे गर्दी दिसल्यावर आम्ही सहज चौकशी केली. तेव्हा जवळचा टेलर म्हणाला, ‘ इथल्या देवळात मुर्तीच्या सोंडेजवळ दुधाचा चमचा ठेवला की त्यातले दूध आपोआप संपते ! ‘ हे ऐकून दोघेही आश्चर्याने उडालो !

                 त्या टेलरने पुढे सांगितले, ‘ अहो, मी माझ्या घरीपण हे करून बघितलेय.  माझ्या देवघरात मूर्तीने दूध लगेच प्राशन केले ! तुम्ही स्वतः हे घरी करून बघा. मात्र आजचा दिवस संपेपर्यंत, आज सूर्यास्तापूर्वी करा. ‘

                आम्ही त्याला हो, हो करीत देवळापाशी थोडावेळ थांबलो आणि पुन्हा ऑफिसमध्ये आलो.

               ऑफिसात दुसरा विषयच नाही ! तोच विषय, तीच चर्चा सुरू होती. आमचे सहकारी रोंगटे, घाडी, दहिवडकर, हे निघण्याचा आग्रह करू लागले, तेव्हा पुन्हा बाहेर निघालो. त्याच देवळाकडे आलो.

               आता ते देऊळ सगळ्या बायकांनी वेढुन टाकले होते ! बाहेर लोकांची लाईन वाढत होती. इथेच बाहेर थांबू व पाहू काय ते, असे आम्ही ठरवले व तेथे थांबलो. काहीजण चर्चेत बोलत होते, ’ अंजीर वाडीतल्या गणपतीनेदेखील दूध घेतले !’. पुन्हा सारे अचंबित झालो !

               या लाईनीत आमचा नंबर जवळ आला. रोंगटे लाईनीत पुढे होता. तो चमच्यातून गणपतीच्या सोंडेपाशी दूध सोडू लागला. ते जवळून पाहू लागलो. चमच्यातले दूध सोंडेच्या दिशेने शोषल्याचे पाहाताना डोळ्यावर विश्वास बसेना ! बाकीचे पण हे आक्रीत बघून चक्रावले ! आता सगळ्यांची खात्री पटली व तेथून परत निघालो.

               संध्याकाळी ऑफिसमधून घरी आल्यावर घरी-बाहेर याच विषयावर लोकं बोलत होती. मुंबईत ठिकठिकाणी हे घडल्याच्या बातम्या टीव्ही, रेडिओवर झळकत होत्या. बी.बी.सी. ने देखील टीव्हीवर याची बातमी दिली !

               टीव्हीवर सातच्या बातम्यांत याबद्दल व्यवस्थित बातमी पाहिली. त्यावेळी अंधश्रद्धा निर्मूलन संस्थेचे प्रमुख डॉ. नरेंद्र दाभोलकर यांनी या अद्भुत प्रकारावर टीका केली. हा सारा प्रकार बोगस असल्याचे ते म्हणाले.

                या उलट मुख्यमंत्री मनोहर जोशी पती-पत्नीनी स्वतः गणपतीची पूजा करताना या चमत्काराचा प्रत्यक्ष अनुभव घेतला व हे अद्भुत खरे असल्याचे मान्य केले ! दुसऱ्या दिवशी वर्तमानपत्रात या वृत्ताला ठळक प्रसिद्धी मिळाली होती.

               आपल्याला सुरुवातीला हा चमत्कार वाटला होता. आता मात्र कोडे वाटतेय ! अजून तरी याची समाधानकारक उकल होत नाही. वैज्ञानिक शास्त्र यावर काय म्हणतेय ते काही दिवसांनी स्पष्ट होईल. तोपर्यंत आपण जे काही अनुभवलेय ते अद्भुतच होते, असे म्हणायला हवे.

                 

                                                                :::::::::::::::::::::