💐भटकंती मनसोक्त💐

💐भटकंती मनसोक्त💐

💐सोलो भटकंती............

                    वाढदिवस जवळ आला की खुप टेन्शन येते. इतरांसारखा आपणही वाढदिवस साजरा करावा, किंवा तो आप्तांच्या अन दोस्तांच्या सानिध्यात साजरा करावा असे नाही वाटत. उलट, या शहरी गर्दीच्या कोलाहलातून थोडे बाहेर यावे व मुक्तपणे कोठेतरी एकटेच जाऊन, ट्रेक करून स्वच्छंदपणे भटकून यावे, असे मनापासून वाटते.

                    माझ्या आठवणीतील असे दोन वाढदिवस सोलो भटकंती करून मी साजरे केलेत. एक रसायनी-कर्जतजवळील माणिकगड, अन दुसरा पेण-शिरढोणजवळचा साक्षीचा किल्ला. 

                   माणिकगडसाठी कर्जतहुन चौक मार्गे रसायनी कारखाना परिसरापलीकडे असलेल्या गावातून वाट जाते. वस्ती संपल्यावर कडेकडेने दिसणाऱ्या लाल हिरव्या निमुळत्या पायवाटेवरून गडाच्या दिशेने नुसते चालत राहायचं ! मग पुढे डावीकडे छोटे वळण लागले की, एक चढण दिसते ती चढायला सुरुवात करायची. दाट झाडी नसली तरी झाडझुडुपे आहेत. त्यातून पुढे चालत चढत गडाचा माथा गाठायचा.

                   या माणिकगडावर गावकरी अथवा भटके ट्रेकर्स सहसा जात येत नाहीत. कारण तेथे फारसे अवशेष वगैरे नाहीत. मात्र त्यामुळे आपण एकट्याने गडावर हवे तिथे भटकू शकतो. माणिकगडच्या माथ्यावरून दूरवरचा चारही दिशेकडील आसमंत दिसतो. इथून खाली दिसणारी पिटुकली गावं, टुमदार पण बारकाली कौलारू घरं आणि भवतालची शेतहिरवाई मनाला भुरळ पाडते. या सुंदर निसर्ग दृश्यांचे आपण एकमेव साक्षीदार आहोत याचा मनोमन आनंद आपल्या वाढदिवशी अनुभवायला मिळणे हे भाग्य नव्हे काय ?

               पेणजवळच्या साक्षीदुर्गाची आठवण अशीच आहे. एका वाढदिवशी ठरवून सकाळीच तिकडे निघालो. मुंबई-गोवा हायवेवर कर्नाळा खिंडी नंतर शिरढोण, तारा, ही गावे लागतात. त्यापुढे चुनाभट्टी गावानंतर एक पूल दिसतो. तो पार केल्यावर बलवल्ली गावची पाटी दिसते. तिथे खाली उतरून सरळ चालू लागायचे. शांत आणि गर्द वेली झाडांमधून जाणाऱ्या या वाटेने चालत राहिल्यावर काही वेळाने एक दर्गा लागतो. बदरुद्दीन बाबाचा हा दर्गा तेथल्या पंचक्रोशीत प्रसिद्द आहे. वार्षिक उरुसाला येथे खूप वर्दळ असते. एरव्ही मात्र एकाकी निर्मन्युष्य असा हा परिसर आहे.

               आता उजवीकडे डोंगरकडा दिसू लागतो. जवळ गेल्यावर सरळसोट उंच चढण दिसते ती चढू लागायचे. दिसते कठीण, पण विशेष श्रम नाहीत. आता फारतर अर्ध्या तासात आपण गडाचा माथा आठवू शकू. माथ्या पूर्वी उजवीकडे छोटे छानसे पाण्याचे भुयारी टाकं आहे. इथं पिण्यायोग्य पाणी आहे.

                   साक्षी दुर्गावर पोहोचल्यावर खुप प्रसन्न वाटते. सभोवतालचा आसमंत दुरदूरवर दिसतो. या दुर्गाचा माथा फारसा मोठा नसला तरी अगदी लहान देखील नाही. वर मोठे आणि प्रशस्त असे आयताकृती आकाराचे दोन खंदक आहेत. ते कोरडे आणि स्वच्छ आहेत. त्याची उंची असावी अठरा वीस फुटांची. खंदकात उतरायला निमुळत्या आकाराच्या पायऱ्या आहेत. आत उभे राहून वरचे निळेभोर आकाश बघणे हा एक वेगळाच अनुभव आहे. मागे एकदा आम्ही ग्रुपने आलो होतो, तेव्हा या खंदकात चांदण्या रात्री मुक्काम केल्याचेही आठवतेय. अशा या मनोहर साक्षीदुर्गावरून चहूकडे फिरून दूरवरचा परिसर न्याहाळताना, एका दिशेकडील खोलवर दिसणारी दरी पाहाताना काही क्षण भय वाटते.

                  ' त्या ' वाढदिवशी साक्षीदुर्गावर एकांती बसलो असताना मी धीर अन गंभीर झालो होतो. परंतु, आपण एकट्याने एवढ्या सुंदर अशा अफाट व निळाशार आकाशमयी सौंदर्याचा आस्वाद घेत आहोत, हे क्षण किती भाग्याचे  आहेत, नाही का ? आपल्या वाढदिवशी यापेक्षा वेगळी भेट हवीय कशाला ?

                                                ..........................