💐💐धार्मिक पण मार्मिक💐💐

                     आयुष्याला योग्य दिशा दाखवून आपले ज्ञान वाढविणारी कोणीही व्यक्ती आपला गुरूच असते. मात्र  गुरूने दिलेले ज्ञान आपण नम्र भावनेने आणि श्रध्दापूर्वक आत्मसात करून योग्य दिशेने पुढे व्हायचे असते.                            

                     आपल्याला ज्ञानदान करणाऱ्या देवतुल्य गुरुवर्यांचे ऋण व्यक्त करण्याचा शुभ दिवस म्हणजे गुरू पौर्णिमा. या दिवशी अनेक ठिकाणी गुरूंना वंदन करण्याचे सोहोळे वेगवेगळ्या पद्धतीने व उत्साहात साजरे होतात. या दिवशी गुरूंचे दर्शन घेऊन त्यांना नमस्कार केल्यावर शिष्यगण धन्य होतात. गुरूंनाही आंतरिक समाधान मिळते. ते कृपावंत होऊन शिष्याला शुभाशीर्वाद देतात.

                    हा नमस्कार आयुष्यात किती महत्त्वाचा असतो, याविषयी लोणावळा येथील प्रसिध्द मनशक्ती केंद्राने एक प्रबोधनपर कार्यक्रम आयोजित केला होता, त्याची याक्षणी मला आठवण होतेय…………...

💐नमो नमः💐                          

                    नमस्कार लहानांनी मोठ्यांना करावा ही भारतीय संस्कृतीची एक चांगली परंपरा आहे.  मुलांनी आई-वडिलांना त्याचप्रमाणे ज्येष्ठांना नेहेमी नमस्कार करायला हवा, हे विज्ञानाचा आधार घेऊन सांगण्याचे सत्कार्य   मनशक्ती केंद्र करते. 

                    प्रत्येकाकडे स्वतःची शक्ती असते. जिचे केंद्र असते आपल्या मेंदूपाशी. पण ह्रदयाकडून या केंद्राला  रक्ताभिसरणाचा नीट पुरवठा होणे आवश्यक असते. आपल्या शरीरातील महत्त्वाची सहा अंग ही ती शक्ती केंद्र आहेत. त्याद्वारे  निर्माण होणारी ऊर्जा म्हणजेच प्रत्येकाची शक्ती. पण तिचा योग्यरीत्या वापर व्हायला हवा.

                    नमस्काराची योग्य पद्धत कोणती ? तर नीट वाकून शरीर झुकविणे व मोठ्या व्यक्तीला हात जोडून  पाया पडणे. यावेळी शरीर नव्वद अंशाच्या कोनात येते, म्हणजेच ह्रदयाकडील रक्त शक्तीकेंद्राच्या दिशेने म्हणजेच मेंदूकडे जाते. त्यावेळी शरीरात ऊर्जा वाढते आणि शक्ती निर्माण होते.

                    नमस्कारानंतर मोठी व्यक्ती आशीर्वाद देताना जो हात पुढे करते, त्या हातातील शक्ती  समोर झुकलेल्या व्यक्तीच्या शरीरात आशीर्वाद रूपाने जाते. हा नमस्काराचा मोठा लाभ असतो. मनशक्ती केंद्राने दिलेले  हे  बहुमोल ज्ञान मला दैनंदिन जीवनात आजही उपयोगी ठरत आहे.

                    या ज्ञानमयी संस्थेला माझा मनोमन नमस्कार आहे.

 

                                                                   :::::::::::::::