💐💐चित्रपट गप्पा💐💐

                  मुंबईतील चव्हाण सेंटरमध्ये २००९ साली अर्जेंटिनाचा फिल्म फेस्टिव्हल सुरू होता. तेथे ‘जाएन्ट्स ऑफ वॅल्ड्स’ हा चित्रपट पाहायला मिळाला. आपल्याला निसर्ग, प्राणी-पक्षी आणि निर्मळ पर्यावरण हवेय, की नुसते पैशाच्या मागे धावून आपण जगण्याचा सारा ताळमेळ बिघडवून टाकणार आहोत ? हा सवाल करीत प्रेक्षकाला विचार करायला लावणारी ही छोटीशी चित्रकथा आहे………..

💐जाएन्ट्स ऑफ वॅल्ड्स (Giants of Valdes)-२००८,

दिग्दर्शक-अलेक्स टॉसन बर्गर, प्रमुख भूमिका-फेडरिको डेल्ला व मायग्वेल डेडोविच.

 

                  या चित्रपटात दोन नायक आहेत. एक थॉमस व दुसरा ज्योस. थॉमसला वॅल्ड्स (पेनिनसुला) या पेंटोगोनियाच्या प्रांतातील एका समुद किनाऱ्यावर पाठविले जाते. एका हॉटेल कंपनीला या परिसरात छानसे हॉटेल उभारायचे आहे. थॉमस त्या कंपनीचा माणूस आहे.

                  स्थानिकांची पर्वा न करता, पर्यावरणाचा विचार न करता कंपनी कामाच्या पूर्वतयारीस लागते. त्यासाठी सर्व्हेचे काम आणि चाचपणी सुरू होते. कंपनीने नियुक्त केलेल्या थॉमसचे तेथे येणे-जाणे सुरू होते.

                 या समुद्रात व्हेल या महाकाय देवमाशांचा नियमित वावर आहे. याशिवाय पेंग्विन व  इतर जलचर प्राणी-पक्षी  मुक्तपणे किनाऱ्यावर वावरत आहेत. थॉमस हे सुंदर वातावरण बघून हरकून जातो.  मात्र  स्थानिक लोक त्याचा मुख्य हेतू माहीत झाल्याने थॉमस पासून लांब राहातात.

                 येथे एक समुद्रवेडा वृध्द राहातो. त्याचे नाव आहे ज्योस. थॉमस ज्योसचा परिचय करून घेतो. ज्योसला सुद्दा थॉमस हॉटेल कंपनीचा माणूस असल्याचे ठाऊक आहे. त्यामुळे तोही फटकून वागतो थॉमसशी. पण थॉमस त्याच्याशी संपर्क करीत राहातो आणि ओळख वाढवतो. थॉमसच्या घरी जातो. हळूहळू दोघांमध्ये मोकळेपणाने संवाद होतात.

                 थॉमसचे निसर्गप्रेम सच्चे असल्याची ज्योसला खात्री पटते. मग सुरुवातीला फटकून वागणारा ज्योस एकदा व्हेल मासे दाखविण्यासाठी थॉमसला बोटीतून भर समुद्रात घेऊन जातो. ते फिशिंग देखील करतात.

                 कंपनीच्या कामाऐवजी व्हेल मासे दाखविणाऱ्या ज्योस मध्ये गुंग झालेल्या थॉमसच्या पाळतीवर कंपनीने स्थानिक प्रतिनिधी ठेवलेले आहेत. त्यांच्यामार्फत ही माहिती कंपनीकडे पोहोचते. कंपनीचे अधिकारी सावध होतात.  त्यांच्यासाठी हॉटेल व्यवसाय महत्वाचा आहे. यातून कंपनीच्या माणसांची कारस्थाने सुरू होतात. तेथील सारे वातावरण बिघडून जाते. स्थानिकांना त्रास देण्याच्या घटना घडतात.

                  या कट कारस्थानाचा भाग म्हणून लवकरच होणाऱ्या एका अपघाताची पूर्व सूचना ज्योसला मिळते. तो अस्वस्थ होतो. थॉमसला वाचवायला तो बोटीवर जातो. मात्र त्याला वाचविण्याच्या नादात ज्योस वरून खाली कोसळतो आणि मरतो !

                   सगळे दुःखी होतात. कंपनीच्या माणसांबरोबर मोठे वाद घडतात. पण वेळ निघून गेलेली असते. इथे चित्रपट संपतो.                  

                 महत्वाच्या विषयावरील हा चित्रपट शेवटी अंतर्मुख करतो. या चित्रपटात समुद्र किनारा व भोवतालच्या वातावरणाची दृश्ये प्रभावी आहेत. समुद्रतळ, मुक्तपणे फिरणारे भले मोठे व्हेलमासे, समुद्रातील प्राणी-पक्षी, या साऱ्यांचे सुंदर चित्रण मनाला भावते. चित्रपटातील सर्व कलावंतांनीही चांगले काम केलेय.

 

                                                                  :::::::::::::::::::::::::::::