💐चित्रपट गप्पा💐

💐चित्रपट गप्पा💐

       तुम्ही सईद अख्तर मिर्झा हे नाव ऐकलंय ?

          भारतीय हिंदी चित्रपट सृष्टीतील  एका जाणत्या दिग्दर्शकाचे नाव. समाजमनावर  भोवतालच्या भीषण वास्तवाचा कसा परिणाम होतो, त्याचे उत्कृष्ट चित्रण प्रेक्षकांसमोर आपल्या चिकित्सक नजरेतून मांडणारा हा कसबी कलावंत. याने दिग्दर्शन केलेल्या काही चांगल्या चित्रपटांपैकी  ‘सलीम लंगडे पे मत रो..’ हा चित्रपट तुम्ही पाहिला नसेल, तर जरूर पहा……….

💐सलीम लंगडे पे मत रो💐

 दिग्दर्शन-सईद अख्तर मिर्झा,

प्रमुख कलावंत-पवन मल्होत्रा, आशुतोष गोवारीकर, मकरंद देशपांडे, सुरेखा सिक्री, विक्रम गोखले.

         जातीय दंगलीची पार्श्वभूमी असलेला हा  हिंदी चित्रपट  संवेदनशील प्रेक्षकाला अस्वस्थ करतो.

        मुंबईतील  एक गरीब  कुटूंबाची होणारी वाताहात यात  दाखवली आहे. सलीमचा बाप रिटायर्ड माणूस आहे. पण कुटुंबासाठी तो  पुन्हा काम शोधतोय. आई गरीब स्वभावाची आहे. या घरात बहीण लग्नाची आहे. एक भाऊ वारलाय. या कुटुंबातील सलीम हा गुंड बनू पाहणारा तरुण. त्याचे दोस्तही असेच आहेत. सलीम त्यांच्या साथीने गुंडगिरी करतो. चोरी करतो. पोलिसात रेकॉर्ड असल्याने तेथे त्याला  नेहेमी हजेरी लावावी लागते !

        हे जे काही आपण करीत आहोत ते वाईट आहे. आपण आता यातून बाहेर पडायला पाहिजे, असे सलीमला वाटू लागते. तो तसा प्रयत्न सुरू करतो.

       याच वस्तीमध्ये सलीमच्या भावाचा एक दोस्त राहतोय. शांत स्वभावाचा आणि सुसंस्कृत असा हा तरुण आहे. आपल्या समाजातल्या मुलींनी आणि तरुणांनी खूप शिकायला पाहिजे अशी त्याची तळमळ आहे, तसे प्रयत्न आहेत. मात्र त्याला यामुळे  मार खावा लागतो !

         तरीही तो दोस्त सलीमच्या मागे लागून, ’ तु  चांगला शिक. आपण  खूप मागे राहिलोय शिक्षण नसल्यामुळे… ‘ असे आग्रहाने त्याला सांगतो.

        या दरम्यान, चित्रपटात एका प्रसंगात ठाणे जिल्ह्यात पूर्वी झालेल्या जातीय दंगलीचा संदर्भ असलेला  लघुपट दाखविण्यात येतो. लघुपटाची निर्मिती आहे  दुसऱ्या समाजातील तरुणाची. दंगली का होतात ?  पंधरा वीस वर्षे मेहनत घेऊन बनविलेले आपले घर स्वतःच्या डोळ्यादेखत जळून खाक होताना पाहावे लागतेय, हे दुःखाने सांगणारा एक दंगलग्रस्त आपण या लघुपटात पाहातो. अस्वस्थ होतो आपण. सलीमदेखील अस्वस्थ झालाय.

        ‘ आपल्या लोकांवर कोणी विश्वासच ठेवत नाहीत ? परके समजतात आपल्या लोकांना ? कामाला घेत नाहीत. नोकरीवर ठेवत नाहीत  ?  शिक्षणाच्या सोयी उपलब्ध नाहीत  ?  कुठे काही चांगले करायला, तसे प्रयत्न करायला संधी मिळत नाही  ? ‘

            ‘ मग कसे आपण मोठे होणार ? आपल्या लोकांना मुळी कोणी देशवासीयच मानत नाहीत !  हे का ? काय आहे आपला गुन्हा ? केवळ आपला धर्म वेगळा म्हणून ? हा आपला पण देश नव्हे ?

            आणि किती गरिबी  आहे आमच्या समाजात ? कसे जगतेय एकेक कुटुंब माहित आहे  ? का लक्षात घेत नाही  इतर लोक व त्यांचा समाज ? ‘ या सगळ्या प्रश्नांनी  हा  लघुपट  सलीमच्या आणि त्याच्या मित्राच्या  मनातील अस्वस्थता  वाढवत राहातो. ‘ समाज आपल्याला एवढा का परका मानतो, तर आपला समाज त्यांना विश्वासघातकी का  ठरवतो ?’

           अशा  परिस्थितीत वास्तवाचे चटके खात खात सलीम पुढे वाटचाल करीत आहे. पण ?

            पण अवचितपणे, एका प्रसंगात सलीम  त्याच्या मित्रांसह बेभानपणे नाचत असताना भरगर्दीमध्ये सलीमला निर्घृण पद्धतीने जीवे मारले जाते !

           समाजमनातील ‘दुभंग’ या चित्रपटात पाहायला मिळतो.  ‘सलीम लंगडे पे मत रो’  मध्ये सर्व गुणी कलावंतांनी चांगले काम केलेय. हा चित्रपट तुम्ही जरूर पहा.

                                                               ------------------------------