💐चित्रपट गप्पा💐

💐चित्रपट गप्पा💐

                 यावेळी तुमच्यासाठी सादर होत असलेले दोन्ही हिंदी चित्रपट रहस्यमय आणि उत्कंठा वाढविणारे आहेत. गुरुदत्त-राज खोसला यांचा ‘सी.आय.डी.’ आणि बासू चटर्जी यांचा ‘एक रुका हुआ फ़ैसला……...’

💐सी.आय.डी.-

निर्माता-गुरुदत्त, 

दिग्दर्शक-राज खोसला,

कॅमेरामन-व्ही.के.मूर्ती,

संगीत-ओ.पी.नय्यर,

कलावंत-गुरुदत्त, देवानंद, वहिदा रहेमान, मेहमूद, जॉनी वॉकर, टूणटूण, इ.

पार्श्वगायक-महंमद रफी, शमशाद बेगम, आशा भोसले, जॉनी वॉकर.

             

                  

               सी.आय.डी. हा जुना गाजलेला चित्रपट आहे. यामध्ये रहस्य आहे आणि उत्कंठा वाढविणारी कथा आहे, श्रवणीय अशी गाणी आहेत. चित्रपटाचे  छायांकन सुरेख झालेय. यात कॉमेडीही आहे. हा चित्रपट काहीसा मोठा आहे, पण पाहताना  कंटाळवाणा नाही वाटत. सी.आय.डी. ची स्टोरी एका पत्रकाराच्या खुनाचे कोडे आपल्या समोर मांडते  व  शेवटी ते उलगडवूनही दाखवते.

              एका प्रसिद्द वर्तमानपत्राचा प्रामाणिक संपादक शहरातील एक मोठया भ्रष्टाचारी व लबाड नेत्याचा, म्हणजे शेठ धर्मादासचा पर्दापाश करायची बातमी तयार करून छापण्याची तयारी करतो.  पण ही खबर छापण्यापूर्वीच संपादकांचा खून होतो. त्यांच्याच ऑफिसमध्ये ! हा खून होण्यापूर्वी शेठ धर्मादासच्या गुंडांचा धमकीचा फोन येतो. ही माहिती लगेच तो संपादक पोलिसांना, म्हणजे त्याच्या परिचित ऑफिसरला  फोनवरून देतो. तो ऑफिसर लगेच तेथे पोहोचतो, तर त्याला संपादकाचाच खून झाल्याचे दिसते ! मग हे प्रकरण सी.आय.डी. ऑफिसरकडे सोपविले जाते. ऑफिसर  घटनास्थळी येतो. नीट पाहाणी करतो, त्यावेळी त्याला तेथे सिगरेटचे थोटुक  मिळते. त्याचा संशय बळावतो.  तो पुन्हा पुन्हा त्या ऑफिसात येतो. त्या ठिकाणी एक भुरट्या चोराचे नियमित येणे जाणे होत असल्याचे सी.आय.डी.च्या लक्षात येते. चोरीच्या उद्देशाने  चोर तेथे जातो ही माहिती मिळते. संपादकाच्या खुनाच्या वेळी चोर  घाबरून तेथेच लपून बसलेला असतो, हे देखील सी.आय. डी.ऑफिसरला समजते. इतर तपास सुरू असतो. या घटनेत, संशयावरून एका आरोपीला पकडून कस्टडीत ठेवले जाते.

               ऑफिसर  तपास करीत असताना एकदा त्याला एका सुंदर तरुणीचा फोन येतो. ती सांगते-‘तुम्हाला खरा  गुन्हेगार हवा असेल तर, मी सांगते त्या ठिकाणी या.’  तीला पत्ता विचारल्यावर,  ‘देणार नाही’  म्हणते. ‘पण, एक गाडी तुम्हाला न्यायला येईल. त्यात बसा. मग भेट होईल.’ असे सांगते. ऑफिसर त्याप्रमाणे करतो. एका मोठ्या बंगल्यात त्याला नेण्यात येते. ती

 सुंदर युवती त्याची वाट बघत असते ! ती सी.आय.डी. चे चांगले स्वागत करते व त्याला म्हणते, ’ तुमच्या घरी एक छान पोपट आहे ना ? तो छान बोलतो म्हणे…..’ , त्याला आश्चर्य वाटते. पण तो संतापतो. त्याच्या मनी येते. ‘ हे  आपल्याला  विचारणारी ही कोण ? मात्र तो  संयम ठेऊन तीला मुख्य विषयाकडे वळायला सांगतो. तेव्हा ती सांगते,’ तुम्ही गुन्हेगार शोधण्याच्या नादी नका लागू. हे प्रकरण बंद करा……’ , तो भडकतो  व  तेथून निघतो.

