💐 लक्षवेधी💐

💐 लक्षवेधी💐
             
                दूरवर हिमालयात,अवघड रस्ते आणि घाटीमध्ये आपली जुन्या जमान्यातली स्कुटर घेऊन भटकणारा एक कलंदर स्कुल टीचर आपल्या भारतात आहे. मुंबईत, एका कार्यक्रमाच्या  निमित्ताने हा हसतमुख टीचर आपल्या या आगळ्या हौसेविषयी संवाद साधण्यासाठी आला अन त्याने मला प्रभावीत केले.
                 या लक्षवेधीचा मजेदार परिचय......

💐स्कुटर स्वार मास्तरजी..
                 राजधानी दिल्लीमध्ये एक प्राथमिक शाळा आहे. तेथे हा मनस्वी स्कुल टीचर मुलांना शिकवितो.  या टीचरने आपल्या स्कुटरवरून कितीतरी अवघड
आणि उत्तुंग हिमालयीन रस्त्यांची आनंदी सफर केलीय. याचे नाव आहे तरुणकुमार गौतम. वयाने तरुण आणि हसतमुख चेहेऱ्याची ही वल्ली आपले सफर विक्रम एका कार्यक्रमात सादर करीत होती.
                ' मास्तरजी ' या टोपण नावाने हा प्रसिद्द आहे शाळेत. वर्षभर हा फिरत असतो ! याचे एकमेव वाहन म्हणजे बजाजची ब्राव्हो स्कुटर. तीही अठरा-एकोणीस वर्षांची जुनी स्कुटर आहे ! आपल्या ब्राव्होवरून खडतर प्रवास करीत तो स्थानिक लोकांशी संवाद साधतो. त्यांचेशी मित्रत्वाचे नाते निर्माण करून हा मास्तरजी आपली सफर पुढे पुढे नेत आहे. हिमालयात असलेला जगातला सर्वात उंचावरील पेट्रोल पंप, सर्वात उंच असा मोटरेबल रोड, सीमा प्रदेशातील अती दुर्गम कच्चे  रस्ते व घाटी, नाले  या मास्तरजीने जीवघेण्या थंडीवाऱ्यातून यशस्वीपणे पार केले आहेत ! त्याने सादर केलेल्या स्लाइड्स पाहताना थरारक वाटते.
                  वास्तविक उंचावर असा दुचाकीने प्रवास करताना पेट्रोल इंधनाची मोठी समस्या असते. मात्र मास्तरजी हुशार आहे. बरोबर नियोजन करून सर्व परिसराची नीट माहिती घेऊन, उपलब्ध साठ्याचा अत्यंत काटकसरीने वापर करीत हा मार्गक्रमण करतो. ब्राव्हो बिघडते तेव्हा काय करता ? या प्रश्नावर त्याचे चटकन उत्तर येते.' मला ती काळजी अगोदरच घ्यावी लागते. दुरुस्ती-देखभालीची जुजबी माहिती आहे. अगदीच पर्याय नसला की, वाट पाहातो कुणी मदतीला येतेय का, त्यासाठी. सुदैवाने सीमा भागातील फौजी दोस्त व त्यांचे ट्रक, वाहने स्वतःहून पुढे येतात. मदतीचा हात देतात. कधी त्यांच्या वाहनातून माझ्या ब्राव्होसह पुढचा प्रवास होतो !’
                      हा काही श्रीमंत फिरस्ता नाही. याचे कुटुंब आहे. ते त्याच्या छंदाआड येत नाहीत. कारण हा दिल्लीत असताना त्यांना फिरण्यासाठी नोकरी सांभाळून वेळ देतो. मास्तरजी उच्च शिक्षित शिक्षक आहे. पण आपल्या या छंदापायी प्राथमिक शिक्षकाचा पेशा त्याने पत्करलाय ! ' मोठ्या मुलांपेक्षा लहान मुले शिकवायला बरी ! ' असे हा हसत सांगतो. मास्तरजीच्या या साहसी सफरीत अजूनपर्यंत मोठी आपत्ती आलेली नाहीये. उलट याचे जागोजागी कौतुक होतेय.
                      हा मास्तरजी पुढचे साहसी बेत आखीत आहे. मात्र जगभर आपल्या दुचाकी वाहनांची पताका मिरवणाऱ्या बजाज कंपनीला या मास्तरजीची दखल अजून का बरे घ्यावीशी वाटली नाही ? याचे मला कोडे वाटतेय.
                     या मास्तरजीच्या पुढील सर्व सफरीसाठी माझ्या मनापासून शुभेच्छाआहेत.....

                                                       :::::::::::::::::::::::::::::::::::
💐आणि क्षमस्व💐

                     गेल्या महिन्यात ' चला कोकणात ' मध्ये टाकलेल्या ' कोकण कोड्यात, प्रश्न क्र. २  असा हवा होता--प्रसिद्द कवी केशवसुत यांचे गांव कोणते ?
                     या चुकीबद्दल क्षमस्व.