🌹🌹मन भावन गीत, गाणं अन् कविता🌹🌹

         सदाबहार ‘श्रावण’ मास आता संपत आलाय, लवकरच भाद्रपद सुरु होईल. सण- व्रत- वैकल्यांनी भरलेला श्रावण कधी संपतो हेच समजत नाही.  या महिन्यात आकाशातून रिमझीम बरसणाऱ्या श्रावणधारा अंगावर झेलण्याचे सुख अवर्णनीय आहे ते प्रत्यक्ष अनुभवायलाच हवे. हे सुख अनुभवताना निसर्गप्रेमी कविवर्य मंगेश पाडगावकर यांनी लिहिलेले हे गीत तूम्ही गुणगुणायला सुरुवात केलीत तर ?........

🌹श्रावणात घन निळा बरसला रिमझिम रेशीमधारा🌹

श्रावणात घन निळा बरसला रिमझीम रेशीमधारा

उलगडला झाडीतुन अवचित हिरवा मोरपिसारा

|| श्रावणात घन निळा बरसला रिमझीम रेशीमधारा ||

जागून ज्याची वाट पाहिली ते सुख आले दारी

जिथे जिथे राधेला भेटे आता शाम मुरारी

माझ्याही ओठांवर आले नाव तुझेच उदारा 

|| श्रावणात घन निळा बरसला रिमझीम रेशीमधारा ||

रंगांच्या रानात हरवले हे स्वप्नांचे पक्षी

निळ्या रेशमी पाण्यावरती थेंब बावरी नक्षी

गत जन्मीची ओळख सांगत आला गंधित वारा

|| श्रावणात घन निळा बरसला रिमझीम रेशीमधारा ||

पाचूच्या हिरव्या माहेरी ऊन हळदीचे आले

माझ्या भाळावर थेंबाचे फुलपाखरू झाले

मातीच्या गंधाने भरला, गगनाचा गाभारा

|| श्रावणात घन निळा बरसला रिमझीम रेशीमधारा ||

पानोपानी शुभ शकुनाच्या कोमल ओल्या रेषा

अशा प्रीतीचा नाद अनाहत, शब्दावाचून भाषा

अंतर्यामी सुर गवसला नाही आज किनारा

|| श्रावणात घन निळा बरसला रिमझीम रेशीमधारा ||

उलगडला झाडातून झाडांतून अवचित हिरवा मोरपिसारा

 श्रावणात घन निळा बरसला रिमझीम रेशीमधारा……….

                             -- मंगेश पाडगावकर.

                         :::::::::::::::::::