                 दरम्यान या तपासातून त्याला कळते, की ती सुंदर युवती डी, एस.पी. ची मुलगी आहे !  तीच्या वाढदिवस समारंभात सी.आय.डी.ऑफिसरला आमंत्रण असते. त्याठिकाणी तो उपस्थित राहातो. तेथे, अगोदर एका पाठलागाच्या घटनेत त्याने पाहिलेली दुसरी एक संशयित तरुणी त्याला दिसते. त्या दोघी एकमेकींच्या मैत्रिणी आहेत. तो चक्रावतो !  मात्र ऑफिसरची आपल्याकडे नजर असल्याचे तीच्या ध्यानात येते आणि  ती तेथून कशीबशी पळ काढते.

                  या साऱ्या घडामोडी होत असताना पोलीस कस्टडीतल्या आरोपीला पोलीसी खाक्या दाखवून , खऱ्या गुन्हेगाराचे नाव मिळविण्याचे प्रयत्न करीत राहातो. पण यश येत नाही. दुसरीकडे, यात गुंतलेली टोळी सी. आय.डी. ऑफिसर पटणार नाही याची खात्री पटल्यावर, चक्क पोलीस कोठडीत दोन गुंडांकरवी भांडणं घडवून आणते आणि तेथे असलेल्या आरोपीला बेदम मारून  ठार केले जाते !

                  आरोपीच्या खुनाचा आरोप सी.आय.डी. ऑफिसरवर टाकला जातो ! कारण, त्याने आरोपीला चौकशी दरम्यान मारहाण केल्याचा आरोप काही कैदी करतात. मग, हे प्रकरण येते कोर्टात ! कोर्टात सवाल-जबाब होतात. सुनावणीअंती सी.आय.डी.ऑफिसर दोषी आढळतो. त्याला शिक्षा सूनावण्याची वेळ येते.  तेवढ्यात, सी.आय.डी. ऑफिसर भुरट्या चोराच्या सांगण्यावरुन खऱ्या गुन्हेगाराला पकडण्यासाठी तेथून सटकतो ! शोध-तपास करताना सी.आय.डी. ला  टोळीतल्या तरुण मुलीची मदत होते.  ती अनाथ आहे. या टोळीत तीच्यावर जबरदस्तीने कामे सोपविली जातात. या दोघांत आता  मैत्री होते. पुढे खरा गुन्हेगार कोण याची खात्री पटल्यावर तो ऑफिसर स्वतः पोलिसांच्या हवाली होतो. डी.एस. पी. साहेबाला सगळी वास्तव परिस्थिती कथन करतो.

                    त्यानंतर, नीट प्लॅन करून खरा गुन्हेगार धर्मादास याला, तो हॉस्पिटलमध्ये त्या तरुणीला बघायला येतो तेव्हा पकडले जाते,. शेवटी सी.आय.डी. ऑफिसरचे निरपराधीत्व सिद्द होते.

                    सी.आय.डी. ची कथा उत्कंठावर्धक, रहस्य वाढविणारी आहे. यात साऱ्या कलावंतांनी छान काम केलेय. या चित्रपटातील, ‘यह दिल है जो मुश्किल ये जीना यहा,……..यह बंबई मेरी जान…….’  हे जॉनी वॉकरचे प्रसिद्द गाणे श्रवणीय आहे.

                                                    --------------------------------------  

 💐एक रुका हुआ फ़ैसला-

 दिग्दर्शन-बासू चटर्जी.

कलावंत-अन्नू कपूर, पंकज कपूर, रंजित कपूर, रैना बंधू, इ.

