💐💐चला कोकणात💐💐

                    कोकणात येण्याचे आमंत्रण देताना यापूर्वी वेगवेगळ्या स्थळ परिसराचा अल्पस्वल्प परिचय सफरप्रेमींना करून दिलेला आहे. यावेळी आपण सिंधुदुर्ग जिल्ह्यात थोडे फिरुया.

                     सिंधुदुर्ग जिल्हा खारेपाटण व आडिवरे-जैतापूर पासून सुरु होऊन थेट गोवा राज्याच्या सीमेला भिडतो. वैभववाडी, देवगड, कणकवली, मालवण, कुडाळ व सावंतवाडी ही प्रमूख शहरे या जिल्ह्यामध्ये आहेत. डोंगर-दऱ्या आणि हिरवाईने घेरलेल्या घनदाट जंगलांनी समृद्ध असलेला ऐतिहासिक महत्वाचा असा सिंधुदूर्ग जिल्हा आहे……….

💐कुडाळ💐

                     सिंधुदूर्ग जिल्ह्यात कुडाळ हे मध्यवर्ती शहर असून ते वाहतुकीच्या दृष्टीने सोयीचे ठिकाण आहे. कोकण रेल्वेमार्गावर धावणाऱ्या बहुतेक रेल्वेगाड्या कुडाळला थांबतात. गोवा राष्ट्रीय महामार्गदेखील येथून जवळ आहे. चिपी विमानतळ कुडाळपासुन फार लांब नाही.

              कुडाळ येथून संपूर्ण सिंधुदूर्ग जिल्ह्यात फिरताना वाटेत लागणारे दुर्गम घाट, नदी, प्रदूषण मुक्त शांत समुद्र किनारे न्याहाळता येतात. कोकणी मेवा, घावणे, आंबोळ्या, कटवडा आणि ताजी मासळी, किंवा सागोती वडे-मटणावर ताव मारता येतो. थंडगार कोकम सरबत, आंबापन्हे यांची चव चाखता येते.

                   मात्र ही सफर करण्यापूर्वी नियोजन करणे आवश्यक आहे. कुडाळ हे ‘मुक्कामी’ ठिकाण ठेऊन तीन ते चार दिवसात सारी ठिकाणे पाहता येतात. पहिला दिवस जिल्ह्याचा उत्तर भाग, दुसऱ्या दिवशी मध्यवर्ती भाग व तिसऱ्या दिवशी दक्षिण सीमेकडील भाग अशी तीन दिवसांची सफर स्वतंत्र वाहनातून करताना आपला वेळ वाचतो व आरामदायी प्रवासही होतो.

                    उत्तर भाग - पहिल्या दिवशी वाघोटण खाडीजवळचा शिवपुर्वकालीन विजयदुर्ग, गीरये बीच, पेशवेकालीन श्रीरामेश्वर मंदिर, देवगड-पवन चक्की, श्रीकुणकेश्वर शिवमंदीर, पोखरबावचे गणेश मंदिर, अशी सुंदर स्थळे बघुन परतीच्या प्रवासात आचरा येथील श्रीरामेश्वर व इतर प्राचीन मंदिरांचे दर्शन घेता येते.

                   मध्य भाग – दुसऱ्या दिवशी मालवण बंदर, श्री शिवछत्रपतींनी बांधलेला सिंधुदुर्ग, देवबाग, वायरी, तारकर्ली, सर्जेकोट, चिवले आणि जवळपासचे समुद्र किनारे, रॉक गार्डन, कणकवलीच्या श्रीभालचंद्र महाराजांचा मठ, आंगणेवाडीची भराडी देवी, मेढ्याचा श्रीगणेश, यांचे दर्शन घेता येते. कुडाळला परत येताना धामापूरचे विस्तीर्ण जलाशय व श्रीभगवती देवीचे मंदीर पाहता येते.

                  दक्षिण भाग –तिसऱ्या दिवशी सावंतवाडी, वेंगुर्ला व शिरोडा या भागात फिरताना माणगाव, आकेरी, आंबोली घाट, हिरण्यकेशी नदीचे उगमस्थान, दानोलीचे मत्स्यालय, साटम महाराज मठ, सावंतवाडीचे वैभव असलेला मोती तलाव, इतिहासकालीन राजवाडा, लाकडी खेळण्यांची बाजारपेठ, शिरोडा येथील श्रीमाऊली मंदीर, खाणी गणपती, सागरेश्वर, वेंगुर्ले बंदर, अशा विविध ठिकाणी फिरता येते.

                   तीन दिवसानंतर कुडाळ शहरातील ग्रामदैवत श्रीकुडाळेश्र्वर, केळबाई व श्रीभैरवनाथाचे देवालय, काविलकाट्याचे भारतातील पहिले श्रीसाई मंदीर, सोनवड्या नजीकचे सरसोलीधाम, नेरूर येथील वसुंधरा विज्ञान केंद्र, अशा महत्त्वाच्या वास्तूंचे दर्शन घेता येते .

                       याशिवाय, कुडाळ येथे दर बुधवारी भरणारी बाजारपेठ बघण्यासारखी आहे. यांतून एक दोन दिवस वेळ मिळाला, तर लगतच्या गोव्यामध्ये एक दिवसाची मुक्कामी सफर करून कुडाळला निवांत परतता येते.

                   तेव्हा कोकण प्रेमींनो, अवश्य या आणि सफर करा सिंधुदूर्ग जिल्ह्यात !

                                                      ::::::::::::::::::::::::::