💐💐मनभावन कविता💐💐

              संसारात राहूनसुद्दा  माणसाला उत्तम वैराग्य सुख भोगता येते, हे आपल्या ‘अभंग’ गाथेमधून सांगणारे संत श्रेष्ठ तुकाराम महाराज यांचे महानिर्वाण ९ मार्च १६५० रोजी झाले. तिथीप्रमाणे फाल्गुन महिन्यात कृष्ण द्वितीयेच्या दिवशी तुकाराम महाराज बीज याच मार्च महिन्यात ३० तारखेस आहे.

             आज त्यांचे पुण्यस्मरण करताना मला अभंगरूपातील त्यांचे एक चिरतरुण साहित्यशिल्प तुम्हापुढे सादर करावयाचे आहे,

             तसेच, निसर्ग कवी ना. धों. महानोर यांनी तुकोबांच्या शब्द सामर्थ्याची सांगितलेली महती मी इथे काव्यरूपात मांडत आहे……………….

  || जोडोनियां धन ||

जोडोनियां धन उत्तम वेव्हारें  | उदास विचारें वेच करी || धृ ||

उत्तम चि गती तो एक पावेल | उत्तम भोगील जीव खाणी || १ ||

परउपकारी नेणें परनिंदा | परस्त्रिया सदा बहिणी माया || २ ||

भूतदया गायीपशूंचें पालन | तान्हेल्या जीवन वनामाजी || ३ ||

शांतिरूपें नव्हे कोणाचा वाईट | वाढवी महत्त्व वडिलांचें || ४ ||

तुका म्हणे हें चि आश्रमाचें फळ | परमपद बळ वैराग्याचें ||५ ||

 

                                           -संतश्री तुकाराम (अभंगाची गाथा मधून)

                                          तुकोबारायांचेमूळ नाव-तुकाराम बोल्होबा आंबिले(मोरे).

    

|| शब्द बांधू तुकोबांचे ||

सूर्यनारायण नितनेमानं उगवा

अंधाराच्या दारी उजेड पाठवा.

मोडक्या घराच्या ब्रिनदावनाशी(वृंदावन) सांजेला

दिव्याचा आधार जडो त्यांच्या संसाराला

ओंजळीनं भरू देगा पाखरांच्या चोची

दुःखात पंखांना असो सावली मायेची.

आबादानी होवो शेत भरू दे दाण्यांचे

तुझ्या पालखीला शब्द बांधू तुकोबांचे

                                                

                                                           -ना. धों. महानोर-(पानझड कविता संग्रहातून….)

                             

  :::::::::::::::::::::::::::