💐💐सुंदर माझं घर💐💐

                   प्रत्येक नवदाम्पत्य  आपल्या आयुष्यभराच्या जोडीदारासमवेत संसाराची सुखस्वप्ने पाहत असते. ही स्वप्ने प्रत्यक्षात आणण्याची जबाबदारी अर्थात त्या दोघांची असते.  लग्न समारंभात मुलामुलींचे आईवडील आपल्या लेकरांना 'नांदा सौख्य भरे'  असा शुभाशीर्वाद मनापासून देतात.  मात्र या प्रसंगी मंगलाष्टकं म्हणताना सांगितलेला ' शुभमंगल सावधान ' हा उद्घोष दोघांसाठी अत्यंत महत्त्वाचा असतो.

                   नव्याचे नऊ दिवस सरल्यावर दोघांचा संसार सुरू होतो, तेव्हा कुठं नवदाम्पत्याला त्याचे  वास्तवरूप जाणवू लागते.  वाढती जबाबदारी, नवीन सोयरे पाहूणे, खर्चाचा भार, नव्या घरात अवती भवती वावरणाऱ्या माणसांच्या सवयी व स्वभाव,… या साऱ्यांमधून अलगद वाट काढीत दोघांना आपला संसार फुलवित पुढे न्यायचा  असतो. हे सहज सोप्पे नव्हे !

                   हे वास्तवचित्र बहुसंख्य गरीब, मध्यमवर्गीय आणि उच्चभ्रू कुटुंबात दिसते. अशाच कुटुंबातील एक बाप आपल्या नवविवाहित मुलीला शुभाशीर्वाद देताना काय बोधामृत पाजतोय  पहा………

💐दिल्या घरी तू सुखी रहा💐

           सस्नेह आशीर्वाद……..

                तुझा सुखी संसार आता सुरू झालाय, याचा मला मनापासून आनंद आहे व तो  सुखी व्हावा अशी  माझी सदिच्छा आहे. तो आणखी सुंदर करण्यासाठी मला महत्त्वाचे हितगुज तुझ्याशी करायचे आहे.

                 नवीन आयुष्यात हिताची ठरतील अशी 'सुखी संसाराची आठ सुत्रं'  तुला मी सांगत आहे, ती नीट ध्यानी ठेव आणि त्याप्रमाणे तू नेहेमी वाग. त्यामुळे भविष्यात तुझ्यापुढे कुठल्याही समस्या उभ्या राहणार नाहीत व तू  नेहेमी आनंदी राहशील.

 

*सुखी संसाराची आठ सुत्रं*

*नवीन वास्तू –            

             ज्या नवीन घरात तू  पाऊल ठेवलेस ना,  त्यात तू स्वतःला सामावून घे. ते घरदेखील तुला सामावून घेईल.

*विश्वास –

               आपल्या जोडीदाराला विश्वासात घेऊन वाग. त्याच्यावर देखील कायम विश्वास ठेव. पुढचं सगळं सुलभ होईल.

*नम्रता-

              तुझ्या कुटुंबात अवतीभवती नवखी माणसं भेटतील. तू त्यांच्याशी नम्रतेने वाग.

*प्रेम-जिव्हाळा –

              तुझ्या स्वभावातले प्रेम-जिव्हाळा आता सासरच्या कुटुंबालाही लाभू दे.

*संयम –

             कुटुंबातील  नवख्या माणसांत, काही जणांचे स्वभाव तुला खटकतील. तेव्हा तू संयमाने त्यांना सामोरी जा.

 

*वाणीची ताकद –

             आपल्या स्वभावातील नम्रता, जिव्हाळा व संयम हे सारे आपल्या जीभेशी, वाणीशी संबंधित असते. तिचा चांगला वापर कर.

*प्रामाणिकपणा-

             आयुष्यात आपली प्रत्येक प्रामाणिक कृती उपयोगी ठरते, हे लक्षात ठेव व त्याप्रमाणे वाग.

*कष्ट-

             आपल्या वाढत्या जबाबदारीत जेवढे जास्त कष्ट तू घेशील, तेवढे चांगले फळ तुला मिळेल याची खात्री बाळग.

 

                || अष्टसुत्रं  सौभाग्यवती भव ||

 

                                                                       :::::::::::