💐💐चित्रपट गप्पा💐💐

                 चित्रपट सृष्टीतील काही  मान्यवरांनी  चित्रपट व प्रेक्षक  यांना एकत्र आणून त्यातून ‘जाणकार प्रेक्षक’ घडविण्याचा ध्यास घेणारी ‘प्रभात चित्र मंडळ’ ही संस्था पंचावन्न वर्षांपूर्वी स्थापित केली. आज महाराष्ट्रात ही एक  प्रतिथयश संस्था म्हणून गणली जाते.

                 चित्रपट रसिकांची चळवळ निर्धाराने पुढे नेणाऱ्या ‘ प्रभात ‘ चा चार जुलै हा वर्धापन दिन आहे. या  निमित्ताने संस्थेला पुढील वाटचालीसाठी शुभेच्छा देताना मला इथे आवर्जून सांगावेसे वाटते की,  या संस्थेमुळेच  मला जगभरातले चांगले चित्रपट बघायला मिळाले.  प्रभात आयोजित फिल्म फे्टिव्हलमध्ये गाजलेले चित्रपट सेलिब्रिटींच्या उपस्थितीत मी अनेकदा पाहिलेत. प्रादेशिक-विदेशी चित्रपट, मूकपट, लघुपट, माहितीपट पाहणे व त्यांवर मान्यवरांच्या  झालेल्या चर्चा-परिसंवाद प्रत्यक्ष अनुभवण्याची संधी मिळणे हे माझे भाग्य होते.

                 प्रभातने १९९३ मध्ये इतर संस्थांसमवेत मुंबईमध्ये  इटालीच्या चित्रपटांचा एक फेस्टीव्हल आयोजित केला होता. जवळपास १४ चित्रपट त्यात दाखविले गेले.

                 मी या फेस्टीव्हलमध्ये विटॉरिओ डी सिका या जगप्रसिद्ध अभिनेता-दिग्दर्शकाचे  पाच चित्रपट पाहिले- चिल्ड्रेन आर वॉचींग अस, शु शाईन, यस्टर्डे, टुडे अँड टुमारो, मॅरेज : इटालीयन स्टाईल, आणि गार्डन ऑफ फिंझो कंटीन्यू. यातल्या काही चित्रपटांना ऑस्कर मिळालेय.

               वेगवेगळया विषयांवरील हे पाच चित्रपट मला भावले.  त्यापैकी एका चित्रपटाचे कथानक  व त्याविषयीचे माझे मत येथे कथन करीत आहे……………...

💐शु शाईन💐

*इटालीयन फिल्म (१९४६), दिग्दर्शक विटॉरिओ डी सिका.

                बूट पॉलिश करणाऱ्या दोन गरीब मुलांचे भाबडे स्वप्न कसे धुळीस मिळते ते  ‘शु शाईन’ मध्ये दिग्दर्शकाने  छान चित्रित केलेय. आपला स्वतःचा एक घोडा असावा, या स्वप्नाचा ध्यास घेतलेली दोन मुलं पैशांची जमवाजमव सुरू करतात. या प्रयत्नात ते एका चोरट्यांच्या टोळीशी संपर्क साधून त्यांना मदतही करतात. मात्र  एकदा सारे पकडले जातात.

                या दोघांना अटकेनंतर सुधारगृहात ठेवले जाते. तेथे सगळी गैरव्यवस्था आहे. दोघांना तेथे वेगळ्या ठिकाणी ठेवले जाते. फक्त अधून मधून त्यांची भेट घडते.

                या दोघांपैकी एक मुलगा घोडा मिळविण्याच्या हेतूने परस्पर सुधारगृहातल्या दुसऱ्या मुलांची मदत घ्यायचे ठरवतो. सुधारगृहामध्ये एकदा चित्रपट दाखविण्याचा कार्यक्रम असतो. ही संधी साधून तो त्या नवीन मित्रांसह सुधारगृहातून पळ काढतो. मात्र त्याचे प्रयत्न फसतात व त्यांना पकडले जाते. या प्रसंगातही अधिकाऱ्यांना चकवून  ते  सुधारगृहातून  निसटतात !

                   पुढे  ते एका घोडेवाल्याकडे जातात. त्याचा घोडा घेऊन निघतात.  सुधारगृहातील अधिकारी त्यांच्या शोधार्थ फिरताना त्या ठिकाणी येतात. दुसरा मुलगा अधिकाऱ्यांसोबत  असतो.  तो आपल्या मित्राचा शोध घेऊ लागतो. मित्राला घोड्यावर बसून जाताना पाहिल्यावर हा लगेच त्याचा पाठलाग करतो व त्याला गाठतो. दोघांची झटापट होते. बाकीचे घाबरून पळ काढतात.

                   हा मित्राला पट्ट्याने झोडतो. कारण त्याच्या कागाळीमुळे याला पट्ट्याचा मार अधिकाऱ्यांनी  पूर्वी दिलेला असतो. या धांदलीत मार खाणारा मित्र छोट्या पुलाच्या कठड्यावरुन खाली कोसळतो आणि मरतो ! तेव्हा हा मुलगा भानावर येतो. मित्राच्या मृत शरीरावर पडून तो ओक्साबोक्षी रडतो.

                   गरिबीत वाढणाऱ्या मुलांची भरकटलेली मनस्थिती व त्यामुळे त्यांचे आयुष्यभराचे होणारे  नुकसान पाहून आपले मन व्यथित होते.

                  ‘शु शाईन’ मधील दोन मुलांनी चांगला अभिनय केलाय. चित्रपटात मोजके पण महत्वाचे प्रसंग चित्रित केले असल्यामुळे तो कंटाळवाणा होत नाही.

                   या चित्रपटाला १९४८ साली विशेष परदेशी चित्रपटाचा ऑस्कर सन्मान  मिळाला आहे.

 

                                                         ::::::::::::::::::::::::::