                   

                      एका परदेशी चित्रपटाची ही कथा आहे. त्याचे नाव-  ' Twelve angree men'. हा  चित्रपट छान जमलाय. स्टोरी उत्कंठावर्धक आहे. ती प्रेक्षकाला खिळवते शेवटपर्यंत ! मात्र मनोरंजनाच्या अपेक्षेने हा चित्रपट पाहायला जाणारा माणूस खट्टू होईल. कारण, यात एकही  गाणे नाही. वेगवेगळे लोकेशन्स असलेले सीन्स नाहीत, की इतर मनोरंजन नाही. आणखी एक विशेष म्हणजे कोणालाही  ‘नाव’  दिलेले नाही !

                     एका कोर्ट खटल्यात आरोपीला अंतीम शिक्षा देण्यासाठी कोर्टाने नेमलेल्या ज्युरी/तज्ञ मंडळींच्या ग्रुपला तातडीने मिटिंग घेऊन एकमुखी निर्णय घ्यायचा असतो.  त्या निर्णयानुसार कोर्ट आरोपीला शिक्षा सूनावणार असते. त्याप्रमाणे एका बंदिस्त खोलीमध्ये मिटिंग सुरू होते.  येथून एकालाही बाहेर पडायला परवानगी नसते निर्णय घेतल्याशिवाय !

                     मिटिंगमध्ये जवळपास सगळे वकील व कायदेतज्ञ असतात. मात्र तापट स्वभावाच्या काहीजणांमुळे बऱ्याच वेळा त्यांच्यात भांडणे होतात. अगदी हमरीतुमरीवर येण्याइतके सगळे  भांडतात !

                   आरोपीच्या हातून एक वयोवृद्ध  माणसाचा खून झालाय. एकूण बाराजणांपैकी अकरा ज्युरी, आरोपी कसुरदार असल्याचे ठामपणे सांगतात. मात्र एकजण म्हणतो-‘ आरोपी बेकसुर आहे !’.’ पण कशावरून ?’  यावर याचेकडे  कारण नसते. पण तो म्हणतो- 'तुम्ही तरी कसे पटकन त्याला गुन्हेगार ठरवता ?  त्याने खून केलाय ? म्हणून ? नीट विचार करा आणि मग बोला ना ' , यावर बराच उहापोह होत राहतो. तो एकटाच काही मुद्दे मांडून, खुनी कसा निरपराध आहे सांगू पाहतो.

                   हळूहळू एकएकजण त्याच्या मताला अनुसरून त्याच्या बाजूचे होतात. एकूण बारा पैकी एक, अशी विरोधी स्थिती असताना, आठ विरुद्द चार, असे होत होत शेवटी अकराजण, आरोपीला बेकसुर ठरवतात.   एक ज्युरी, आरोपी कसुरदार आहे असे म्हणतो. पण सुरुवातीपासून आरोपीची बाजू लावून धरणारा वकील असे काही मुद्दे त्याला सांगतो, की अखेर त्यालाही मान्य करावे लागते, की आरोपी बेकसुर आहे म्हणून ! या निर्णयानंतर मिटिंग संपते आणि चित्रपटही संपतो !

                 या चित्रपटाचा विषय वेधक आहे. प्रेक्षकांची  उत्कंठा शेवटपर्यंत वाढविणारा आहे. प्रत्येकाने अगदी झटून काम केलेय. साऱ्यांचाच अभिनय दमदार झालाय. सगळेजण खरेखुरे भांडतात. यांचा तापटपणादेखील जोरदार आहे. रंजित कपूर हा एकमेव वकील आपल्या कौशल्याने मुद्दे पटवून देत, शांतपणे, संयमाने, परंतु ठामपणे एकेकाला समजावीत, आरोपी निरपराध असल्याचे साऱ्यांना  मान्य करायला लावतो.

                  आरोपी एका गरीब कुटुंबातला आहे. गरीब वस्तीतला आहे म्हणून तो गुन्हेगारच असणार, ही समाजदृष्टी असते. पण कोणी खोलवर जाऊ बघत नाही.  थेट तसा शिक्काच मारतात.   हे योग्य नाही. या चुकीच्या अनुमानामुळे एक निरपराध माणसाला फाशी दिली जाणार असते. तेव्हा गंभीर होऊन आरोपीला योग्य न्याय द्यायला हवा, ते हा चित्रपट आपल्याला सांगतो.  आज हा चित्रपट जुन्या विषयाचा असला तरी अस्वस्थ करणारा आहे.

                                                ----------------------------------------------